Sâm 74
74
Nshwam mú Osówo odanyii Oshê
1Ô Osówo, ebóng kyi/chi ne a-né bě a-twóp něen.
Wo a-waa ng ké kafâ esa ne banet eyên ne banyá?
2Zîim banet eyên ḿbé wo a/cá a/fu,
ba/já ǒ wo ké aje nyí a/shwôm ké esim,
ḿbé wo a/fîm kámbé ké búsóng
ba-firi oshê mú o/já ǒ wo.
Zîim kaku-Záyon ńké wo a/mû aa/kyú ké nké nkéré obónge.
3Cen ké byěm ḿbyín kángkáng ḿbyí baa/bên.
Banet-bushwôn eten baa/bên kángkáng byěm
ké kiǐtí-kyise-kyifen eyên echi.
4Banet-bushwôn eyên baa/wonge ké kiǐtí-kyise-kyifen eyên echi ba/fu, mbé baa/kpógê.
Mbé baa/tî ekap ányi nyí edatông e/fu, mbé baa/kpógê.
[ 5Mbé ba/mû wǎ bantwom byichí ḿbé mbe ba-twom m byichí ké akye ebe.]
6Mbé ba/sé ekpe kángkáng nyí ba/chi ké byichí
ké akye ebe ne áma ebe.
7Mbé ba/bên kiǐtí-kyise-kyifen eyên echi kángkáng
ba-fé okwâ ké nkyí.
Ba-cábê kyikit ńkyí banet ba/mû ba-kyâ ǒ ofê.
8Mbé ba/mû ba-ryuu ng ba/fu,
mbé ba-ju ng bě kángkáng.
Mbé ba/shí kángkáng byikit-ociring ḿbyí eyên ké esí eten.
9Be byi*fí to byi-ri ng byěm-ociring eten ḿbyí byi/já ǒ*.
Bamkpábé ḿbé badasét byiraa eyên ba*fí to*
ne onet o*fí mú mu o-nyît ng eringe ńkyín kyi/chi kyi-bwon*.
10Ô Osówo, banet-bushwôn eten ba-jwó ng ǒ ka-bwon nǎ.
Mbé ba/chi ba-cábê dyizîn eyên ne banyá?
11Ebóng kyi/chi ńkyí wo aa/né bě echwáp.
[Ebóng kyi/chi ńkyí wo amu a-kpárê ng abwô eyên ké esim.]
12Nké wo nké amu bě Otu eten
kyi-fím ké kiimkpet kyikû, ǎ Osówo.
Wo aa/nyii bě kampén chwóó.
13Wo aa/chi baya ḿbé baryên ba-kyii byicê byifee
ké busa eyên ḿbú bu/rêe bu-shwôm.
Wo a/sé ashí nyí biǐnyám-baya.
14Wo a/sé ashí nyí kiǐnyám-baya ánkyi
a-yip kyikwóm emen a-nen [enyam]-dyikán.
15Wo a/chi booce ḿbú mbu bu-byí i ké bambwo bu-sen,
a-chi baya ba-núng.
16Wo nké a/chi buchú ne esû.
Wo a/tî óbyísû ne otukáku ké byikit ebe.
17Wo nké a/tî bunyerenyere ḿbú ejíí.
Wo nké a/chi burwom ne kyifang.
18Ô Óburúkpâbí, zîim a/fu,
banet-bushwôn eyên mbe ba-jwó ng ǒ.
Zîim a/fu, mbé baa*nyît ǒ wo*
ne mbe ba-dángê e ǒ.
19*Dané [banet eyên ḿbé ba*fí ne ochwâp*]
a-mîng kámbé ké abwô nyí bambên atyém-banet-bushwôn eyên*.
*Daráp banet eyên ḿbé mbe ba-kyâ kámbé busông*.
20Zîim ocím mú a/ryí ne be a-sem byiko eyên,
ké nǎ, byikit-esí ḿbyí kyifip kyífip bii/sú ne anwa.
21*Damîng ba-fé banet ḿbé mbe ba-cít ng kámbé éshwân*.
Mîng banet-kyikpu ne ḿbé ba*fí ne chwǒm* ba-kye ǒ akpee.
22Osówo, bûu a-kye ejá-mpan eyên.
Zîim a/fu, banet ḿbé baa*nyît ǒ* mbe ba-jwó ng ǒ kángkáng nkéré.
23*Dachi a-ráp awonge-kafâ esa nyí banet-bushwôn eyên*
ne kyicoge ńkyí banet-ociring eyên mbe ba-chi i ba-câ kashú*.
Currently Selected:
Sâm 74: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
