Sâm 40
40
Okwan-Akpee
1Me m/bám kanong kanong n/fu,
ochwâp mú Óburúkpâbí obâ.
Nyǐ o/jwo mě, o-jwo to bukyû ejí ḿbú mu n-tii ng.
2Nyǐ o/tut mě o-fîm ké kyibî-dyibíng,
o-fîm mě ké dyibíng-bukyû ńdyí biǐntóng biintong.
Nyǐ o/yip mě o-twôom kanong ké buká,
o-chi mě n-fem.
3Nyǐ o/tángê mě n-kwán okwan mú ofyîfî,
okwan-akpee mú ndakye Osówo eten.
Banet chwóó ḿbé ba/ri ńkyín ba/chi ba-firi ké bushî,
ne mbé ba/chi ba-tî atyém ebe ké Óburúkpâbí.
4Bunyîn-dyityém mbu ne onet mú o*fí o-bírî ng o-kâm erím-bakye*
o-kâm nang banet ḿbé mbe ba-fâ esówo nyí e*fí ké kafâ*
nké mu o-tî ng dyityém emen ké Óburúkpâbí.
5Osówo Óburúkpâbí eten, wo aa/chi byěm chwóó a-kye bě.
Wo a*fí ne nkan-onet*.
Wo aa/kabe biǐtí-byěm chwóó a-tî bě.
Me mm*man eraa kyi-kim ne mbyí kángkáng*
ké nǎ, mbyí byi/jê byi-shwôm.
6Wo a*fí a-ryuu ng a/fu,
bakûchi byifen ba-kyâ ǒ* nang eyáré ekye*.
Wo a*da/bí a/fu, bakûshí byirim-byitú byimúmú ké kyikit-kyifen eyên echi*
nang byifen echi ḿbyí byidafîm byibî*.
Nké wo a/bwa a-kye mě atông nyí nda ǒ ejwo.
7Ké bubwô ámbu kâng,
n/faa n/fu, dǐi me nyín i.
[Byěm ḿbyí amu a-ryuu ng a/fu,
me nchi, ba/sáng kámbyí ké Nwet-Byije-Músis.]
8Osówo ejí, nkyi kyi-nyîn n mě echi ńkyí amu a-ryuu ng.
Me mu n-fâ ńkyí amu a-tángê e mě ké dyityém ejí.
9Óburúkpâbí, me mm/pem ké ncibi mú kángkáng banet eyên n/fu, wo a/nyii bě.
Wo amu a-nyît ng a/fu,
me mm*ba/chi m-mîng kánkyí esét*.
10Me n*da/mîng bǎmpém kyi-kim ne onyii mú wo a/nyii bě ba-waa ne me*.
Me mm/pem kángkáng nkéré kyi-kim ne ochwâp eyên mú oo*man*.
Me n*da/cíbî ne pyêp*
ké ncibi mú banet eyên kángkáng*
ké osêt kyi-kim ne ochwâp eyên
ne kyijé eyên ḿbyí bii*man*.
11Óburúkpâbí, me mu n-nyît ng n/fu,
wo aa*ba/chi a-mîng mě bafip eri*.
Kyijé eyên ne ochwâp eyên bii*bángê chwǒm kyi-ta mě ne banyá*.
Nshwam-Ochwâp
(Sâm 70)
12Afaníkong chwóó aa/wâng mě.
Aa*nwa epan*.
Byibî ejí bii/shwôm mě busa,
ne n*fí to n-rángê e*.
Mbyí bii/jê byi-shwôm eji nyí nyi mě ké dyishí.
Bii/jwâa mě asa.
13Óburúkpâbí, nyii mě.
Chwáp mě kántîk.
14Kyi/bát Osówo okpógê o-byiryi banet ḿbé mbe ba-kan n ba/fu, mbé ba-ju ng mě.
Kyi/bát Osówo oró banet ḿbé mbe ba-jêe ng ké afaníkong ejí,
o-wuri kámbé éshwân.
15Kyi/bát okpóge mú Osówo o/kpógê banet ḿbé mbe ba-fât ng mě kiikuku ochi kámbé ba-waa ocím ké dyishí fúú.
16Kyi/bát kángkáng banet ḿbé mbe ba-bâ ba-kâm ǒ bajêe ne bunyîn-dyityém.
Kyi/bát kángkáng banet ḿbé mbe ba-kó ng ǒ asǎma ké onyii eyên bakûraa ba/fu,
Óburúkpâbí o/rêe o-shwôm.
17Óburúkpâbí, me busa bu*fí mě*
chwǒm kyi*fí mě*.
Nké wo a*da mě eráp ne*.
Wo a-chi i Osówo ejí ne Onet-Onyii ejí.
Bâ babap a-chwáp mě.
Currently Selected:
Sâm 40: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
