Sâm 79
79
Nshwam mú Onyii mú Oshê
1Ô Osówo banet ḿbé ba/bángê ké bakye esháng baa/koo esí eyên.
Mbé ké kyibî-omiríng ebe
baa/bên kiǐtí-kyise-kyifen eyên echi ńkyí ociring,
ne baa/shí Jerúsélem kángkáng.
2Ba-mîng byikwóm-enyam-byiko ḿbyí banet eyên ba/fu,
biinfuu akun byiryí,
ne ḿbyí bǎmgbán eyên ba/fu,
byibî-enyam byiryí.
3Mbé ba/pwó baróng ḿbé banet eyên wǎ omu.
Baróng ba/sen wǎ omu ké Jerúsélem omúmú,
onet nang obónge o*da/waa mú odaryii ḿbé baa/kpú*.
4Eshê nyí nyi bě wângwâng nyi e-dángê e bě.
Nyǐ nyi e-jwó ng bě,
ne nyi e-fát ng bě kiikuku.
5Óburúkpâbí, wo a-waa ng ké kafâ esa ne be ne banyá?
Kafâ esa eyên ka/chi ka-mang ka-ca kashú wǎ okwâ?
6Bírî busa-dyityém eyên bu-kâm eshê
nyí e*fí e-kyâ ǒ ofê*
bu-kâm banet ḿbé ba*fí ba-fâ nshwam ba-kyâ ǒ*.
7Ké nǎ, mbé baa/ju banet eyên,
ba-bên oshê eyên.
8*Da bě ekye busông
ké bubwô-byibî ḿbyí banchí eten ḿbé kpákpá*.
Ri bě bafip kántîk,
ké nǎ, be baa/bwa ne be kyísí kyísí.
9Chwáp bě, ǎ Osówo, a-nyii bě.
Nyángê bě a-pwoo bě byibî eten
ké bubwô ḿbú dyizîn eyên.
10Kyi/cen nǎ ńkyí banet ḿbé ba/bángê ké bakye esháng bada bě ebí ba/fu,
Osówo enen mu nyá.
Mîng bě byi-ri ǒ a-kye banet ámbe busông
ké bubwô-baróng ḿbé mbé ba/chi ba-byí bǎmgbán eyên.
11Fwôo atông a-jwo dyibyê ńdyí banet-bamgbokobá,
ne ké kiǐtí-busa eyên,
chi banet ḿbé ba/fu,
bashwân kámbé, ba-fem.
12Óburúkpâbí, só eshê nyí áku ewa kampén bujam
ké kángkáng ecábé nyí mbé baa/kye ǒ.
13Ne be kâng mú byimu banet eyên
ḿbé dyibóng-ebû eyên
byi/chi byi-kó ǒ asǎma ne banyá,
byi-kye ǒ akpee ké kángkáng nkéré mú mu o-bâ.
Currently Selected:
Sâm 79: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
