Sâm 72
72
Nshwam efé ké Bubwô-Otu
1Ô Osówo, tángê otu eringe odakúng kanong eyên o-kûpan banet bampan.
Kyii ntûntû eyên a-kye ǎ
2eringe nyǐ odakúng ntûntû o-kûtún banet eyên,
o-kúng to kanong echi o-kûtún banet
ḿbé baa/kúng kámbé wǎ básóng.
3Kyi/bát esí enwa byiryíng.
Kyi/bát esí eri kanong eyên.
4Kyi/bát otu okûpan banet-kyikpu mpan ké bukwóp ḿbú bunong.
Kyi/bát otu ochwáp banet ḿbé ba*fí ne chwǒm*
o-kpógê banet ḿbé mbe ba-cít ng kámbé.
[ 5Kyi/bát banet eyên bakye ǒ ofê]
tete óbyísû o-mîng ebyí,
tete otukáku o-mîng esan
ké nkéré mú mu o-bâ.
6Kyi/bát otu okyú banet emen wǎ omu mú odana o-pwôo ng ké byifát.
Kyi/bát okyú wǎ kyibû ńkyí nkyi kyi-na ng kyi-pwôo ng ké esí.
7Kyi/bát kanong echi kabâ ké nkéré mú nyǐ o/tôong okpó,
ne kyi/bát bunyîn-dyityém buwaa tete otukáku o-mîng esan.
8Butu emen bu/chi bu-jê bu-fím ké baya babónge
bu-ribi ké ḿbé áku,
bu-fím ké bukô-ejíí ḿbú áku bu-ribi ḿbú kwán.
9Banet ḿbé mbe ba-kyú u ké kyikim-dyikán ba/chi ba-tíngê kyísí ké bushú emen ba-fé ǎ.
Banet-bushwôn emen ba/chi ba-myii kyísí.
10Batu ḿbé Syipîn ne ḿbé eshê nyí baya ba/wáp kányí ba-fé ké kafâ ba/chi ba-kye ǎ eyáré.
Batu ḿbé Arébya ne ḿbé Etyǒpya ba/chi ba-bâ ǎ ne eyáré.
11Kángkáng batu ba/chi ba-tíngê kyísí ba-fé ǎ.
Kángkáng eshê e/chi e-chi ńkyí nyǐ o/sét.
12Nyǐ mu o-nyii ng banet-kyikpu ḿbé mbe ba-kó ng dyizîn emen
ne banet ḿbé ba*fí ne chwǒm* ne ḿbé baa/né kámbé.
13Nyǐ mu o-ri ng banet-kyikpu bafip
ne ḿbé asa a*fí kámbé*.
Nyǐ mu o-nyii ng dyikpen ńdyí banet ḿbé ba*fí ne chwǒm*.
14Nyǐ mu o-nyii ng kámbé ké afaníkong
ne ké abwô nyí banet ḿbé mbe ba-cít ng kámbé.
Akpen ebe nyi ǎ kiǐtí.
15Otu okpen o-wu.
Kyi/bát banet ḿbé Arébya bakye ǎ akpuga.
Kyi/bát banet bafé nshwam ba-kye Osówo
ké dyishí emen kángkáng nkéré.
Kyi/bát Osówo ojware ǎ kángkáng nkéré.
16Kyi/bát byiryíng byijê ké esí eten.
Kyi/bát byíkwôn byisú ké eku eten,
byi-chi byirim wǎ ḿbyí ké esí nyí Lebánon.
Kyi/bát eshê eten esú ne banet
wǎ biǐbyâa ḿbyí ké byifát.
17Kyi/bát dyizîn ńdyí otu dyiwaa ne banyá.
Kyi/bát kanong emen kawaa tete óbyísû o-mîng ebyí.
Kyi/bát eshê kángkáng ekye ǎ akpee.
Kyi/bát ebí Osówo o-kye kányí ojware,
[ne kyi/bát eryuu otu o-kyú ké bunyîn-dyityém.]
18Kye n̂g Osówo Óburúkpâbí mú Ézerel akpee.
Nyǐ kǎnchí nké mu o-chi i biǐtí-byěm ḿbyín.
19Kye n̂g kiǐtí-dyizîn emen akpee nyí ne banyá.
Kyi/bát busa emen busú ké ejíí emúmú.
Kyi/bát kyikyú éné kerededet.
20Nyín nkuli kyikû-banshwam ḿbé Otu Dívit mú wǎn-Jésyi.
Currently Selected:
Sâm 72: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
