Sâm 45
45
Okwan-Dyibé ńdyí Otu
1Bunyîn-ejá bu/sú mě ké dyityém ejí
eringe nyí mu n-kwán n okwan mún n-kye otu.
Kabyíbabang ejí kaa/kpá byiko ḿbyí okwan
wǎ kachí-nwet ńké mman esáng nwet.
2Wo amu a-nwa ng bunong a-shwôm kángkáng banyinchéng.
Wo amu a-nyîn n ejá.
Osówo oo/jware ǒ kángkáng nkéré.
3Otu mú o/rêe o-shwôm, bwá kashwám eyên ké osín.
Wo amu kiǐtí ne busa.
4Yú ké busa a-da-kpógê
eringe nyí adanyii ńkyí nkyi ntûntû ne [ńkyí acît a*fí*.]
Busa eyên bu/chi bu-chi ǒ a-kpógê byití ḿbyí byiryên.
5Abán eyên nyi a-nen n.
Nyi a-tím m atyém nyí banet-bushwôn eyên.
Eshê e-myii ng ǒ ké byiká.
[ 6Kyibám-butu ńkyí Osówo oo/kye ǒ] kyi/chi kyi-waa ne banyá ne banyá.
Wo amu banet eyên otu mú oo*ryí acît*.
7Chwǒm ńkyí nkyi kyinong nké kyida ǒ ejê,
ńkyí nkyi kyibî kyi-sa ng ǒ dyityém.
Ké bubwô ámbu nké Osówo mú mu Osówo eyên oo/cá ǒ,
ne oo/fé ǒ bunyîn-dyityém ké byiko
bu-jê bu-shwôm ḿbú otu nang orá.
8Kyinung-burwan ḿbú badakó mîi
ne ḿbú badakó álos nkyi ǒ ké byídí.
Bankim ane mbe ba-tî ng ǒ ké bunyîn-dyityém
ké kyibám eyên ńkyí ba/nap ne asháng-eshwa.
9Bwǎn-batu ḿbé banyinyi mbe ké burwám-ásé
nyí nyi a-kyâ ǒ ofê.
Onyi eyên mu ǒ cip ké kyicê-bubwô-etyebéng eyên
ne byibwáng-gûl mú o/nwa o-shwôm ké byiko.
10Onyi-ofyîfî mú otu,
fwôo atông a-jwo ńkyí mu n-sét ng.
Ráp banet eyên ne bwǎn-bané eyên.
11Bunong eyên bu/chi bu-chi otu o-kû ǒ eryuu.
Nyǐ nké mu bonchí eyên,
ké bubwô ámbu, a-man a-chi ńkyí nyǐ o/sét ǒ.
12Banet ḿbé Táya ba/chi ba-bâ ǒ ne eyáré.
Banfang-banet ba/chi ba-kan eringe mbé bada ǒ echi kyi-kû ǒ enyîn ne mbé.
13Wǎn-otu mú onyinyi mu ké kyibám-otu.
Nyǐ mu o-nwa ng bunong kanong kanong.
Ba/chi ewuryi emen ké bacat-gûl.
14Nyǐ o/fé ewuryi nyí enong enong,
ba-sí ǎ ne bacín emen ké kyikû o-kâm otu.
Ba/yip to bacín emen ba-kâm otu.
15Mbé ba/banung ké ócâm-otu ne bunyîn-dyityém ne ojêe.
16Wo, otu ejí, a/chi a-já bwǎn-banyinchéng chwóó
ḿbé ba/chi ba-kúng kyikit ńkyí banchí eyên ḿbé kpákpá wǎ batu,
ne wo a/chi a-chi kámbé batu ḿbé [ejíí emúmú.]
17Okwan ejí o/chi o-chi dyizîn eyên dyi-waa ne banyá,
ne kángkáng banet ba/chi ba-kye ǒ akpee
ké kángkáng nkéré mú mu o-bâ.
Currently Selected:
Sâm 45: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
