Sâm 34
34
Akpee nyí Kanong ńké Osówo
1Me mu n-kó ng Óburúkpâbí asǎma kángkáng nkéré.
Me mm*ba/chi m-mîng ǎ ekpee*.
2Me m-kpee ng ǎ ké ńkyí nyǐ oo/chi.
Ben kángkáng mú bamu ké busông, jwo n̂g ba-jêe.
3Chwáp n̂g mě esét kyi-kim ne eringe nyí Óburúkpâbí o/rêe.
Bâ n̂g byi-cibi byi-kpee dyizîn emen.
4Me n/fé nshwam n-kye Óburúkpâbí.
Nyǐ o-faa mě.
Nyǐ o/nyii mě ké kángkáng bushî ejí.
5Banet-busông mbe ba-bírî ng ba-tún ǎ
ne ba-firi ké bunyîn-dyityém.
Mbé kii*waa kámbé kyísí dyikáá*.
6Banet ḿbé nchíchwábáng o*fí kámbé* mbe ba-kó ng Óburúkpâbí,
ne nyǐ mu o-faa ng kámbé.
Nyǐ mu o-nyii ng kámbé ké kángkáng afaníkong ebe.
7Orím mú Óburúkpâbí mu o-bám m banet ḿbé mbe ba-shî ng Óburúkpâbí,
ne mu o-fîm m kámbé ké afaníkong.
8Wo oyén kyé a-ri eringe Óburúkpâbí mu kanong.
Bunyîn-dyityém mbu ne onet mú o/ri kyikit-dyirem ne Óburúkpâbí.
9Kángkáng banet-Óburúkpâbí, shî n̂g Óburúkpâbí.
Banet ḿbé mbe ba-shî ng ǎ mbe ne kángkáng byěm ḿbyí mbé mbe ba-ryuu ng.
10Nang ekpang, byiryíng mbyi byi-kaa ng kányí.
Nké chwǒm ńkyí kyinong nang kyibónge kii*kaa banet ḿbé mbe ba-chi i ńkyí Óburúkpâbí o/sét*.
11Bâ n̂g, ǎ bwǎn ejí, ba-fwôo atông ba-jwo mě,
ne me n/chi n-tángê běn ba-kûshî Óburúkpâbí.
12Kyi-nyîn n ǒ ńkyí adakyú ké bunyîn-dyityém dí.
Amu a-ryuu ng dyikpen chwóó ne bunyîn-dyityém dí.
13Ehê, éné mîng byibî-byiraa ne byisédéng esét.
14Mîng byibî-byěm a-kûchi kanong.
Kûryuu bunyîn-dyityém a-kan kanong kanong eringe nyí adakyú ne mbú.
15Óburúkpâbí mu o-tún n banet ḿbé mbe ba-chi i kanong,
ne nyǐ mu o-jwo ng bukyû ebe ḿbú mbe ba-tii ng.
16Nké nyǐ mu o-ciring ng banet ḿbé mbe ba-chi i byibî,
ḿbyí nang banet ebe mbe ba-ráp ng kámbé.
17Óburúkpâbí o-jwo ng dyikô ńdyí banchi kanong.
Nyǐ mu o-nyii ng kámbé ké afaníkong ebe kángkáng.
18Óburúkpâbí mu fáráng ne banet ḿbé asa aa/jwâa kámbé.
Nyǐ mu o-nyii ng banet ḿbé ba*da/chîtî okabe*.
19Onet mú onong o-ri ng afaníkong chwóó.
Nké Óburúkpâbí o-nyii ng ǎ ké nyǐ kángkáng.
20Óburúkpâbí oo*bángê chwǒm nang kyibónge kyi-ta onet mú onong*.
Kyikúú emen nang kyibónge kii*sêe*.
21Byibî byi-ju ng bambên atyém.
Óburúkpâbí o/chi o-kye banet ḿbé banchi kanong badasa kámbé kafâ busông.
22Óburúkpâbí o-nyii ng bǎmgbán emen.
Banet ḿbé mbe ba-câ ba-kâm ǎ,
o/chi o-pan mpan o-nwa kámbé.
Currently Selected:
Sâm 34: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
