Sâm 78
78
Osówo ne Banet Emen
1Banet ejí, fwôo n̂g atông ba-jwo ńkyí mu n-tángê e.
Tî n̂g atông ké ńkyí mu n-sét ng.
2Me n/chi n-kwán ekwan-atím-ekan,
ne n/chi n-sét dyishí ne kyikû-byěm-akat
kyi-fím ké nkéré mú o/shwôm ké esim,
3ne byěm ḿbyí be bii/jwo ne ḿbyí bii/nyît
ne ḿbyí banchí eten ba/sét bě.
4Be bii*ba/chi byi-né bwǎn eten esét kámbyí*.
Be byi/chi byi-sét bwǎn ḿbé ba/chi ba-fwon kyi-kim ne busa ḿbú Óburúkpâbí
ne biǐtí-byěm emen echi ne akat-byěm nyí nyǐ oo/chi.
5Nyǐ o/kye banet-Ézerel ḿbé mbe bwǎn-Jekôp byije.
Nyǐ o/sét banchí eten ḿbé kpákpá o/fu,
batángê bwǎn ebe byije emen,
6eringe nyí bwǎn ḿbé ba/chi ba-fwon ba/chi ba-kwâa kámbyí,
ne mbé to ba-bwa ba-sét bwǎn ḿbé ebe kámbyí.
7Ké bukwóp ḿbún, mbé to ba/chi ba-fé dyityém ké Osówo
ne baa*ráp ńkyí nyǐ oo/chi*
nké mbé kángkáng nkéré
ba/chi ba-chi wǎ eringe byije emen byi/sét.
8Mbé baa*ba/chi ba-kyú wǎ banchí ebe ḿbé kpákpá*
ḿbé ba/mû ba/bírî ba-nwa ne Osówo*
ne banet ḿbé baa*chi ńkyí Osówo o/sét*
ne dyityém ebe ńdyí ba/fé ké Osówo dyi/mû dyi*fí shwanshwan*
ne ba*da/waa ké dyityém efé ne nyǐ*.
9Banet ḿbé Éferem, ḿbé ba/kám báre ne abán ba/chêe ké dyicí-byití.
10Mbé ba*da/tî ocím ebe mú mbé ba/ryí ne Osówo ba-sem dyizîn emen*.
Mbé ba/né echi wǎ eringe byije emen byi/sét.
11Mbé ba/ráp ńkyí nyǐ oo/chi
ne biǐtí-akat ḿbyí mbé ba/ri ǎ o-chi.
12Ké nkéré banchí ebe ḿbé kpákpá mbe ba-tún n achi,
Osówo o/chi biǐtí-akat ké ndíp-kyikit mú Zôn, ké Éjip.
13Nyǐ o/kyii baya ḿbé baryên
ne o-yip kámbé ba-shwôm ké mbé.
Nyǐ o/chi omu mú baya ámbe o-bwom wǎ ekpe.
14Nyǐ o/kúng ófíbí o-sí kámbé ne esû,
ne o-kúng bumang-okwâ o-sí kámbé buchú bumúmú.
15Nyǐ o/sé aká ké kyikim-dyikán
o-kye kámbé omu mú mu o-fím m ké kafâ-esí.
16Nyǐ o/chi kaǎwán-kace ka-byí ké buká
ne o-chi omu emen o-sen wǎ kace ńké karyên.
17Nké mbé ba/chi byibî ba-ca kashú ba-bât Osówo,
ne ké kyikim-dyikán,
mbé ba/bírî bunwa ne nyǐ mú mu kyíbóng kyíbóng.
18Mbé ba/tigi Osówo ekan ké byiryíng ebí
ḿbyí mbé ba/mû ba-ryuu ng.
19Mbé ba/raa byiraa ba-bât Osówo ba/fu,
Osówo o-man n ejá byiryíng ḿbyí odakye kámbé ké kyikim-dyikán?
20Ńkyí nyǐ o/sé buká ne omu o-tím puupuu nkyi ntûntû,
nké nyǐ o-man n bě ekye to berêt?
o-kye banet emen enyam?
21Ne ké bubwô ámbu, kafâ ka/sa Óburúkpâbí
ké nkéré o/jwo kámbé.
Nyǐ o/rim bunwa ne mbé,
ne bumang-okwâ ne kafâ emen esa ne mbé ka-jê ojéng.
22Ké nǎ, mbé ba*da/fé dyityém ne nyǐ*
ne ba*da/bángê ba/fu,
nyǐ o-nyii ng kámbé*.
23Nké nyǐ o/raa ne bubóng,
ne o-kye busa o/fu,
afyi nyí bubóng abâa.
24Ne nyǐ o-kye kámbé esang-byichí nyí e/fím kyíbóng
ké berêt mú badakó mána,
mú o/twóm kámbé o/fu, baryí.
25Ne mbé kâng ba-ryí byiryíng ḿbyí barím ḿbé banong,
ne Osówo o/kye kámbé kángkáng byěm
ḿbyí ba/mû ba-ryuu ng.
26Nyǐ to o/chi bufú ḿbú bu/fím kyicê ńkyí óbyísû odabyí bu-kpet etugi,
ne ké busa emen o/tông bufú ḿbú busyísen kiǐfáng,
27ne nyǐ o/twóm bunurung ḿbú bu/jê wǎ éshíshě nyí nyi ké bukô-kace bu-kâm banet emen.
28Mbú bu/róng ké otyém mú bampyep ebe ḿbé badabi ké kyídí
bu-wáp byikit byimúmú ḿbyí ba/mû ba-kyú u.
29Ne banet kâng ba-ryí ba-zût.
Osówo o/kye kámbé ńkyí mbé ba/mû ba-ryuu ng.
30Nké mbé ba/mû ba*da/zût ne* ké ńkyí mbé ba/mû ba-bí ng*
ne ba/mû ba/tôong ba-ryí i kámbú,
31ké nkéré kafâ ka/bírî Osówo ne mbé,
ne o-ju banet ebe ḿbé ba/mû banet-busa,
ne ba/mû byisu-banyinchéng ḿbé ba/nwa ba-shwôm ké Ézerel.
32Nang ké Osówo o/chi byěm ḿbyín kángkáng,
banet ba*da/mîng byibî echi*.
Nang ké biǐtí-akat emen,
mbé ba*da/tî dyityém ké nyǐ*.
33Ké bubwô ámbu, nyǐ o/chi ací ebe a-man wǎ kiǐnjáng
ne akpen ebe wǎ kiǐmút-bukyû.
34Nang nkéré orá nké nyǐ o/ju kyicê-banet ebe,
burwám ḿbú áku bu-bírî ng bu-kâm,
byiko byi-kpú kámbé,
ba-fé nshwam ne dyityém ebe ba-kye ǎ.
35Mbé ba/zîim ba/fu,
Osówo mu o-ku ng kámbé, Osówo mú mu kyíbóng kyíbóng o/bê echwáp kámbé.
36Nké byiraa ebe byi/mû byisédéng byísedeng.
Chwǒm kyi*fí nang kyibónge ńkyí mbé ba/raa
ńkyí kyi/mû ntûntû*.
37Mbé ba/mû ba*da/tî dyityém ebe ne nyǐ*.
Mbé ba/mû ba*da/fé dyityém ké ocím ebe
mú mbé ba/ryí ne nyǐ ba-sem ǎ*.
38Nké Osówo o/mû o/ri banet emen bafip.
Nyǐ o/pwoo kámbé byibî ebe,
ne o*da/ju kámbé*.
Nyǐ o/kám dyityém emen esa kampén kampén
ne o*da/buu kafâ emen kángkáng*.
39Nyǐ o/zîim o/fu, mbé ba-chi i banet ne enyam-byiko nké nke
nyí edakpú wǎ bufú ḿbú mbu bu-tugi ng,
ne bu-man n ké kaǎnyín-nkéré.
40Mbé ba/bírî bunwa ne nyǐ kampén kampén
ké kyikim-dyikán.
Ba/chi ǎ o-kyú ké bafip kampén kampén.
41Mbé ba/kan Osówo kampén kampén ba-bírî ng,
ne ba/chi ka-sa Osówo mú Ézerel
mú o/nwa o-shwôm.
42Mbé ba/ráp kiǐtí-busa emen
ne dyicí ńdyí nyǐ o/nyii kámbé
ké abwô nyí banet-bushwôn ebe,
43ne nkéré mú nyǐ o/chi biǐtí-byěm
ne biǐtí-akat ké ndíp-kyikit mú Zôn, ké Éjip.
44Nyǐ o/yángê buce bu-bírî baróng bárong,
ne banet-Éjip ba*da/chîjá omu mú badajwáp*.
45O-twóm ecincing e-kâm kámbé
nyí e/kye kámbé afaníkong,
ne búsáng ḿbú bu/bên kámbé esí.
46O-twóm agurubí o/fu,
aba-ryí byíkwôn ebe a-bên byifát ebe,
47o-ju byíkwôn ebe ké abíp
ne o-chi byichí ebe byi-fwoo byi-kpú,
48o-ju byitú ebe ké [abíp
ne enyam ebe ké kasabang.]
49Nyǐ o/chi kámbé ba-ri busông ḿbú kiǐtí
ké kyibî-kafâ ńké nyǐ o/sa,
ńké ka/bê wǎ bambánge byitwóm ḿbé bukyû.
50Nyǐ o*da/kám kafâ emen esa*
o-zú nang akpen ebe abwô*.
Nké o/ju kámbé ké busông,
51o-ju bákpá-banyinchéng
ké kángkáng byikû-banet ḿbyí banet-Éjip.
52Ne nyǐ o-kúng banet emen wǎ mbâm ebú o-byí ne mbé,
ne o-bám kámbé ké kafâ-kyikim-dyikán.
53Nyǐ o/sí kámbé afaníkong a*fí*
ne mbé ba/mû ba*fí ba-shî ng*.
Nké baya ḿbé baryên ba/kpaa banet-bushwôn ebe ba-cít.
54Nyǐ o/bê ne mbé ké esí-ociring emen
ké eku nyí nyǐ oyén o/kpógê.
55Nyǐ o/ró bayén-esí
ké nkéré mú banet emen mbe ba-tín n ba-bâ.
O-kyii esí ebe o-kye byikû-banet ḿbyí Ézerel,
o-kúng byise ebe o-kye banet emen.
56Nké banet emen ba/bírî bunwa ne Osówo
mú mu kyíbóng kyíbóng, ba-kan ǎ.
Ba*da/chi eringe nyí byije emen byi/sét*
57nké ba/bírî bunwa ne nyǐ,
ba*da/tî dyityém ebe ne nyǐ* wǎ banchí ebe,
wǎ dyibán ńdyí ndyi nyibínyibinyibí.
58Mbé ba/chi kafâ ka-sa ǎ
ké bubwô-byikit ebe ḿbyí bakye esháng,
ne ba-chi ka-bírî ǎ ka-shwôm
ké nkéré o/ri erím-bakye ebe.
59Ka/sa Osówo ké nkéré o/ri kánkyí.
Ké bubwô ámbu, nyǐ o/né banet emen kángkáng.
60O-dim o-mîng mpyep-kyifen emen echi
mú badabi ké kyídí, ké Shîl,
ké kyise ńkyí nyǐ o/mû oo/kyú ne mbé.
61Nyǐ o/mîng banet-bushwôn ebe ba-bam kámbé mkpukpu-byěm emen ba-koo,
mú mu ekap nyí busa emen
ne busan emen ḿbú ragerage.
62Kafâ ka/mû ka-sa ng ǎ ne banet emen,
ne nyǐ o-mîng banet-bushwôn ebe ba-ju kámbé.
63Ba-ju byisu-banyinchéng ké byití
ne byisu-banyinyi ba-waa, onet mú odabé kámbé o*fí*.
64Ba-ju banchi kyifen-Osówo ké kashwám
ne banet ba*da/bángê banyǐnkú ebe ba-ta dyikán*.
65Ké nkuli kyikû, Óburúkpâbí o-bûu
éné wǎ o/jwóbê ké burê.
Nyǐ o/mû wǎ okân-onet mú bato mbe ba-chi i ǎ o-bûu ne busa.
66O-nwa ne banet-bushwôn emen ba-bwa esim
ké nkuli kyikû-dyikpóge ńdyí éshwân.
67Nké nyǐ o/né bwǎn ḿbé Josêf.
O*da/cá kyikû-banet ńkyí Éferem*.
68Nké o/bwa o-cá ńkyí Júda ne kaku ńké Záyon,
ńké nke ka-jê ng ǎ kanong kanong.
69Ányi nké nyǐ o/bi kiǐtí-kyise-kyifen emen echi
wǎ kyise emen ńkyí nkyi kyíbóng.
Nyǐ o/chi kánkyí kyi-shwane wǎ esí eyén,
kíngkíng ne banyá.
70Nyǐ o/cá Otu Dívit mú ḿgbán emen
o-fîm ǎ ké bǎmkpóngé emen
71ḿbé o/mû o-nen n ebû emen,
ne o-kúng ǎ butu ḿbú Ézerel,
o-kyú wǎ mbâm ebû mú banet emen.
72Otu Dívit o-tún kámbé ne dyityém ńdyí dyinong,
o-tông kámbé bukwóp ne bubwô-bǎmkpóngé ḿbú bunong.
Currently Selected:
Sâm 78: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
