Sâm 80
80
Nshwam mú Oshê enap
1Mbâm Ebû mú Ézerel, fwôo atông a-jwo bě.
Kiintông bukwóp mú dyibóng-ebû eyên, jwo bě.
Fím ké kakyúng-butu eyên
ńké kyíbóng-biǐnyám ámbyi byifee
ḿbyí ba/mee ké gûl ne abyibabang ebe táttát,
2tông kyikû-banet ńkyí Éferem ne ńkyí Běnjámin
ne ńkyí Manáse byiko eyên gbúúl.
Tông bě busa eyên.
Bâ a-nyii bě.
3Ô Osówo, bwa ne be esim.
Ri bě bafip,
ne be byi/chi byi-fem.
4Osówo Óburúkpâbí mú o/rêe o-shwôm,
nkéré orá mú banshwam ḿbé banet eyên
bada ǒ emîng kafâ esa.
5Bafip ḿbé a/kye bě ba/firi bě wǎ byiryíng
ḿbyí byimu byi-ryí i.
Batíí ba/firi bě wǎ kiǐsúsú-nkôp-omu mú byimu byi-jwáp ng.
6Wo amu a-mîng ng eshê nyí e/fárâng bě e-nwa ne be.
A-mîng ng banet-bushwôn eten ba-kyâ bě ecábé.
7Osówo mú o/rêe o-shwôm, bwa ne be esim.
Ri bě bafip,
ne be byi/chi byi-fem.
8Ké nkéré mú wo a/chi banet eyên ba-fem ké abwô nyí banet-Éjip,
be byi/mû wǎ wo a/fím ne dyisín-kyichí ké Éjip
a-ba-ró eshê ekíri nyí e/mû nyín,
ne a-kwón kánkyí nyín ké esí ebe.
9Wo a/tyém kyikit a-tî kyichí ánkyi a/fu, kyikán.
Eriri emen e/kán e-nung kyísí
ne kyi-káng oshê omúmú.
10Busi emen bu/cít eku.
Byire emen byi-kán byi-cít byichí ḿbyí byi/nárê.
11Byi-tát tete byi-ribi ké baya ḿbé Medeterényan,
byi-ribi ké kace ńké Yuférétyis.
12Nké ebóng ńkyí wo a/bú oro
mú a/bi a-wáp kánkyí.
Kántîk, nang yeě mú o-kú o-shwôm m o-man n ejii byirim emen.
13Ekorók e-kú e-cím m kánkyí e-fâ kyísí,
ne byibî-enyam byi-kú byi-ryí i kánkyí.
14Osówo mú o/rêe o-shwôm, bírî a-kâm bě.
Bírî achi kyísí a-tún bě.
Bâ a-ba-nyii banet eyên.
15Bâ a-ba-nyii dyisín-kyichí eyên ńkyí a/kwón,
osu-dyisín-kyichí mún mú wo a/chi o-kán kanong kanong.
16Banet-bushwôn eten baa/fé okwâ ké nkyí
ne baa/twom kánkyí.
Bírî achi a-tún kámbé ne busa-dyityém a-man ne mbé.
17Ku banet ḿbé wo aa/cá ne oshê mú wo a/chi o-shwane
a-tî kámbé to kanong.
18Be bii*ba/chi byi-chî ǒ ebírî esim ne banyá*.
Mîng bě byi-kpen,
ne be byi/chi byi-kye ǒ akpee.
19Osówo Óburúkpâbí mú o/rêe o-shwôm, bwa ne be esim.
Ri bě bafip,
ne be byi/chi byi-fem.
Currently Selected:
Sâm 80: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
