Sâm 76
76
Osówo Mkpóge Byití
1Mbe ba-nyît ng Osówo ké Júda.
Mbe ba-kyâ dyizîn emen ofê ké Ézerel.
2Nyǐ o/bi kyise emen ké Jerúsélem,
ké kaku ńké Záyon.
3Ányi nké o/bún abán nyí banet-bushwôn emen
ne édem ebe ne bushwám ebe
ne kángkáng byiyám ebe.
4Ô Osówo, busa eyên boo*nwa eri*.
Butu eyên ké nkéré a-kú a-fím m ké eku,
ké kyikit ńkyí a/kpógê banet-ociring eyên a-fyi, boo*nwa eri*.
5Bakân-bannwa byití ebe baa/koo kámbé byěm kángkáng,
ne mbé kántîk mbe ba-rê ng burê-bukyû.
Busa ebe kángkáng ne byinyídíng ebe byi*da/byí chwǒm*.
6Ô Osówo mú Jekôp, ké nkéré a/raa ne mbé,
bubyî-orá ne banet ḿbé mbe ba-yú u kámbú ba/myii ba-kpú.
7Nké Óburúkpâbí, wo kángkáng banet mbe ba-shî ng ǒ.
Onet o*fí nang obónge mú odaman ebwom ké bushú eyên
ké nkéré ka-kú ka-sa ng ǒ*.
8Wo a/bwom áku kyíbóng a-chi ejíí e-nyît mpan eyên mú a/két.
Bushî bu/róng ejíí ne e/cíbî pyêp,
9ké nkéré a/bûu a/fu,
a-két ng mpan eringe adanyii kángkáng banet ḿbé mbe ba-cít ng kámbé ké ejíí.
[ 10Ké ntûntû, dyityém esa ńdyí banet-bushwôn eyên byi/chi dyi-chi banet ba-kye ǒ akpee.
Banet ḿbé ba/fem ké byití ba/chi ba-tî ajî-byifen eyên.]
11Kye n̂g Osówo Óburúkpâbí enen ńkyí ben ba/ryí ǎ ocím.
Ben eshê kángkáng nyí nyi ǎ fáráng,
bâ n̂g ǎ ne eyáré.
Osówo mu o-chi i banet ba-shî ǎ.
12Mu o-shû ng banet-ashí ḿbé mbe ba-tông ng byiko ba-bwa kyísí,
ne mu o-chi i biǐtí-batu ba-firi ké bushî.
Currently Selected:
Sâm 76: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
