Sâm 71
71
Nshwam mú Okâa-Onyinchéng
1Óburúkpâbí, me mm/bê n-kâm ǒ n/fu, ku mě.
*Damîng ba-kpógê mě*.
2Ké nǎ, wo amu a-chi i kanong,
chwáp mě a-nyii mě.
Fwôo atông a-jwo mě, a-nyii mě.
3Kyú mě kyikit-dyirem ńkyí chwǒm kii*ta mě*
ne [kyise ńkyí shwaneshwane] ńkyí ada mě eku.
Wo amu kyikit-dyirem ne oku ejí.
4Osówo ejí, nyii mě ké abwô nyí bambên atyém,
ne ké abwô nyí byibî-banet.
5Óburúkpâbí, me n/tî achi ejí ké wo.
Me n/tî dyityém ejí ne wo kyi-fím ké nkéré m/mû wǎsíng.
6Me nn/jêem esim ké wo ké kángkáng dyikpen ejí.
Wo [aa/ku] mě kyi-fím ké dyicí ńdyí ba/fwon mě.
Me n/chi n-kye ǒ akpee kángkáng nkéré.
7Dyikpen ejí dii/kyú banet chwóó wǎ [kyiká-bucen,]
ké nǎ, wo aa/kyú Onet-Oku ejí mú shwaneshwane.
8Me mu n-kyâ ǒ akpee ké kyirim-dyicí,
ne mu n-sét ng kyi-kim ne busa eyên.
9*Da mě ené kántîk mú me nn/kâa*.
*Da mě emîng kántîk mú me n/firi kyeekyee*.
10Banet-bushwôn ejí mbe ba-ryuu ng mě eju.
Mbé mbe ba-raa ng mě byibî-byiraa
ne mbe ba-nam m mě dyiju.
11Mbe ba-raa ng ba/fu, Osówo oo/dim o-mîng ǎ.
Bâ n̂g byi-ca ne nyǐ ké kyikû byi-da-kám ǎ.
Onet o*fí mú oda ǎ enyii*.
12Ô Osówo, *dajang ebwom tíbítíbí*.
Osówo ejí, bâ babap a-chwáp mě.
13Kyi/bát bakpógê ba-ju banet ḿbé mbe ba-nwa ng ne me.
Kyi/bát banet ḿbé mbe ba-kan n ba/fu,
mbé ba-némê e mě éshwân ewuri kámbé ba-cábê kámbé.
14Me n/chi n-tî achi ejí ké wo kángkáng nkéré.
Me n/chi n-kye ǒ akpee n-nye ng n-fâ.
15Me n/chi n-sét kyi-kim ne kanong eyên.
Me n/chi n-raa kyi-kim ne onyii eyên dyicí dyimúmú,
nang ké mǔ o/shwôm bubong ejí.
16Óburúkpâbí mú o/rêe o-shwôm,
me n/chi m-kpee busa eyên.
Me n/chi n-sét kyi-kim ne kanong ńké eyên kǎnchí.
17Wo aa/tángê mě kyi-fím ké nkéré m/mû wǎsíng,
ne n/tôong n-sét ng kyi-kim ne biǐtí-byěm eyên echi.
18Ô Osówo, *da mě emîng kántîk mú me nn/kâa m-byí ébyî*.
Kyú ne me ké nkéré n-kú n-sét ng kángkáng banet ḿbé ba/chi ba-fwon kámbé
ké nkéré mú kashú kyi-kim ne busa eyên.
19Osówo, kanong eyên echi ne busa eyên bii/rêe kanong kanong.
Onet o*fí mú mu wǎ wo*.
20Wo aa/twóm mě afaníkong ne busông,
nké wo a/chi a-bwa ne busa ejí a-kye mě.
Wo aa*mîng mě n-nung ké dyikun*.
21Wo a/chi a-chi mě n-firi kiǐtí n-shwôm.
Wo a/chi a-chî mě efé dyityém.
22Me ké ntûntû n/chi n-kim dyícîng m-kpee ǒ.
Osówo ejí, me n/chi m-kpee ocím mú amu a-tî ng.
Me n/chi n-kim dyícîng ejí n-kwán ekwan n-kye ǒ wo
mú Osówo mú eten mú onong.
23Me n/chi n-kwán ké bunyîn-dyityém ne ejá kyíbóng kyíbóng
ké nkéré n-kú n-kim m ane n-kye ǒ.
Me n/chi n-kwán ne dyityém ejí kángkáng,
ké nǎ, wo aa/nyii mě.
24Me n/chi n-raa dyicí dyimúmú kyi-kim ne kanong eyên echi,
ké nǎ, éshwân ee/wuri banet ḿbé ba/mû ba-kan n ba/fu,
mbé ba-némê e mě,
ne baa/kpógê kámbé.
Currently Selected:
Sâm 71: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
