Sâm 68
68
Okwan mú Oshê o/kpógê Byití
1Osówo mu o-bûu ng nensang o-chi banet-bushwôn emen ba-firi byiryibyiryi.
Banet ḿbé nyǐ mu o-sa ng kámbé kafâ ba-chêe ng ké bushú emen.
2Nyǐ mu o-ró ng kámbé ba-byí i
wǎ eringe nyí bufú budatugi arúkwâ.
Bambên atyém ba-rím m ké bushú-Osówo
wǎ eringe nyí burwan budanyange ké okwâ.
3Nké banchi kanong mbe ké bunyîn-dyityém,
ne mbe ba-jêe ng ké bushú emen.
Mbé mbe ké bunyîn-dyityém,
ne mbe ba-jêe ng ne ejá kyíbóng kyíbóng.
4Kwán n̂ ekwan ba-kye Osówo.
Kwán n̂ ekwan-akpee ba-kye dyizîn emen.
Chi n̂g kiǐfáng ba-tî ǎ nyǐ mú mu o-yú u [ké éfíbí.]
Dyizîn emen dyi-bángê e Óburúkpâbí.
Kyú n̂g ké bunyîn-dyityém ké bushú emen.
5Osówo mú mu o-kyú u ké kyise emen ńkyí ociring
mu o-tún n bwǎn-byibén,
ne mu o-ku ng banyǐnkú ké afaníkong.
6Nyǐ mu o-kyâ banet ḿbé ba*fí ne onet* kyise ńkyí badakyú,
ne mu o-sí ng bamgbokobá ba-firi ké byiko ebe ne bunyîn-dyityém.
Nké bambíri bunwa ne nyǐ ba-man ba-kyú ké kyibî-esí.
7Ô Osówo, ké nkéré a/sí banet eyên,
ne ké nkéré a/cen a-nyáng kyikim-dyikán,
8esí e/náng, ne bubóng bu/na omu,
ké nǎ, Osówo mú Sána ne mú Ézerel mu o-bâ.
9Wo a/chi omu o-na chwóó,
ne a/nap esí eyên nyí baryî ba/mû baa/man.
10Banet eyên ba/chi byise ebe ányi ké nyǐ.
Ké kanong eyên, wo a/kye banet-kyikpu ńkyí mbe ba-ryuu ng.
11Óburúkpâbí o/kye busa,
ne banyinyi chwóó ba/kúng bǎmpém ámbe ba/fu,
12batu ne bannwa byití ebe ba-kú ba-chêe ng.
Banyinyi ḿbé ké byise mbe ba-kyii ng ńkyí ba/koo ké byití.
13Ba/kám byěm ḿbyí ba/mee wǎ ámalê,
ḿbyí ba/cít kámbyí ne syílyíba,
ḿbyí abyibabang ebe nyi a-san n ne gûl mú onong onong.
Ebóng kyi/chi ne ben kyicê-banet ba-waa ké nkám-ebû ké dyicí-byití.
14Osówo mú o/rêe o-shwôm o/chi abíp a-róng
ké nkéré o/chi batu ba-firi byiryibyiryi ké kaku ńké Zámon.
15Baryên ḿbé kaku ńké Báshan baa*nwa eri*.
Nké ka/jê ne ecím-eku.
16Ebóng ńkyí wo a/bwom ké biǐtí-ecím-eku ámbyi a-tún kaku ńké Osówo ne ecábé,
ńké nyǐ o/cá o/fu, nyǐ o-kyú u.
Óburúkpâbí o/chi o-kyú ányi ne banyá.
17Óburúkpâbí [o-fím m ké Sána] o-bâ ké kyikit-ociring emen ne égot-bamútu emen ḿbé bubyî-orá budatut, ḿbé baryên baryên.
18Nyǐ mu o-yú u o-jâ kyíbóng kyíbóng,
o-yip ng bujê-banet-mgbokobá o-dim m ne mbé.
Nyǐ mu o-koo ng eyáré nyí bambíri bunwa ne nyǐ mbe ba-kyâ ǎ.
Osówo Óburúkpâbí o/chi o-kyú ányi.
19Kye n̂g Óburúkpâbí mú mu o-tû ng busông eten ké dyicí ké dyicí akpee.
Nyǐ nké mu Osówo mú mu o-nyii ng bě.
20Osówo mú eten mu Osówo mú mu o-nyii ng banet.
Nyǐ mu Osówo Óburúkpâbí eten mú mu o-fîm m bě ké bukyû.
21Ké ntûntû, Osówo o/chi o-sé banet-bushwôn emen ashí,
ne nyí banet ḿbé mbe ba-câ kashú ne byibî-akwóp ebe.
22Óburúkpâbí oo/raa o/fu,
me n/chi n-da-kúng banet-bushwôn enen ké Báshan m-bâ běn ne mbé.
Me n/chi n-fîm kámbé ké biǐríbíríbí-byikit-baya ḿbé baryên m-bwa ne mbé esim,
23eringe nyí ben ba/chi ba-cen ba-shwôm ké baróng ebe,
ne eringe bubyî enen budarû baróng ámbe
eringe nyí mbu bu-ryuu ng.
24Ô Osówo mú mu Otu ejí,
banet kángkáng baa/ri otáng-byití eyên mú a/kpógê,
mú mu o-nung ng o-câ ké kyikit eyên ńkyí ociring.
25Bankwân ane mbe ké kashú,
bankim ane mbe ké esim,
ne bwǎn-banyinyi mbe ké otyém ba-só ng byícícágé.
26Kye n̂g Osówo akpee ké ncibi mú banet emen.
Kángkáng banet ḿbé kyikû-Jekôp,
kye n̂g Óburúkpâbí akpee.
27Oshê-Běnjámin mú o/sîi o-shwôm mu o-bâ kashú,
ne batu-ashí ḿbé Júda ne banet ebe ba-nye,
ne batu-ashí ḿbé Zébélon ne Nafatályi ba-nye kámbé ké kyikû.
28Ô Osówo, tông busa eyên.
Busa ḿbú aa/yip
29ké kiǐtí-kyise-kyifen eyên echi ké Jerúsélem,
a-chi byěm ké dyishí eten,
ké kyikit ńkyí batu mbe ba-bâ ǒ ne eyáré.
[ 30Raa ne Éjip nyí nyi wǎ enyam-dyikán,
nyí nyi ké asín-byichí nyí bukô-kace.
Raa ne eshê nyí ee*nyît ǒ wo*
nyí nyi wǎ dyibóng-bampong ḿbé mbe ne bwǎn ebe
tete mbé kángkáng ba-tíngê kyísí ba-yárê ǒ akpuga ebe.
Chi banet ámbe ḿbé byití byidanyîn kámbé enwa ba-firi byiryibyiryi.]
[ 31Banet-kyitwóm] ba/chi ba-fím Éjip ba-bâ.
Banet ḿbé Sudân ba/chi ba-bêem abwô kyíbóng ba-fé nshwam ba-kye Osówo.
32Kángkáng batu ḿbé ejíí,
kwán n̂ ekwan ba-kye Osówo.
Kwán n̂ ekwan-akpee ba-kye Óburúkpâbí,
33ba-kye ǎ nyǐ mú mu o-yú u ké bubóng,
bubóng ḿbú bu/fím ne karé. Fwôo n̂g atông ba-jwo ǎ
ké mu o-nyán n ne kyirime ńkyí kyiryên kyiryên.
34Sét n̂g kyi-kim ne busa ḿbú Osówo
mú butu emen mbu ké Ézerel,
busa emen mbu kyíbóng.
35Bushî ḿbú Osówo odachi ké nkéré o-kú o-byí i ké kyikit-ociring emen boo*nwa eri*.
Osówo mú Ézerel mu o-kyâ banet emen bushwane ne busa.
Kye n̂g Osówo akpee.
Currently Selected:
Sâm 68: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
