Sâm 35
35
Nshwam-Ochwâp
1Óburúkpâbí, né banet ḿbé mbe ba-né ng mě.
A-nwa ne banet ḿbé mbe ba-nwa ng ne me.
2Yip édem eyên ne byidóng-byití eyên a-ba-nyii mě.
3Yip kyíbye eyên ne kashwám eyên a-nwa ne banet ḿbé mbe ba-nwa ng ne me.
Sét mě a/fu, wo a/chi a-nyii mě.
4Kyi/bát bakpógê banet ḿbé mbe ba-kan n ba/fu,
mbé ba-ju ng mě,
ba-wuri kámbé éshwân.
Kyi/bát banet ḿbé mbe ba-nam m mě dyiju bafiri yógeyóge ba-pín esim.
5Kyi/bát bafiri wǎ boǒmpwǎt-esang-byichí
nyí afú nyi a-tugi ng a-pwó ng
ké nkéré orím-Óburúkpâbí o-kú o-nwa ng ne mbé.
6Kyi/bát kiǐfáng ebe kyiróng kyifip
ne kyi-firi tyebetyebe
eringe orím mú Óburúkpâbí odakpet kámbé o-twóp kyísí.
7Mbé ba/kuu kaǎtám ba-tî mě,
ba-sím dyibíng ba/fu, mbé ba-kám m mě,
chwǒm ńkyí n/chi kyi*fí*.
8Nké bukyû bu/chi bu-kám kámbé ne mbé ba-kûnyît kámbú.
Kaǎtám ebe ka/chi ka-kám kámbé mbé bayén,
ne ba/chi ba-róng ké bukyû ebe.
9Me kâng n/chi n-kyú ké bunyîn-dyityém
ké bubwô ḿbú Óburúkpâbí.
Me n/chi n-kyú ké bunyîn-dyityém,
ké nǎ, nyǐ oo/nyii mě.
10Me n/chi n-sét Óburúkpâbí ne dyityém ejí kángkáng n/fu,
onet o*fí mú mu wǎ wo*.
Wo amu a-nyii ng banet ḿbé busa bu*fí*
ké abwô nyí banet ḿbé mbe ne busa,
ne amu a-nyii ng banet-kyikpu
ké abwô nyí banet ḿbé mbe ba-cít ng kámbé.
11Byibî-banet mbe ba-bwom m ntûesé-kyisédéng ba-bât ng mě.
Mbé mbe ba-bât ng mě byibî-byěm
ḿbyí n*fí n-nyît ng kyi-kim ne mbyí*.
12Me n/chi kámbé kanong, mbé ba-chi mě kyibî,
ne asa aa/man mě.
13Nké ké nkéré mbé ba/mû ba-rwôm m,
me m/bwá byídí-dyikán eta.
Me n/né byiryíng eryí.
Me n/tíngê dyishí ejí kyísí n-fé nshwam,
14wǎ mu n-fâ nshwam ké bubwô-ocín ejí ne wǎn-boné ejí.
Me n/cen ké dyikán eta éné wǎ onet mú mu o-ta ng dyikán ńdyí boné emen.
15Nké mbé kángkáng ba/mû ké bunyîn-dyityém
ké nkéré me m/mû ké afaníkong.
Mbé ba/cibi kyikit kyibónge eringe bada mě ejwó.
Bacinbánet baa/waa mě ké byimirî emín.
16Mbé ba/tún mě achi ne busa-dyityém
éné [wǎ banet ḿbé badafát nkwa kiikuku.]
17Óburúkpâbí, wo a-chî ng etún otûn ótun ka-rí nǎ.
Nyii mě ké bunwa ebe ḿbú mbe ba-nwa ng ne me.
Nyii dyikpen ejí ké abwô nyí ekpang ńnyín.
18Ne me kâng n/chi n-kó ǒ asǎma ké ncibi mú banet eyên.
Me n/chi n-kye ǒ akpee ké bushú ebe kángkáng.
19*Damîng banet-bushwôn ejí
ḿbé bansêt byisédéng ba-jêe kyi-kim ne dyikpóge ńdyí ba/kpógê mě*.
*Damîng banet ḿbé mu n-sa ng kámbé kafâ dyikáá ba-jwó ké bunyîn-dyityém kyi-kim ne bafip ejí*.
20Mbé ba*fí ba-raa ng byiraa ké bukwóp ḿbú bunong*.
Nké mbe ba-rim m ne kángkáng azong-byisédéng kyi-kim ne banet ḿbé bunyîn-dyityém budanyîn kámbé.
21Mbé mbe ba-sét ng byěm ba-bât ng mě ne ejá kyíbóng kyíbóng ba/fu,
be byi/ri ńkyí wo a/chi.
22Ô Óburúkpâbí, wo aa/ri ńkyín.
Ké bubwô ámbu, ǎ Óburúkpâbí,
*dacíbî pyêp*.
*Datî byiko eyên tete*.
23Ô Óburúkpâbí, bûu a-ku mě.
Osówo ejí, bûu a-bwom mě ntûesé ejí.
24Ô Óburúkpâbí, wo amu a-chi i kanong.
Ké bubwô ámbu, sét a/fu, me n*da/chi kyibî*.
*Damîng banet-bushwôn ejí ba-jêe ké dyishí ejí*.
25*Damîng kámbé ba-kûkabe ba/fu,
be bii/man ne nyǐ*
ńkyí ányi nké byi/mû byi-ryuu ng*.
26Kyi/bát bakpógê banet ḿbé mbe ba-jêe ng kyi-kim ne busông ejí
ba-chi kámbé ba-firi yógeyóge.
Kyi/bát éshwân ne edángé ecít banet ḿbé mbe ba-sét ng ba/fu,
mbé mbe kanong ba-shwôm mě.
27Kyi/bát banet ḿbé mbe ba-ryuu ng ba/fu, mpan onwa mě,
ba-raa ng ba-bírî ng ne ejá kyíbóng kyíbóng
ké bunyîn-dyityém ba/fu,
Óburúkpâbí oo/rêe o-shwôm.
Kanong ekyú ńké ḿgbán emen nke ka-nyîn n ǎ dyityém.
28Me kâng n/chi n-sét kyi-kim ne mpan eyên
mú amu a-két ng ntûntû,
ne n/chi n-kye ǒ akpee ké kyirim-dyicí.
Currently Selected:
Sâm 35: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
