Sâm 66
66
Okwan-Akpee ne Asǎma ekó
1Kángkáng banet bakye Osówo akpee ne ejá kyíbóng kyíbóng ne bunyîn-dyityém.
2Kwán n̂ ekwan-akpee nyí dyizîn emen.
Kye n̂g ǎ kiǐtí-akpee.
3Sét n̂g Osówo ba/fu,
byěm eyên ḿbyí amu a-chi i mbyi biǐtí kanong kanong.
Busa eyên ḿbú mbu bu-chi i banet-bushwôn eyên ba-tíngê kyísí ké bushî,
ké bushú eyên, bu/rêe bu-shwôm.
4Nang yeě ké ejíí mu o-fâ ǒ.
Mbe ba-kwán n ekwan-akpee ba-kyâ ǒ.
Mbe ba-kwán n akpee ba-kyâ dyizîn eyên.
5Bâ n̂g ba-ba-ri ńkyí Osówo oo/chi,
ba-ri biǐtí-byěm ḿbyí o/chi ké burwám-banet.
6Nyǐ o/yángê baya ḿbé baryên ba-firi esí nyí yéyé.
Banchí eten ḿbé kpákpá ba/nyáng baya ámbe ké byiká.
Ányi nké banet eten ba/jêe ké bubwô ńkyí nyǐ o/chi.
7Nyǐ mu Otu mú ne banyá ké busa emen,
ne mu o-tún n eshê nyí ké ejíí achi.
Banet ba*dachi ba-bírî bunwa ne nyǐ*.
8Eshê kángkáng ekye Osówo eten akpee.
Kyi/bát bajwo akpee enen nyí bamu ba-kyâ.
9Nyǐ oo/tî bě okpó,
ne o*da bě emîng byi-róng*.
10Osówo, wo aa/tî bě ké nkan.
Wo aa/kan bě wǎ eringe nyí okwâ odachi syílyíba o-firi kpárám.
11Wo aa/mîng bě byi-róng ké kaǎtám,
ne a/tû bě atû ké dyishí nyí nyi a-ró ng.
12Wo a/mîng banet-bushwôn eten ba-cím bě byiká ké byiko.
Be byi/shwôm ké kafâ-okwâ ne ké kiǐsúsú-baya.
Nké kántîk, aa/bê ne be ké kyikit ńkyí chwǒm kii*ta bě*.
13Me n/chi m-bâ ké kyise eyên ne eyáré nyí badashí.
Me n/chi n-yárê ǒ ńkyí n/ryí ǒ ocím.
14Me n/chi n-kye ǒ ńkyí n/fu,
n-kyâ ǒ ké nkéré m/mû ké afaníkong.
15Me n/chi n-kye etyítǎm ba-shí
ké kyikit ńkyí bada ǒ echi kyifen.
Me n/chi n-kúng batyép-bampong ne etúbû n-chi kyifen n-kye ǒ,
ne arúkwâ a/chi a-yú a-jâ kyíbóng.
16Kángkáng banet ḿbé mbe ba-shî ng Osówo,
bâ n̂g ba-ba-jwo,
ne me n/chi n-sét běn ńkyí nyǐ oo/chi o-kye mě.
17Me n/tii n-kó ǎ n/fu, ochwáp mě.
Me n/kye ǎ akpee ké ekwan.
18Â [byibî byi/mû mě ké dyityém,]
Óburúkpâbí o/mû oo*ba/chi o-fwôo atông o-jwo mě*.
19Nké ké ntûntû, Osówo oo/jwo mě.
Oo/fwôo atông ké nshwam ejí.
20Me mu n-kyâ Osówo akpee,
ké nǎ, nyǐ o*da/né nshwam ejí*
o-mîng mě nang kyijé emen ńkyí kii*man* etông*.
Currently Selected:
Sâm 66: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
