Sâm 25
25
Nshwam ké Nkéré-Ofene
1Ô Óburúkpâbí, wo nké mu n-fâ nshwam ejí n-kyâ ǒ.
2Me n/tî dyityém ké wo mú amu Osówo ejí.
*Dabángê ba-fé mě éshwân*.
*Dabángê banet-bushwôn ejí ba-jêe ké orông ejí*.
3Baa*kpógê banet ḿbé ba/fé dyityém ne wo*.
Nké ba-kpógê ng banet ḿbé kii*sóng kámbé ebírî bunwa ne wo*.
4Ô Óburúkpâbí, tông mě biǐfáng eyên.
Chi mě n-nyît kámbyí.
5Tángê mě eringe nyí ndacen ké kiǐfáng eyên ńkyí ntûntû,
ké nǎ, wo nké amu Osówo ejí mú mu o-nyii ng mě.
Me mu n-fâ dyityém ne wo kángkáng nkéré.
6Ô Óburúkpâbí, zîim dyityém ecángê eyên
ne kyijé eyên ńkyí kii*man*
ḿbyí aa/tông kyi-fím ké nkéré mú o/shwôm ké esim.
7Pwoo mě ké byibî ejí ne byěm ejí ḿbyí n*da/man echi ne dyikwá*.
Óburúkpâbí, zîim mě ké bubwô ḿbú kanong eyên
ne kyijé eyên ńkyí kii*man*.
8Óburúkpâbí mu o-tángê e banchi byibî kiǐfáng ńkyí mbé badacen,
ké nǎ, nyǐ mu o-chi i kanong ne o/nwa dyityém.
9Nyǐ mu o-tông ng banet ḿbé mbe degere kiǐfáng ńkyí ntûntû,
ne mu o-tángê e kámbé ńkyí nyǐ mu o-ryuu ng.
10Nyǐ mu o-tông ng kángkáng banet ḿbé mbe ba-tî ng byije emen
ne ocím mú nyǐ o/ryí ne mbé ba-sem byiko emen biǐfáng,
oo*kyee ne kyijé ńkyí kii*man*.
11Óburúkpâbí, tî ocím eyên mú a/ryí,
a-pwoo mě byibî ejí,
ké nǎ, mbyí byi/jê chwóó.
12Banet ḿbé mbe ba-chi i ńkyí Óburúkpâbí o/sét ba/chi ba-kwâa kiǐfáng ńkyí mbé badacen ne nyǐ.
13Mbé ba/chi ba-já byěm kángkáng nkéré,
ne esí e/chi e-firi nyí bwǎn ebe.
14Óburúkpâbí o-ryí i bucín ne banet ḿbé mbe ba-chi i ńkyí nyǐ o/sét,
ne mu o-tî ng ocím emen mú nyǐ o/ryí ne mbé o-sem byiko emen.
15Me mu n-tî ng Óburúkpâbí achi kángkáng nkéré n/fu,
ochwáp mě,
ne nyǐ mu o-nyii ng mě ké ofene.
16Óburúkpâbí, bírî a-kâm mě a-ri mě bafip,
ké nǎ, me mu kǎnchí ne mu kyeekyee.
17Fîm mě ké káryúryú ejí,
a-nyii mě ké kángkáng afaníkong ejí.
18Kabe kyi-kim ne bafip ne afaníkong ejí,
a-pwoo mě ké byibî ejí kángkáng.
19Ri to eringe banet-bushwôn ejí ba/jê.
Ri eringe busa-dyityém ebe ne me bu/jê.
20Ku mě a-nyii mě.
*Dabángê ba-kpógê mě*.
Me m/bê n-kâm ǒ eringe nyí ndafem.
21Kyi/bát [kanong eyên ne ntûntû eyên] byitî mě kanong,
ké nǎ, me n/tî dyityém ké wo.
22Ô Osówo, nyii banet-Ézerel eyên ké kángkáng afaníkong ebe.
Currently Selected:
Sâm 25: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
