Sâm 73
73
Osówo o-pan n Mpan Kerededet
1Ké ntûntû, Osówo o-tông ng [banet-Ézerel] kanong emen,
ne banet ḿbé mbe ne atyém kpárám.
2Nké kyi/mû kyi/waa kaǎníng dyityém ejí ńdyí n/fé ne Osówo dyi-man,
3ké nǎ, orêm o/mû o-kú o-chi i mě ne bantông byiko ké nkéré n/ri n/fu,
byěm mbyi byi-câ kanong ne banet ḿbé ba/bên atyém.
4Ké nǎ, mbé ba*fí ba-ri ng busông*.
Mbé mbe shwanshwan ne enyam-byiko ekpó.
5Mbé ba*fí ba-ri ng busông*
ne mbé ba*fí ne afaníkong wǎ banet bakíri*.
6Ké bubwô ámbu, mbé mbe ba-wum m byiko atông wǎ byibwáng-kyitông.
Ba-wum m anwa wǎ ágbádá.
[ 7Atyém ebe aa/sú ne byibî,]
ne ekabe ebe nyi kángkáng ké byibî-byěm echi.
8Ba-jwó ng banet ḿbé áku,
ba-raa ng byibî-byěm.
Ba-tông ng byiko,
ba-cibi ng to eringe nyí mbé badacít banet bakíri.
9Ba-raa ng byibî-byěm ba-bât ng Osówo mú mu kyíbóng.
Ba-sét ng banet ḿbé ké ejíí byěm ḿbyí badachi ḿbyí byiko etông.
[ 10Ké bubwô ámbu, nang banet ḿbé Osówo mbe ba-bírî ng ba-kâm m kámbé,
ne mbe ba-ryuu ng ebángê to ochéé óchee nang ebóng chwǒm ńkyí ba/sét.]
11Ba-raa ng ba/fu, Osówo mú kyíbóng kyíbóng oo*ba/chi o-nyît ńkyí byimu byi-chi i*.
12Éné nké bambên atyém mbe.
Mbé mbe ne byěm chwóó,
ne kángkáng nkéré mbe ba-já ng ba-câ kashú.
13Kántîk, mpún o*fí mě mú n*da/chi kyibî*
mú nn/tî byiko ejí kpárám*.
14Osówo ejí, wo aa/chi mě mu n-ri ng afaníkong ké dyicí ké dyicí.
Wo aa/kye mě busông kángkáng dyicófóróng.
15Â me m/mû n/fu azong-byěm ányi,
me m/mû mm*ba/chi n-chi édúú wǎ nyí banet eyên*.
16N/kan ekabe eringe ndachi kyi-kim ne afaníkong ńnyín,
nké kyi/mû kyi-sóng ng mě kyi-shwôm
17tete n-nung ké kiǐtí-kyise-kyifen eyên echi.
Ányi kâng nké n/nyît ńkyí kyi/chi kyi-chi bambên atyém.
18Wo a/chi a-tî kámbé ké byikit ḿbyí byidatyebe,
a-chi kámbé ba-myii ba-kpú.
19Mbé ba-kpú u ké abe,
ba-jâ ké kyibî-kyikit.
20Mbé mbe wǎ burê eri ḿbú adaráp ké dyicófóróng.
Óburúkpâbí ejí, ké nkéré wo oyén aa/jwóbê, mbé ba-rím m.
21-22Me m/mû wǎ enyam ké nkéré mú m/mû ne byibî-okabe ne dyityém-busa.
Me m/mû n*fí n-nyît ng ńkyí amu a-chi i mě*.
23Nké me mu n-kyú u ne wo fáráng kángkáng nkéré,
ne wo amu a-níbî ng mě ké bubwô.
24Wo amu a-tông ng mě kiǐfáng
ké byěm ḿbyí wo amu a-tángê e mě,
ne ké nkuli kyikû,
wo a/chi a-koo mě ne ofê.
25Ebóng chwǒm kyikíri ńkyí me mu ne nkyí ké bubóng
kyi-cibi ne wo.
Ké me mu ne wo, me n-chî ng eryuu ebóng ké ejíí.
26Enyam-byiko ejí ne dyityém ejí byi-man n efiri kyeekyee,
nké Osówo nké mu busa ejí.
Nyǐ nké mu kángkáng byěm ḿbyí mu n-ryuu ng.
27Ké nǎ, banet ḿbé ba/bírî ǒ esim ba/chi ba-tánê ké ntûntû.
Wo a/chi a-man ne banet ḿbé ba*fí ba-fâ atyém ebe ne wo*.
28Nké me, nkyi kanong ne me ńkyí ndakyú fáráng ne Osówo,
ńkyí Osówo Óburúkpâbí oda mě eku,
ne ńkyí ndasét kyi-kim ne kángkáng byěm ḿbyí nyǐ oo/chi.
Currently Selected:
Sâm 73: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
