Sâm 22
22
Bukyû etii ne Okwan-Akpee
1Osówo ejí, ebóng ńkyí wo aa/mîng mě.
Me nn/tîm ǒ arông ne bayit n/fu, chwáp mě.
Nké ochwâp eyên o*fí o-bâ*.
2Osówo ejí, me mu n-kó ng ǒ ne esû.
Nké wo a*fí a-faa ng mě ojá*.
Me mu n-kó ng ǒ to ne bushú, dyijâng dyi*fí*.
3Wo nké ba/kúng ǒ butu.
Wo kǎnchí nké amu kanong.
Wo nké banet-Ézerel mbe ba-kpee ng.
4Wo nké banchí eten ḿbé kpákpá ba/tî dyityém ebe.
Mbé ba/tî atyém ké wo,
ne wo a/nyii kámbé.
5Mbé ba/kó dyizîn eyên,
ne wo a/chi kámbé ba-fem.
Mbé ba/tî dyityém ké wo,
ne kyi*da/waa kámbé kyísí*.
6Nké me n*fí to onet*.
Me n/firi bunyabang ḿbú boo*nyîn banet dyityém*.
7Kángkáng banet ḿbé mbe ba-ri ng mě mbe ba-fát ng mě kiikuku.
Ba-raa ng ocím ne me ba-ninge e ashí.
8Ba-raa ng ba/fu,
wo a/tî dyityém ké Óburúkpâbí,
ebóng Óburúkpâbí oo*nyángê ǒ*.
 wo a-nyîn n Óburúkpâbí,
ebóng ńkyí nyǐ o*fí o-chwáp ng ǒ*.
9Óburúkpâbí, wo nké a/chwáp ne ba-fwon mě.
Wo nké a/nyii mě ké afaníkong ké nkéré m/mû ké abwô.
10Me nn/tî dyityém ké wo kyi-fím ne dyikwá.
Wo aa/kyú Osówo ejí kyi-fím ké nkéré m/mû ké abwô.
11*Da mě ekyú tete* ké nǎ, afaníkong nyi fáráng.
Onet nang obónge o*fí mú oda mě echwáp*.
12Banet-ociring baa/wáp mě ba-fé ké kafâ wǎ biinyinyǎm.
Mbé kángkáng mbe mě byicê byimúmú
wǎ biinyinyǎm ḿbyí byi/fím oshê mú Báshan.
13Ba-jaa ng ecím ba-ját ng mě asháng ké byiko ba-fém m wǎ ekpang.
14Busa ejí boo/man.
Boo/man éné wǎ omu mú ba/pwó kyísí.
Byikúú ejí kángkáng bii/zóngê.
Dyityém ejí dyi/firi éné wǎ burwan nké mbu bu-nyange e mě ké kafâ.
[ 15Omiríng] ejí oo/jwóm éné wǎ édúkǎndú,
ne kabyíbabang ejí kaa/lák ké biǐnzóngé.
Wo a/fu, me nwaa ké édúkǎndú m-kpú.
16Bujê-banet-byibî ba/wâng mě,
ba-tín n ba-fárâng ng mě wǎ bubyî-kyifún.
Mbé [mbe ba-ját ng] mě byiká ne abwô.
17Byikúú ejí kángkáng byi/firi kyíjí.
Banet-bushwôn ejí ba/mé mbe ba-tún n mě.
18Mbé baa/kyii barî byídí ejí ké dyímám etwóp.
19Óburúkpâbí, *da mě ebwom cát*.
Onet-Onyii ejí, bâ babap a-chwáp mě.
20Óburúkpâbí, *dabángê ba-kpet mě ba-ju*.
*Dabángê bubyî ḿbún bu-man dyikpen ejí*.
21Nyii mě ké abwô nyí byibî-ekpang ḿbyín.
[Me n*fí ne busa] ké etwóm nyí biinyinyǎm ḿbyín*.
22Osówo, me n/chi m-pem bwǎn-bané ejí kyi-kim ne ńkyí wo aa/chi.
Me n/chi m-kpee ǒ ké nkéré ba-kú ba-kyâ ǒ ofê.
23Bǎmgbán-Óburúkpâbí, kye n̂g Óburúkpâbí akpee.
Banet-kyikû-Jekôp, kye n̂g Óburúkpâbí ofê.
Banet-Ézerel, tíngê ê kyísí ba-fé Óburúkpâbí.
24Óburúkpâbí o*fí o-kám m banet-kyikpu fúú*
nang busông ḿbú mbe ba-ri ng bu-chi ǎ o-né kámbé.
Nyǐ o*fí o-bírî ng kámbé esim*.
Nké nyǐ mu o-faa ng kámbé ké nkéré ba-kú ba-ryuu ng ochwâp.
25Ké nkéré banet eyên ba-kú ba-kyâ ǒ ofê,
me n/chi m-kpee ǒ ké ńkyí aa/chi.
Ké bushú ḿbú banet kángkáng ḿbé
mbe ba-chi i ńkyí wo a/sét nké
me n/chi n-chi byifen-Osówo ḿbyí me n/ryí ocím.
26Banet-kyikpu ba/chi ba-ryí eringe nyí mbé mbe ba-ryuu ng.
Banet ḿbé mbe ba-bâ ba-kâm Óburúkpâbí ba/chi ba-kpee ǎ.
Kyi/bát bakyú kanong ne banyá.
27Kángkáng banshâng bakye ké ejíí emúmú
kyi-fím ké bukô-ejíí bubónge kyi-ribi ké ḿbú áku
ba/chi ba-zîim Óburúkpâbí ba-bírî ba-kâm ǎ.
Kángkáng banet ba/chi ba-kye ǎ ofê.
28Ké nǎ, Óburúkpâbí nké mu Otu.
Ejíí emúmú nyi ké bubwô emen.
29Kángkáng bantông byiko [ba/chi ba-tíngê kyísí ba-fé ǎ.]
Kángkáng banet ḿbé badakpú ba/chi ba-tíngê kyísí ba-fé ǎ.
Kángkáng banet-bukyû ekpú ba/chi ba-tíngê kyísí ba-fé ǎ.
[ 30Ejíí nyí nyi e-bâ] e/chi e-chi ńkyí nyǐ o/sét.
Banet ba/chi ba-pem ejíí nyí nyi e-bâ kyi-kim ne Óburúkpâbí.
31Banet ba/chi ba-sét bwǎn ḿbé mbe ba-bâ ba/fu,
Óburúkpâbí oo/nyii banet emen.
Currently Selected:
Sâm 22: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
