Sâm 63
63
Osówo eryuu
1Ô Osówo, wo nké amu Osówo ejí.
Me mu n-ryuu ng ǒ.
Kyirim-enyam-byiko ejí kángkáng nkyi kyi-ryuu ng ǒ.
Busun ejí mbu bu-ryuu ng ǒ
éné wǎ kiǐyéyé-esí nyí baryî ne omu byi*fí to*.
2Ké bubwô ámbu, me nn/kyé ǒ ké kyise eyên n/fu,
n-ri ng busa eyên ne busan eyên ḿbú ragerage.
3Kyijé eyên ńkyí kii*man* nkyi kanong kyi-shwôm dyikpen dyiyén,
ne ké bubwô ámbu, me n-kyâ ǒ akpee.
4Me n-kó ng ǒ asǎma tete m-kpú.
Me n-yip ng abwô ejí kyíbóng ké nshwam n-kye ǒ.
5Busun ejí bu/chi bu-ryí bu-zût,
ne me n/chi n-kwán ekwan-akpee ké bunyîn-dyityém n-kye ǒ.
6Me mu n-zîim m ǒ ké nkéré nn/rí sáre.
Me mu n-kabe ng kyi-kim ne wo buchú bumúmú,
7ké nǎ, wo kángkáng nkéré amu Onet-Ochwâp ejí.
Me mu ké ókpâ eyên,
n-kwán n ekwan ké bunyîn-dyityém.
8Me mu n-king ng m-bât ng ǒ ké byiko,
ne abwô eyên aa*bángê chwǒm kyi-ta mě*.
9Nké banet ḿbé mbe ba-kan n ba/fu,
mbé ba-ju ng mě, ba/chi ba-jâ ké oshê-bakúsí.
10Ba/chi ba-ju kámbé ké byití,
ne enyam e/chi e-ryí byikwóm ebe.
11Otu-oshê o/chi o-jêe,
ké nǎ, Osówo oo/chi ǎ o-kpógê banet-bushwôn emen.
Banet ḿbé ba/ryí ocím ké bushú-Osówo ba/chi ba-kye ǎ akpee.
Nké Osówo o/chi o-cít bansêt byisédéng ocím.
Currently Selected:
Sâm 63: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
