Sâm 10
10
Nshwam mú Mpan mú Ntûntû
1Ô Óburúkpâbí, ebóng ńkyí wo a/bwom bě tíbítíbí.
Ebóng ńkyí wo amu a-rôo ng bě byiko eyên
ké nkéré be byi/firi ké afaníkong.
2Bambên atyém mbe ba-tông ng byiko
ne mbe ba-kyâ banet-kyikpu busông.
Kám kámbé ké boǒtám ḿbú mbé baa/kuu.
3Mbên dyityém mu o-tông ng byiko ké byibî-okabe emen.
Nshwam byěm mu o-shú u,
ne mu o-né ng Óburúkpâbí.
4Mbên dyityém oo*kérê kyi-kim ne Óburúkpâbí*.
Nyǐ mu o-kabe ng ké byiko emen etông o/fu,
Osówo o*da/byí chwǒm*.
5Mbên dyityém o-já ng kanong ké kángkáng byěm.
Oo*man enyît dyishí ne kyikû-bampan ḿbé Osówo mu o-két ng*.
Nyǐ o-jwó ng banet-bushwôn emen.
6Nyǐ mu o-sét ng byiko emen o/fu,
me mm*ba/chi n-róng ne banyá*.
Me ne banyá mm*ba/chi n-róng ké afaníkong*.
7Byiraa emen bii/sú ne byibî-banshwam
ne byisédéng ne bupii-achi.
Nyǐ o-kwáng ng ké byibî-byiraa eraa
ne ḿbyí bii*nyîn onet*.
8Nyǐ mu o-rem m byiko ké kafâ-oshê o-bám m
eringe nyí odaju banet ḿbé ba*da/chi kyibî*.
Nyǐ mu o-kpúrî ng ké karem o-ri banet emen ḿbé mu o-ju ng.
9Nyǐ mu o-bám m ké kyikit-dyirem emen wǎ ekpang.
Nyǐ mu o-cít ng kyísí o-bám m banet-kyikpu.
Nyǐ mu o-kám m kámbé ké boǒtám emen
ḿbú mu o-kuu ng o-tut ng kámbé o-dim m.
10O-shiryi banet ḿbé ochwâp o*fí kámbé* o-pwó kyísí.
Kyibî-busa emen kii/kpógê kámbé.
11Mbên dyityém o-raa ng ké dyityém o/fu,
Osówo o*fí o-kérê ng*.
Osówo oo/cít achi
ne oo*ba/chi o-ri mě ne banyá*.
12Ô Óburúkpâbí, kye bambên atyém ámbe busông.
Zîim banet ḿbé mbe ba-ri ng afaníkong.
13Kyi/cen nǎ ńkyí mbên dyityém odadángê Osówo
o-raa ké dyityém o/fu,
Osówo oo*ba/chi o-kye mě busông*.
14Nké wo amu a-ri ng.
Wo amu a-ri ng kyi-kim ne busông ne afaníkong,
ne aa/kpá byiko kángkáng nkéré ḿbyí adachwáp.
Onet mú ochwâp o*fí ǎ* mu o-kyâ ǒ byiko emen.
Wo kángkáng nkéré aa/chwáp onet mú o*fí ne bonchí*.
15Bên busa ḿbú bambên atyém ne ḿbú byibî-banet.
Kûkye kámbé busông ké byibî-byěm ebe ḿbyí mbé baa/chi
tete ba-mîng kámbyí echi.
16Óburúkpâbí nké mu Otu mú ne banyá ne banyá.
Banet ḿbé mbe ba-fâ esówo ekíri ba/chi ba-rím ké esí emen.
17Ô Óburúkpâbí, wo a/chi a-jwo banshwam ḿbé banet
ḿbé mbe ne atyém dek.
Wo a/chi a-kye kámbé atyém ecíp.
18Wo a/chi a-jwo bukyû ḿbú banet
ḿbé mbe ba-cít ng kámbé
ne ḿbú bwǎn-byibén.
Wo a/chi a-két mpan o-nwa kámbé
eringe nyí banet ḿbé badakpú baa*kye to afaníkong*.
Currently Selected:
Sâm 10: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
