Sâm 81
81
Okwan mú Dyijî-Kyifen echi
1Wonge ê ne ejá kyíbóng kyíbóng
ba-kye Osówo mú mu busa eten.
Kwán n̂ akpee ba-kye Osówo mú Jekôp.
2Kpet n̂g ane ekim, ba-só byícícágé.
Kim m̂ ane nyí bunyîn-dyityém
ké égûm ne ácîng ekim.
3Jwá n̂g kiintán ńkyí dyijî-kyifen
ké nkéré-otukáku mú ofyîfî odabyí,
ne ké nkéré oo/kwárê.
4Nyín kyije ńkyí nkyi ké Ézerel,
ńkyí nkyi busa ḿbú bu/fím ne Osówo mú Jekôp.
5Nyǐ o/kye banet-Ézerel kánkyí
[ké nkéré nyǐ o/nwa ne banet ḿbé Éjip.]
Me n/jwo ejá nyí me nn*nyît* e-raa e/fu,
6me n/shû běn atû nyí ba/mû ba/tû běn.
Me m/mîng běn ba-shû byirim-ecing enen ba-tî kyísí.
7Ben ba/kó mě n-nyii běn
ké nkéré ben ba/mû ké afaníkong.
Me n/faa běn ojá ké kyikit-orem ejí,
ké afú nyí aryên.
Me n/kan běn ké kace ńké ka/byí ké mbwo, ké Meryíba.
8Banet ejí, fwôo n̂g atông ba-jwo ekó ejí nyí mu n-kuri ng.
Banet-Ézerel, me mu n-ryuu ng kanong kanong n/fu,
fwôo n̂g atông ba-jwo mě.
9Ben baa*man ba-kye osówo okíri ofê*.
10Me n-chi i Osówo Óburúkpâbí enen
mú o/fîm běn ba-byí ba-mîng esí nyí Éjip.
Bâa n̂g ocím enen,
ne me n/chi n-nen běn.
11Nké banet ejí ba*da mě ejwo*.
Banet-Ézerel ba*da/chi ńkyí me n/sét*.
12Ké bubwô ámbu, me m/mîng kámbé n/fu,
baca ne édúú ebe nyí atyém erêe,
ba-chi ńkyí mbé mbe ba-ryuu ng.
13Â a/ri eringe nyí me mu n-ryuu ng n/fu,
banet ejí bajwo mě.
 a/ri eringe nyí me mu n-ryuu ng n/fu,
bachi ńkyí n/sét.
14Me m/mû m-kpógê ng banet-bushwôn ebe babap,
ne m/mû m-kpógê ng kángkáng banet-ociring ebe.
15Banet ḿbé mu n-sa ng kámbé kafâ ba/mû ba-tíngê e kyísí
ké bushú ejí ké bushî.
Busông ebe bu/mû bu-waa ng ne banyá.
16Nké me m/mû n-nen n běn
ne esang-byichí nyí e/nwa e-shwôm,
ne m/mû n-kyâ běn bakút-bukwan ba-ryí i ba-zût ng.
Currently Selected:
Sâm 81: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
