Sâm 28
28
Nshwam-Ochwâp
1Ô Óburúkpâbí, mú mu o-bám m mě, me mu n-kó ng ǒ.
Fwôo atông a-jwo bukyû ejí.
Me n/chi n-kyú ké burwám-banet ḿbé ba/jé ké oshê-bakúsí,
â wo a*da mě efaa ojá*.
2Jwo mě ké nkéré nn/tii bukyû n-kó ǒ n/fu, chwáp mě,
ké nkéré mm/bêem abwô ejí kyíbóng
ké kiǐtí-kyise-kyifen eyên echi ńkyí ociring.
3*Dakét mpan o-bên mě ne bambên atyém*
ḿbé mbe banet ḿbé mbe ba-chi i byibî-byěm*
ḿbé ejá ebe nyi e-nyîn n*
nké mbe ne busa-dyityém ké atyém ebe*.
4Kye kámbé busông ké ḿbyí mbé baa/chi,
ne ké byibî ebe ḿbyí mbé baa/chi.
Kye kámbé busông ké kángkáng byěm ebe ḿbyí mbé baa/chi.
Kye kámbé ńkyí kyi/kwárê ne mbé.
5Mbé ba*fí ba-kérê ng kyi-kim ne ńkyí Óburúkpâbí oo/chi*
nang kyi-kim ne bǎmkpóngé emen*.
Ké bubwô ámbu, nyǐ o/chi o-kye kámbé busông,
o-man ne mbé ne banyá.
6Kye n̂g Óburúkpâbí akpee.
Nyǐ oo/jwo bukyû ejí ḿbú mu n-tii ng n/fu, ochwáp mě.
7Óburúkpâbí mu o-bám m mě,
ne o*fí o-bángê e chwǒm kyi-ta mě*.
Me n/tî dyityém ne nyǐ.
Nyǐ mu o-kyâ mě ochwâp,
o-chi i mě n-kyú ké bunyîn-dyityém.
Me mu n-kyâ ǎ akpee ne ekwan nyí bunyîn-dyityém.
8Óburúkpâbí o*fí o-bángê e chwǒm kyi-ta banet emen*.
Nyǐ mu o-bám m [Otu] emen mú o/cá,
ne mu o-nyii ng ǎ.
9Óburúkpâbí, nyii banet eyên.
Jware banet ḿbé mbe ḿbé eyên.
Kyú kámbé wǎ mbâm ebû,
a-bám kámbé ne banyá.
Currently Selected:
Sâm 28: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
