Sâm 19
19
Butu mbu ké Byěm ḿbyí Osówo o/chi
1Bubóng mbu bu-tông ng butu ḿbú Osówo wááng.
Mbu bu-tông ng bǎmkpóngé ḿbé Osówo oo/chi.
2Dyicí nang dyirá ndyi dyi-sét ng orî-dyicí kyi-kim ne bǎmkpóngé ámbe.
Buchú nang burá mbu bu-pem m ne orî-buchú kyi-kim ne mbé.
3Nang ojá nang kyiraa aa*jwo*.
Nang kyicoge aa*jwo*.
4Nké [ejá] ebe nyi e-ta ng ejíí emúmú.
Kyitwóm ebe nkyi kyi-ribi ng nang nyá.
Osówo o/bi kyise ké bubóng o-tî óbyísû.
5Óbyísû mu o-byí i o-bâ
wǎ onyinchéng mú mu o-dim m dyibé ebé,
ne wǎ nzónge ochéé mú mu o-ryuu ng ochéé ekan.
6Óbyísû mu o-byí i ké bukô-bubóng bubónge
o-cen o-ribi ké ḿbú áku.
Kiinsóngé emen kyi-ta ng kángkáng byěm.
Byije ḿbyí Óburúkpâbí
7Byije ḿbyí Óburúkpâbí byi/nwa kerededet.
Mbyi byi-kyâ dyikpen ńdyí dyifyîfî.
Byije ḿbyí Óburúkpâbí byi/kwárê ḿbyí onet odafé dyityém ké mbyí.
Banet ḿbé ba*fí ne bubong* mbe ba-já ng bubong ké mbyí.
8Byije ḿbyí Óburúkpâbí mbyi ntûntû.
Banet ḿbé mbe ba-tî ng kámbyí mbe ké bunyîn-dyityém.
Byije ḿbyí Óburúkpâbí bii*ryí acît*.
Mbyí byi-bâ ne buwángé.
9Ofê mú badakye Óburúkpâbí mu kanong.
Mu o-waa ng ne banyá.
Óburúkpâbí oo*ryí acît ké mpan emen*.
Nyǐ kángkáng nkéré o-sét ng ntûntû.
10Byije emen byi-nyîn n byi-shwôm nang ebóng akpuga.
Mbyí byi-nyîn n byi-shwôm bakút-bukwan
nang mbe cángénéné nǎ!
11Óburúkpâbí, byije eyên nké mbyi byi-kyâ mě mú ḿgbán eyên byinyídíng.
Wo amu a-kyâ mě biǐtí-byěm,
ké nǎ, me mu n-tî ng kámbyí.
12Óburúkpâbí, yeě odanyît ńkyí nyǐ o*da/man echi*.
Nyii mě ké byibî ejí ḿbyí byi*fí wááng*.
13*Dachi a-mîng mě to n-tigi ne dyityém ejí n-chi byibî*.
*Damîng kámbyí byi-koo mě busa*.
Ne me n/chi n-firi kerededet,
a-chi mě n-fem ké [byibî ḿbyí bii*nwa eri*.]
14Kyi/bát ejá ejí ne okabe ejí byikwárê ḿbyí wo adakoo,
ǎ Óburúkpâbí,
mú Onet-Obâm ejí ne Onet-Onyii ejí.
Currently Selected:
Sâm 19: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
