Sâm 50
50
Osówo efé Ntûntû
1Osówo Óburúkpâbí mú o/rêe o-shwôm mu o-raa ng,
ne mu o-kó ng ejíí emúmú
kyi-fím ké kyicê ńkyí esû edabyí
tete kyi-ribi ké ńkyí edaríbî.
2Osówo mu o-san n ké Záyon,
oshê mú mu kerededet ké bunong emen.
3Osówo mú eten mu o-bâ,
nké o*fí o-bâ pyêppyêp*.
Kyibî-okwâ nkyi kyi-mang ng ǎ ké kashú.
Kyibî-bufú nkyi ǎ byicê byimúmú.
4Nyǐ mu o-kó ng bubóng ne esí wǎ bantûesé emen, o/fu,
bari eringe nyí nyǐ mu o-pan n banet emen mpan.
5Nyǐ o/raa o/fu, kpaa kángkáng banet ejí
ḿbé ba/fé atyém ebe ne me,
banet ḿbé ba/ryí ocím ne me
ba-sem dyizîn ejí ké kyifen ejí echi,
ba-bâ ba-kâm mě.
6Bubóng mbu bu-sét ng bu/fu,
Osówo mu o-chi i kanong,
ké nǎ, nyǐ oyén nké mu nkêt bampan.
7Banet ejí, fwôo n̂g atông,
ne me n/chi n-raa.
Me n/chi m-bwom mpan ne ben, ǎ Ézerel.
Me Osówo mú mu Osówo enen.
8Me n*fí m-bîn n běn ké bubwô-byifen enen ḿbyí bamu ba-chi i*
ne eyáré enen nyí byirim-enyam eshí ba-kyâ mě kángkáng nkéré*.
9Nang ké nkyi éné,
me n*fí n-ryuu ng bampong ḿbé mbe ba-fím m ké eshê enen*
nang etúbû nyǐ nyi e-fím m ké abóng-byitú enen*.
10Ké nǎ, kángkáng enyam nyí nyi ké dyikán
ne byitú ḿbyí mbyi ké égot-eku mbyi ḿbyí ejí.
11Kángkáng bunurung ne kángkáng byěm ḿbyí mbyi ne dyikpen
ḿbyí mbyi ké dyikán mbyi ḿbyí ejí.
12Â esong e/mû e-nwa ng mě,
me m/mû nn*sét běn*
ké nǎ, ejíí emúmú ne kángkáng byěm
ḿbyí mbyi ké nyǐ mbyi ḿbyí ejí.
13Me n-ryí i enyam-mpong dí,
n-jwáp nang baróng-ebû dí.
[ 14Kyi/bát asǎma ekó akyú běn kyifen ńkyí badachi ba-kye Osówo.]
Ba-kye to Osówo mú o/rêe o-shwôm kángkáng ḿbyí ba/ryí ocím.
15Kó n̂g mě ké nkéré afaníkong a-kú a-bâ.
Me n/chi n-nyii běn,
ne ben ba/chi ba-kye mě akpee.
16Nké Osówo mu o-sét ng mbên dyityém o/fu,
yeě o/kye ǒ busa ḿbú amu a-bún n byije ejí.
Kyi/cen nǎ ne wo a-kûraa kyi-kim ne ocím ejí
mú n/ryí ne banet ejí n-sem dyizîn ejí.
17Wo amu a-né ng a/fu,
wo aa*bángê mě n-tángê ǒ dyishí*.
Wo amu a-né ng byije ejí.
18Wo a/firi ocín-onet-kajii nang orá mú wo a/ri,
ne wo amu a-cen n ne banchi byinam.
19Wo aa/kpá byiko ḿbyí byibî-byiraa eraa kángkáng nkéré.
Wo aa*dá ké byisédéng esét*.
20Wo aa/kpá byiko ḿbyí adabât bwǎn-bané eyên kyiraa a/fu,
mbé ba/chi kyibî.
21Wo aa/chi ḿbyín kángkáng,
ne me n*da/raa chwǒm*.
Ké bubwô ámbu, wo a/kabe a/fu, me mu wǎ wo.
Nké kántîk, me mu n-raa ng ne wo,
ne mu n-chi i kyiraa ánkyi kyi-kyú ǒ wááng.
22Wo mú amu a-né ng mě, fwôo atông ké ńkyín,
â kyi*fí éné* me n/chi m-man ne wo,
ne onet oo*chi mú o/chi o-nyii ǒ*.
23Asǎma ekó nké nyi kyifen echi ńkyí nkyi kyi-kyâ mě ofê,
ne ké ntûntû, me n/chi n-nyii kángkáng banet
ḿbé mbe ba-chi i ńkyí n/sét.
Currently Selected:
Sâm 50: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
