Sâm 84
84
Kyise ńkyí Osówo eryuu
1Óburúkpâbí mú o/rêe o-shwôm,
kiǐtí-kyise-kyifen eyên echi nkyi kyi-jê ng mě kyi-shwôm.
2Mu n-ryuu ng n/fu, n-kyú u ké nkyí.
Mu n-ryuu ng n/fu,
n-kyú u ké kiǐtí-kyise-kyifen-Óburúkpâbí echi.
Me mu n-kwán n ekwan ne kyirim-enyam-byiko ejí ké bunyîn-dyityém
n-kyâ Osówo mú mu ne dyikpen.
3Nang efyife e-chi i aju.
Nang agbâng nyi ne byise ḿbyí ebe.
Nyǐ nyi a-tî ng bwǎn ebe fáráng ne kyikit ńkyí badachi kyifen eyên,
ǎ Óburúkpâbí mú o/rêe o-shwôm,
mú mu Otu ejí ne Osówo ejí.
4Bunyîn-dyityém bu/jê banet ḿbé mbe ba-kyú u ké kiǐtí-kyise-kyifen eyên echi.
Mbé kángkáng nkéré mbe ba-kwán n ekwan-akpee ba-kyâ ǒ.
5Bunyîn-dyityém bu/jê banet ḿbé busa ebe mbu bu-fím m ké abwô eyên.
Bunyîn-dyityém bu/jê banet ḿbé mbe ba-ryuu ng ba/fu,
mbé ba-câ kaku ńké Záyon.
6Ké nkéré mú mbé ba-kú ba-shwôm m kiǐyéyé-owo ńkyí Báka,
kyikit ánkyi kyi-firi kyikit ńkyí boǒbwán-buce budabyí
ne [baǎmú-dyije] badasú ké nkyí.
7Eringe nyí mbé mbe ba-câ,
mbe ba-shwane e ba-câ kashú.
Mbé ba/chi ba-ri Osówo ké Záyon
mú mu Osówo mú esówo kángkáng.
8Osówo Óburúkpâbí mú o/rêe o-shwôm, jwo nshwam ejí.
Osówo mú Jekôp, jwo mě.
9Osówo, jware otu eten,
otu eten mú wo a/cá.
10Dyicí dyibónge ekyú ké kiǐtí-kyise-kyifen eyên echi dyi/shwôm égot-ací ekyú ké kyikit kyikíri.
Nkyi mě kanong ńkyí ndakyú ké ocím-dyifyi mú kyise-Osówo ejí
kyi-shwôm ńkyí ndakyú ké kafâ-byise ḿbyí byibî-banet.
11Óburúkpâbí nké mu Onet-Onyii eten
ne Otu eten mú kiǐtí,
mú mu o-tông ng bě dyityém ecángê ne ofê.
Nyǐ oo*né banet ḿbé mbe ba-chi i kanong chwǒm ńkyí kyinong ekye*.
12Óburúkpâbí mú o/rêe o-shwôm,
bunyîn-dyityém mbu ne banet
ḿbé mbe ba-tî ng atyém ké wo.
Currently Selected:
Sâm 84: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
