Sâm 57
57
Nshwam-Ochwâp
1Ô Osówo, ri mě bafip.
Ri mě bafip, ké nǎ,
me mu m-bâ n-kâm ǒ n/fu, ku mě.
Me mu n-rem m ké kiǐríribí-abyibabang eyên
tete byibî-afú nyí aryên a-mîng etugi.
2Me mu n-kó ng Osówo mú mu kyíbóng kyíbóng,
Osówo mú mu o-kyâ nang ebóng ńkyí mu n-ryuu ng.
3Nyǐ o/chi o-faa áku kyíbóng o-nyii mě.
Nyǐ o/chi o-kpógê banet ḿbé mbe ba-cít ng mě.
Osówo o/chi o-tông mě kyijé emen ńkyí kii*man*
ne o-chi ńkyí o/ryí ocím.
4Banet-bushwôn ejí ḿbé mbe wǎ ekpang
nyí nyi e-ryí i banet baa/wâng mě.
Asháng ebe nyi wǎ byíbye ne abán.
Bubyíbabang ebe mbu wǎ biininen-bushwám.
5Ô Osówo, tông baryên eyên ké bubóng
ne busa eyên ké ejíí emúmú.
6Banet-bushwôn ejí baa/nabe kaǎsém ńké bada mě ekám.
Bafip baa/man mě busa.
Mbé ba/sím dyibíng ké kiǐfáng ejí,
nké mbé ba/róng ké ndyí mbé bayén.
7Ô Osówo, dyityém ejí ndyi shwaneshwane.
Me n/chi n-kwán n-kye ǒ akpee.
8Busun ejí, jwóbê.
Dyícîng ejí ne égûm ejí, jwóbê n̂g.
Me n/chi n-chi óbyísû o-jwóbê.
9Ô Óburúkpâbí, me n/chi n-kó ǒ asǎma
n-kye ǒ akpee ké burwám-eshê nyí ee*nyît ǒ*.
10Kyijé eyên ńkyí kii*man* nkyi kyi-ribi ng bubóng.
Ochi eyên mú amu a-chi i ńkyí wo a/ryí ocím, mu o-ta ng ófíbí.
11Ô Osówo, tông baryên eyên ké bubóng
ne busa eyên ké ejíí emúmú.
Currently Selected:
Sâm 57: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
