Sâm 33
33
Okwan-Akpee
1Ben kángkáng mú bamu ba-chi i kanong,
jêe n̂g ké ńkyí Óburúkpâbí oo/chi.
Ben kángkáng mú bamu ba-chi i ńkyí nyǐ o/sét, kpee n̂g ǎ.
2Kim m̂ ácîng ba-kó Óburúkpâbí asǎma.
Kim m̂ ácîng ba-kwán ekwan ba-kye ǎ.
3Kwán n̂ okwan mú ofyîfî ba-kye ǎ.
Kim m̂ ácîng kanong kanong,
ba-kwán kyíbóng kyíbóng.
4Ejá nyí Óburúkpâbí nyi ntûntû
ne kángkáng bǎmkpóngé emen o/chi kámbé ne dyityém emen.
5Banet ḿbé mbe ba-chi i kanong ne baa*ryí acît* ba-jê ng Óburúkpâbí.
Kyijé ńkyí Óburúkpâbí nkyi pwat ké ejíí kángkáng nkéré.
6Óburúkpâbí o/chi bubóng ké busa-ejá emen.
O/chi óbyísû ne otukáku ne ékpére ké ejá emen.
7Nyǐ o/kpaa kángkáng buce o-tî kyikit kyibónge
o-kpaa baya o-fín ké kafâ-banfût emen kyísí.
8Ejíí emúmú, shî n̂g Óburúkpâbí.
Kángkáng banet ḿbé ké ejíí, shî n̂g ǎ.
9Ké ejá emen nké nyǐ o/chi ejíí
ne kángkáng byěm ḿbyí mbyi ké nyǐ.
10Óburúkpâbí o-bên n okabe mú banet-ejíí.
Oo*bángê kámbé ba-chi eringe nyí ba/nam*.
11Nké okabe mú Óburúkpâbí o-waa ng ne banyá,
o*fí ne nkuli kyikû*.
12Bunyîn-dyityém mbu ne oshê mú Osówo ebe mu Óburúkpâbí.
Bunyîn-dyityém mbu ne banet ḿbé Óburúkpâbí o/cá kámbé.
13Óburúkpâbí mu áku kyíbóng o-ri ng kángkáng banet kyísí.
14Áku ké kyikit ńkyí nyǐ mu Otu nké mu o-ri ng kángkáng banet ḿbé mbe ké ejíí.
15Nyǐ nké mu o-chi i kángkáng atyém ebe
ne mu o-nyît ng kángkáng byěm ḿbyí mbé mbe ba-chi i.
16Otu oo*kpógê byití ké bubwô-bannwa byití emen ḿbé mbe ne busa*.
Nnwa byití oo*kpógê byití ké bubwô-busa ḿbú nyǐ mu ne mbú*.
17Bubyî-orá ḿbú byití enwa boo*chwáp ké byití ekpógê*.
Kiǐtí-busa ebe kii*man echwáp*.
18Óburúkpâbí o-bám m banet ḿbé mbe ba-shî ng ǎ,
o-bám m banet ḿbé mbe ba-tî ng dyityém ké kyijé emen ńkyí kii*man*.
19Óburúkpâbí mu o-nyii ng kámbé ké bukyû,
mu o-nen n kámbé ké kyifang.
20Be byimu byi-tî ng achi ké Óburúkpâbí.
Nyǐ nké mu bě Onet-Onyii ne Onet-Ochwâp.
21Be byimu ké bunyîn-dyityém ké bubwô emen.
Be byimu byi-fâ dyityém ké dyizîn emen ńdyí dyinong.
22Óburúkpâbí, kyi/bát kyijé eyên ńkyí ne banyá kyikyú ne be
eringe nyí byimu byi-tî ng achi ké wo.
Currently Selected:
Sâm 33: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
