Sâm 148
148
Ejíí Emúmú ekpee Osówo
1Kye n̂g Óburúkpâbí akpee.
Ben mú bamu ba-kyú u kyíbóng kyíbóng,
kye n̂g Óburúkpâbí akpee.
2Kángkáng barím emen ḿbé banong
ne kángkáng bannwa byití emen ḿbé kyíbóng,
kye n̂g ǎ akpee.
3Óbyísû ne otukáku,
kye n̂g ǎ akpee.
Ékpére nyí nyi e-san n,
kye n̂g ǎ akpee.
4Bubóng ḿbú bu/nyâam bu-shwôm
ne baǎmú ḿbé mbe kyíbóng-bubóng,
kye n̂g ǎ akpee.
5Kyi/bát mbyí kángkáng byikye dyizîn ńdyí Óburúkpâbí akpee.
Nyǐ o/kye busa ne o-mee kámbyí.
[ 6Ké busa emen nké o/tî kámbyí ké byikit ebe ne banyá,
ne mbyí bii*man ené echi ńkyí nyǐ o/fu, byichi*.]
7Kángkáng biǐríbíríbí-baya ḿbé baryên,
ne biǐnyám-baya,
8ne afú nyí shwaneshwane
nyí nyi a-chi i ńkyí nyǐ o/sét,
ne ófíbí, ne abíp,
ne kasabang, ḿbyí mbyi ké ejíí,
kye n̂g Óburúkpâbí akpee.
9Ecím-eku ne eku nyí eryên
ne byichí ne byizinge
10ne kángkáng enyam nyí byise ne nyí dyikán,
bunurung ne efyi,
kye n̂g Óburúkpâbí akpee.
11Batu ne kángkáng banet ne bwǎn-batu
ne kángkáng batu-ashí ḿbé áku
12ne bwǎn-banyinyi ne byisu-banyinchéng
ne bakínkán-banet ne bwǎsíng,
kye n̂g Óburúkpâbí akpee.
13Kyi/bát mbé kángkáng bakye dyizîn ńdyí Óburúkpâbí akpee.
Dyizîn emen dyi/rêe dyi-shwôm kángkáng azîn nyí áku.
Busan emen ḿbú ragerage bu/rêe bu-shwôm bubóng ne esí.
14Nyǐ o/chi banet-Ézerel ḿbé oshê emen,
ḿbé mbe ǎ ké dyityém ba-shwane
eringe nyí kángkáng banet emen bada ǎ ekye akpee.
Kye n̂g Óburúkpâbí akpee.
Currently Selected:
Sâm 148: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
