Sâm 146
146
Kye n̂g Osówo Onet-Onyii Akpee
1Kye n̂g Óburúkpâbí akpee.
Kyirim ejí, kye Óburúkpâbí akpee.
2Me n-kyâ ǎ akpee tete n*fí to okpó*.
Me n-kwán n ekwan n-kye Osówo ejí
kángkáng dyikpen ejí.
3*Datî dyityém eyên ne banet ḿbé mbe banet-ashí*.
Onet oo*man ǒ enyii*.
4Ké nkéré mbé baa/kpú,
ba-bwa ng ké ecing.
Ké dyicí ándyi, kángkáng byěm ebe ḿbyí mbe ba-nam m byi-man.
5Bunyîn-dyityém mbu ne onet mú mu ne Osówo-Jekôp
mú oda ǎ echwáp.
Mbu to ne onet mú mu o-jêem m esim ké Osówo Óburúkpâbí emen,
6mú mu nchi bubóng ne esí
ne baya ḿbé baryên
ne kángkáng byěm ḿbyí mbyi ké mbyí.
Nyǐ kángkáng nkéré mu o-tî ng ocím emen mú mu o-ryí i.
7Nyǐ mu o-két ng mpan o-nwa banet ḿbé banet mbe ba-cít ng kámbé,
ne mu o-kyâ banet ḿbé esong nyi e-nwa ng kámbé byiryíng.
Óburúkpâbí mu o-fîm m banet-mgbokobá ba-byí ké mgbokobá,
8ne mu o-chi i banet ḿbé ba*fí ba-rángê e* ba-kûrángê.
Nyǐ mu o-bêem m banet ḿbé baa/myii.
Banet emen ḿbé mbe ba-chi i kanong ba-jê ng ǎ.
9Nyǐ mu o-bám m bacinbánet ḿbé mbe ké esí eten.
Nyǐ mu o-chwáp ng banyǐnkú ne bwǎn-byibén.
Nké mu o-bên n byěm ḿbyí bambên dyityém mbe ba-nam m.
10Óburúkpâbí mu Otu mú ne banyá.
Ô Záyon, Osówo eyên okyú Otu kángkáng nkéré.
Kye n̂g Óburúkpâbí akpee.
Currently Selected:
Sâm 146: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
