Sâm 86
86
Nshwam-Ochwâp
1Óburúkpâbí, fwôo atông a-jwo mě, a-faa mě ojá,
ké nǎ, me mu kyeekyee ne n*fí ne ochwâp*.
2Nyii mě ké bukyû ekpú,
ké nǎ, me mu n-chi i ńkyí wo a/sét.
Nyii mě, ké nǎ, me mu ḿgbán eyên
ne n/tî dyityém ejí ké wo.
3Wo a-chi i Osówo ejí,
ké bubwô ámbu, ri mě bafip.
Me mu n-fâ nshwam kyirim-dyicí kángkáng n-kyâ ǒ.
4Ô Óburúkpâbí, chi dyityém dyi-nyîn ḿgbán eyên,
ké nǎ, banshwam ejí mbe ba-jâ kyíbóng ba-kâm ǒ.
5Wo a/nwa dyityém ne be,
ne amu a-pwoo ng bě,
ne kyijé ńkyí kii*man* kii/sú ǒ pwat ne banet kángkáng
ḿbé mbe ba-fâ nshwam ba-kyâ ǒ.
6Óburúkpâbí, fwôo atông ké nshwam ejí.
Jwo bukyû ejí ḿbú mu n-tii ng n/fu, chwáp mě.
7Me mu n-kó ng ǒ ké nkéré afaníkong,
ké nǎ, wo amu a-faa ng mě ojá ké banshwam ejí.
8Ô Óburúkpâbí, osówo o*fí mú mu wǎ wo*.
O*fí nang obónge mú oo/chi ńkyí wo aa/chi*.
9Eshê kángkáng nyí wo a/chi e/chi e-bâ e-ba-tíngê kyísí e-fé ǒ.
Mbé ba/chi ba-kpee dyizîn eyên ńdyí dyi/rêe dyi-shwôm.
10Wo a/rêe ne amu a-chi i byěm-akat.
Wo kǎnchí nké amu Osówo.
11Óburúkpâbí, tángê mě ńkyí amu a-ryuu ng a/fu, me nchi,
ne n/chi n-chi ńkyí wo a/sét ne dyityém ejí.
Tángê mě eringe nyí ndashî dyizîn eyên
ne dyityém ejí kángkáng.
12Ô Osówo Óburúkpâbí ejí,
me n/chi n-kye ǒ akpee ne dyityém ejí kángkáng.
Me n/chi m-kpee dyizîn eyên ne banyá.
13Ké nǎ, kyijé eyên ne me ńkyí kii*man* kyi/rêe kyi-shwôm.
Wo aa/nyii mě n-fem ké dyikun enung.
14Ô Osówo, bantông byiko-banet baa/bûu bunwa ne me.
Dyizu-bambên atyém-banet ḿbé ba*fí ba-kérê ng kyi-kim ne wo*
mbe ba-kan n ba/fu, mbé ba-ju ng mě.
15Nké wo, ǎ Óburúkpâbí, nké amu Osówo mú amu a-ri ng banet bafip,
ne amu a-tông ng kyijé eyên kángkáng nkéré,
ne amu ne dyityém chee.
Wo a/cángê dyityém kángkáng nkéré,
ne amu a-tî ng ocím eyên mú a/ryí.
16Bírî a-kâm mě a-ri mě bafip.
Chi mě n-shwane a-nyii mě,
ké nǎ, me mu n-chi i ńkyí wo a/sét,
éné wǎ eringe nyí boné ejí o/mû o/chi.
17Óburúkpâbí, tông mě ekap nyí kanong eyên,
eringe nyí éshwân e/chi e-wuri banet ḿbé me mu n-sa ng kámbé kafâ
ké nkéré mbé baa/ri ba/fu,
wo aa/kye mě bunyîn-dyityém ne ochwâp.
Currently Selected:
Sâm 86: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
