Sâm 55
55
Nshwam mú Onet mú Ocín Emen o/chi ba-kám ǎ
1Ô Osówo, jwo nshwam ejí.
*Dabírî nshwam ejí esim*.
2Fwôo atông a-faa mě ojá.
Me nn/kyee ké afaníkong ejí.
3Me bushî boo/róng mě
ké achi nyí banet-bushwôn ejí mbe ba-pii ng mě,
ne ocît mú bambên atyém oo/shiryi mě.
Mbé mbe ba-bâ mě ne afaníkong.
Mbé mbe ba-sa ng kafâ ne me
ne nn*nyîn kámbé*.
4Me mu n-shî ng,
ne bushî ḿbú bukyû mbu bu-shiryi ng mě.
5Bushî ne banê bii/kám mě.
Bushî boo/shwôm mě busa.
6Â me m/mû ne abyibabang wǎ karúú,
me m/mû n/chi m-byí n-da-kyé kyikit n-jáng.
7Me m/mû m-byí i n-jâ tíbítíbí
n-da-chi kyise ńkyí ejí ké kyikim-dyikán.
8Me m/mû n-kyé ng kyikit-dyirem babap
ńkyí ndafem kyibî-afú nyí aryên.
9Ô Óburúkpâbí, chi ejá nyí banet-bushwôn ejí e-firi yógeyóge.
Me mu n-ri ng anwa ké oshê
10nyí nyi a-wâng ng kámú buchú ne esû,
a-chi kámú o-sú ne byibî ne afaníkong.
11Baa/bên byěm kángkáng byikit.
Banet ecít ne banet enîm bii/sú ké byiká-oshê.
12Â kyi/mû onet-bushwôn ejí nké mu o-fát ng mě kiikuku,
me m/mû n-cíp ng dyityém.
 kyi/mû onet mú o*fí ne me*
nké mu o-tông ng byiko ne me,
me m/mû n-rem m byiko eringe nyí oo*ri mě*.
13Nké nkyi wo, onet-byicen ejí
ne óten-onet-bǎmkpóngé ne ocín-dyityém ejí.
14Be byi/mû ne bǎmpém ḿbé bunyîn-dyityém ne barî,
ne byi/mû byi-fâ Osówo burwám ké kiǐtí-kyise-kyifen-Osówo echi.
15Kyi/bát banet-bushwôn ejí bakpú ne nkéré ebe o-kûfyi.
Kyi/bát bajâ kyísí bakpó ké oshê-bakúsí.
Byibî mbyi ké byise ebe ne ké atyém ebe.
16Nké me mu n-kó ng Osówo Óburúkpâbí n/fu, ochwáp mě.
Ne nyǐ o/chi o-nyii mě.
17Afaníkong ejí nyí mu n-sét ng ǎ ne dyibyê ejí mbyi byi-jâ kyíbóng byi-kâm ǎ ké dyicófóróng
ne ké esû ne ké buchú,
ne nyǐ o/chi o-jwo ejá ejí.
18Nyǐ o/chi o-fîm mě ké byití ḿbyí mu n-nwa ng ne bujê-banet-bushwôn ejí,
o-bwa ne me esim kerededet.
19Osówo mú mu Otu kyi-fím ne banyá o/chi o-jwo mě o-kpógê kámbé,
ké nǎ, mbé ba/né eyángê akpen ebe
ne ba*fí ba-shî ng ǎ*.
20Onet-byicen ejí ámu o/nwa ne bacín emen.
Nyǐ o/bên ocím emen mú nyǐ o/ryí.
21Byiraa emen byi/mû gogégogé byi-shwôm bafwám,
nké kafâ esa ka/mû ǎ ké dyityém.
Ejá emen e/mû nyangényangé e-shwôm bakút,
nké nyi e-két ng wǎ biininen-bushwám.
22Mîng Óburúkpâbí o-tû dyitû ńdyí afaníkong eyên,
ne nyǐ o/chi o-ku ǒ.
Nyǐ oo*mîng ba-kpógê banet ḿbé mbe ne atyém nyí ntûntû*.
23Nké wo,
ǎ Osówo, wo a/chi a-fé banju banet ámbe
ne bansêt byisédéng ámbe ké akun ebe ne kyicê-ací-dyikpen ebe a-kûman.
 mě me, me n/fé dyityém ejí ké wo.
Currently Selected:
Sâm 55: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
