Sâm 18
18
Okwan mú Otu Dívit o/kwán ké Byití ḿbyí o/kpógê
(2 Sámwel 22:1-51)
1Óburúkpâbí, wo amu a-jê ng mě kanong kanong.
Wo nké amu onet mú mu o-ku ng mě.
2Óburúkpâbí nké mu Onet-Onyii ejí.
Nyǐ nké mu kyikit-dyirem ejí ńkyí shwaneshwane.
Osówo ejí nké mu Onet-Onyii ejí,
ne â mu ne nyǐ, chwǒm kii*chi mě*.
Nyǐ mu o-ku ng mě wǎ kiinku byiko.
Nyǐ mu o-ku ng mě ne mu o-tî ng mě
eringe nyí chwǒm kii*ta mě*.
3Me mu n-kó ng Óburúkpâbí,
ne nyǐ mu o-nyii ng mě ké abwô nyí banet-bushwôn ejí.
Kye n̂g Óburúkpâbí akpee.
4Ofene-bukyû o/mû o/wâng mě.
Kace-bukyû ka/wâng mě ka-fé ké otyém.
5Ofene-bukyû o/mû oo/wâng mě,
ne dyikun dyi/mû dii/kuu kaǎtám ńké ndaróng.
6Me n/kó Óburúkpâbí ké nkéré afaníkong ejí.
Me n/kó Osówo ejí n/fu, ochwáp mě.
Nyǐ o/jwo ejá ejí ké kiǐtí-kyise-kyifen emen echi.
Nyǐ o/fwôo atông ké bukyû ejí
ḿbú mu n-tii ng n/fu, ochwáp mě.
7Ne esí kâng e-náng.
Byikû-eku byi-náng, ké nǎ, Osówo o/sa kafâ.
8Arúkwâ a-byí ǎ ké éfâ-nzóng,
bumang-okwâ ne amánge-okwâ a-byí ǎ ké ocím.
9Nyǐ o-ját bubóng,
o-bâ kyísí ne kiipyimpyam-ófíbí ké byiká.
10Nyǐ o-byí ochéé óchee ké kiǐnyám ńkyí nkyi ne abyibabang.
O/cen ké abyibabang nyí bufú.
11Nyǐ o-cít kyifip ké byiko.
Bubóng ḿbú boo/jîi pyampyam bu/wâng ǎ.
12Abíp ne bamang-okwâ byi/fím ké kasabang ńké nke ǎ ké bushú ne byi-byí ké biimpyimpyam-ófíbí.
13Óburúkpâbí kâng o-rime kyíbóng wǎ omu
ne [ba-jwo] ejá nyí Osówo mú kyíbóng kyíbóng.
14Nyǐ o-ché banet-bushwôn emen abán,
o-chi kámbé ba-firi byiryibyiryi.
Nyǐ o-chi kámbé ba-ribi ne ochéé
ké kasabang ńké mu o-két ng.
15Óburúkpâbí, ké nkéré a/raa ké kafâ esa ne banet-bushwôn eyên a-nyán kámbé,
baya ḿbé baryên ba-núng ne byikwap-esí byi-waa kyíjí.
16Óburúkpâbí o/bwom kyíbóng o-tan bubwô o-níbî mě.
Nyǐ o/tut mě m-byí ké kiǐríbíríbí-baya.
17Nyǐ o/nyii mě ké abwô nyí banet-bushwôn ejí ḿbé mbe ne busa,
ne ké abwô nyí kángkáng banet ḿbé mu n-sa ng kámbé kafâ.
Mbé ba/mû ba/shwôm mě busa.
18Mbé ba/rim bunwa ne me ké nkéré m/mû ké afaníkong.
Nké Óburúkpâbí o/ku mě.
19Nyǐ o/chwáp mě n-fem ké ofene.
Nyǐ o/nyii mě, ké nǎ, kyi/mû kyi-nyîn n ǎ ne me.
20Óburúkpâbí mu o-yárê ng mě,
ké nǎ, me mu n-chi i ńkyí nkyi kanong.
Nyǐ mu o-jware ng mě,
ké nǎ, me n*da/chi kyibî*.
21Me nn/chi wǎ eringe nyí byije ḿbyí Óburúkpâbí byi/sét.
Me n*da/bírî ne Osówo esim*.
22Me nn/tî kángkáng byije emen.
Me n*da/né ne echi eringe nyí byi/sét*.
23Nyǐ mu o-nyît ng o/fu, me n*fí ne kyibî*
ne me nn/tî byiko ejí cát ké byibî echi.
24Ne ké bubwô ámbu, nyǐ mu o-yárê ng mě,
ké nǎ, me mu n-chi i ńkyí nkyi kanong,
ké nǎ, nyǐ mu o-nyît ng o/fu, me n*da/chi kyibî*.
25Ô Óburúkpâbí, wo amu a-fâ dyityém eyên ne banet ḿbé mbe ba-fâ atyém ebe ne wo.
Wo amu kanong kerededet ne banet ḿbé ba/kwárê.
26Wo amu dyityém kpárám ne banet
ḿbé mbe dyityém kpárám ne wo.
Nké wo amu a-chi i bambên dyityém [byibî-byěm.]
27Wo amu a-nyii ng banet ḿbé mbe ba-tî ng byiko ebe kyísí.
Nké wo amu a-shû ng bantông byiko a-tî kyísí.
28Ô Óburúkpâbí, wo amu a-kyâ mě kiinwángé
a-chi i kyifip ejí kyi-man.
29Wo amu a-kyâ mě busa ḿbú ndanwa ne banet-bushwôn ejí
ne busa ḿbú ndayú ekpe-oshê ebe.
30Byěm ḿbyí Osówo ejí mu o-chi i mbyi kerededet kanong kanong.
Onet o-man n ejêem esim ké byiraa emen kanong kanong.
Nyǐ mu wǎ édem nyí kángkáng banet ḿbé mbe ba-ryuu ng oku emen.
31Óburúkpâbí kǎnchí nké mu Osówo.
Osówo kǎnchí nké mu kiinku eten.
32Nyǐ nké mu Osówo mú mu o-chi i mě n-shwane.
Nyǐ mu o-chi i kiǐfáng ejí kanong.
33Nyǐ mu o-chi i etyém-abe-byiká ejí e-shwane wǎ nyí enyam.
Nyǐ o*fí o-bángê e kyibî kyi-ta mě kyíbóng-eku*.
34Nyǐ mu o-tángê e mě byití enwa
eringe nyí me ndaman esep búre ḿbú shwaneshwane.
35Ô Óburúkpâbí, wo amu a-ku ng mě
ne amu a-nyii ng mě.
[Otûn] eyên mú amu a-tún n mě oo/chi mě n-firi kiǐtí,
ne busa eyên boo/tî mě kanong.
36Wo aa/tî mě eringe nyí baa*kám mě*
ne me n*da/róng ne*.
37Me mu n-zóngê e ne banet-bushwôn ejí n-kám m kámbé.
Mm*mîng* tete n-ju kámbé.
38Me mu n-díp ng kámbé m-pwó ng kyísí ba-myii ké byiká ejí
baa*man to ebûu*.
39Ké nǎ, wo amu a-kyâ mě busa ḿbú byití enwa,
ne ḿbú mu m-kpógê ng banet-bushwôn ejí.
40Wo amu a-chi i banet-bushwôn ejí ba-chêe mě.
Me mu m-man n ne banet ḿbé mu n-sa ng kámbé kafâ.
41Mbé mbe ba-tii ng ba/fu, bachwáp kámbé,
nké onet o*fí mú mu o-chwáp ng kámbé*.
Mbé mbe ba-kó ng Óburúkpâbí,
nké nyǐ o*fí o-faa ng kámbé ojá*.
42Me mu n-shiryi ng kámbé ba-firi wǎ édúkǎndú
nyí bufú mbu bu-tugi ng bu-pwó ng.
Me mu n-cím m kámbé wǎ biǐntóng
ḿbyí mbyi ké byiká-oshê.
43Wo a/nyii mě ké abwô nyí banet ḿbé ba/bírî bunwa ne me,
ne a/chi mě n-firi onet-dyishí mú eshê.
Banet ḿbé nn*nyît kámbé* kántîk ba/firi banet ejí.
44Bacinbánet ba-tíngê e kyísí ké bushú ejí.
Mbé ba/chi ńkyí n/sét ké nkéré ba/jwo kyi-kim ne me.
45Asa a/man kámbé ne ba-byí ké kyikit-orem ebe
ba-bâ ne banê ké byiko.
46Óburúkpâbí mu okpó.
Kye n̂g onet mú mu o-ku ng mě akpee.
Sét n̂g eringe nyí Osówo mú mu o-nyii ng mě o/rêe.
47Nyǐ mu o-chi i mě m-kpógê banet-bushwôn ejí.
Nyǐ mu o-shû ng eshê kyísí e-firi ké bubwô ejí.
48Ne mu o-nyii ng mě ké abwô nyí banet-bushwôn ejí.
Ô Óburúkpâbí, wo a-chi i mě m-kpógê banet-bushwôn ejí,
a-nyii mě ké abwô nyí banwa anwa.
49Ké bubwô ḿbún nké me mu n-kyâ ǒ akpee ké eshê.
Me mu n-kwán n ekwan-akpee n-kyâ ǒ.
50Osówo mu o-chi i otu emen o-kpógê byití ḿbyí biǐtí.
Nyǐ mu o-tông ng Otu Dívit
mú nyǐ oo/cá ne bwǎn emen kyijé emen
ńkyí kii*man ne banyá*.
Currently Selected:
Sâm 18: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
