Sâm 5
5
Nshwam-Obâm
1Ô Óburúkpâbí, fwôo atông a-jwo byiraa ejí.
2Osówo ejí ne Otu ejí, fwôo atông ké bukyû ejí
ḿbú mu n-tii ng n/fu, chwáp mě.
Ô Óburúkpâbí, me mu n-fâ nshwam n-kyâ ǒ.
3Wo amu a-jwo ng ejá ejí ké dyicófóróng.
Me mu n-fâ nshwam ké dyicófóróng m-bám m n/fu, faa mě ojá.
4Wo aa*chi Osówo mú byibî-byěm echi byida ǎ enyîn*.
Wo aa*ryuu kyibî nang kyibónge ké bushú eyên*.
5Wo aa*man ebwom a-ri bantông byiko*.
Kángkáng bambên atyém ba-sa ng ǒ kafâ.
6Wo amu a-man n ne kángkáng bansêt byisédéng
ne wo amu a-ciring ng banet-bakân ne bannîm banet.
7Nké ké bubwô-kiǐtí-kyijé eyên,
me m-man ebê ké kyise eyên.
Me m-man ǒ ekye ofê ké kiǐtí-kyise-kyifen eyên echi ńkyí ociring,
n-tíngê kyísí ké bushú eyên n-fé ǒ.
8Óburúkpâbí, me n/jê ne banet-bushwôn n-shwôm.
Tông mě eringe nyí ndachi ńkyí wo amu a-ryuu ng.
Chi bukwóp eyên wááng eringe nyí me ndacen.
9Baa*tî ké dyityém ne banyá ńkyí
banet-bushwôn ejí mbe ba-sét ng*.
Obên nké mbé mbe ba-ryuu ng.
Ejá ebe nyi e-nyîn n.
Nké ee/sú ne kyibî-kaǎnínǐm.
10Ô Osówo, két mpan o-bên kámbé a-kye kámbé busông.
Kyi/bát ḿbyí mbé mbe ba-nam m byicen kámbé ne bukyû.
Ró kámbé ba-dim ké bushú eyên ké bubwô-byibî ebe ḿbyí byi/jê
ne ké bunwa ḿbú mbé ba/bírî ne wo.
11Nké kángkáng banet ḿbé ba/rem ké busi eyên ba/chi ba-jêe.
Mbé kángkáng nkéré ba/chi ba-kwán ekwan ké bunyîn-dyityém.
Ku banet ḿbé wo amu a-jê ng kámbé.
Mbé mbe ké bunyîn-dyityém ḿbú ntûntû ké bubwô eyên.
12Óburúkpâbí, wo amu a-jware ng banet
ḿbé mbe ba-chi i ńkyí wo a/sét.
Kyijé eyên nkyi kyi-ku ng kámbé wǎ kiinku byiko.
Currently Selected:
Sâm 5: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
