Sâm 17
17
Nshwam mú Onet mú o*da/chi Chwǒm*
1Ô Óburúkpâbí, fwôo atông a-jwo arông nyí mu n-tîm m n/fu,
pan mě mpan mú aa*ryí acît*.
Tî atông a-jwo bukyû ejí
ḿbú mu n-tii ng n/fu, chwáp mě.
Fwôo atông a-jwo nshwam ejí mú ntûntû.
2Wo a/chi a-pan mpan o-nwa mě,
ké nǎ, wo amu a-nyît ng ńkyí nkyi ntûntû.
3Wo amu a-nyît ng dyityém ejí.
Wo aa/bê a-kâm mě ne buchú.
Wo aa/kpúrî mě kángkáng a*da/ri kyibî-okabe nang obónge ké dyityém ejí*.
4Me nn*raa kyibî wǎ eringe nyí banet ḿbé áku mbe ba-raa ng*.
Me nn/chi eringe nyí wo a/sét.
Me n*da/cen ké akwóp nyí byibî echi*.
5Me kángkáng nkéré nn/cen ké bukwóp eyên
ne n*da/mim ne ké mbú*.
6Ô Osówo, me mu n-fâ nshwam n-kyâ ǒ,
ké nǎ, wo amu a-faa ng mě ojá.
Ké bubwô ámbu, bírî a-kâm mě a-jwo ejá ejí.
7Tông bě kiǐtí-kyijé eyên wááng a-nyii bě.
Be byi-fem m ké bukô-kyikpút eyên
ké abwô nyí banet-bushwôn eten.
8Ku mě wǎ eringe nyí wo adaku achi nyí eyên wo oyén.
Rôo mě ké kiǐríribí-abyibabang eyên,
9n-fem ké bunwa ḿbú bambên atyém ba/rim ne me.
Byibî-banet-bushwôn ba/wâng mě.
10Baa*ri onet bafip*
ne mbé mbe ba-raa ng ké byiko etông.
11Mbe mě wângwâng kántîk nang m/bírî nyá.
Mbé mbe ba-bám m mpât mú mbé bada mě etut ba-twóp kyísí.
12Mbé mbe ba-bám m mě wǎ ekpang, ba-ryuu ng ba/fu,
mbé ba-ját ng mě boǒcê boǒcê.
13Óburúkpâbí, bâ.
Bwom bunwa ne banet-bushwôn ejí a-kpógê kámbé.
Yip kashwám eyên a-nyii mě ké abwô nyí bambên atyém.
14Nyii mě ké abwô nyí banet ḿbé mbe ne kángkáng ḿbyí mbé mbe ba-ryuu ng ké dyikpen ńdyín.
Kye kámbé busông ké afaníkong nyí a/tî kámbé.
Kyi/bát afaníkong ányi awaa nyí adakwárê bwǎn ebe,
kyicê kyi-waa nyí bwǎn-bwǎn ebe.
15Nké me n/chi n-ri ǒ,
ké nǎ, me n*da/chi kyibî nang kyibónge*
ne ké nkéré nn/jwóbê,
bushú eyên bu-sú u mě ne bunyîn-dyityém.
Currently Selected:
Sâm 17: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
