Sâm 145
145
Okwan-Akpee
1Osówo ejí ne Otu ejí,
me n/chi n-sét kyi-kim ne eringe nyí a/rêe a-shwôm.
Me n/chi n-kó ǒ asǎma ne banyá ne banyá.
2Me n/chi n-kó ǒ asǎma kángkáng dyicí.
Me n/chi n-kó ǒ asǎma ne banyá ne banyá.
3Óburúkpâbí o/rêe, ne ba-man ba-kye ǎ akpee kanong kanong.
Nyǐ o/rêe o-shwôm chwǒm ńkyí bubong budanyît.
4Ba/chi ba-kpee ǒ ké ńkyí wo aa/chi
kyi-fím ké kyikû-bwǎn kyibónge tete a-ribi nnyinyěng.
Mbé ba/chi ba-sét kyi-kim ne biǐtí-byěm eyên ḿbyí amu a-chi i.
5Mbé ba/chi ba-sét kyi-kim ne busan eyên ḿbú ragerage
ne eringe nyí wo a/rêe,
ne me n/chi n-kûkabe kyi-kim ne biǐtí-byěm eyên ḿbyí amu a-chi i.
6Banet ba/chi ba-sét kyi-kim ne biǐtí-byěm eyên ḿbyí amu a-chi i,
ne me n/chi n-sét eringe nyí wo a/rêe.
7Ba/chi ba-sét kyi-kim ne kanong eyên kángkáng,
ne ba/chi ba-kwán kyi-kim ne dyityém eyên ńdyí a/cángê.
8Óburúkpâbí mu o-tông ng kyijé,
ne mu o-ri ng banet bafip.
Nyǐ oo*sa kafâ babap*
ne mu ne kyijé pwat ké byiko ńkyí kii*man*.
9Nyǐ mu kanong ne kángkáng banet,
ne byiko byi-kpú u ǎ ne kángkáng byěm ḿbyí nyǐ o/chi.
10Óburúkpâbí, kángkáng byěm eyên ḿbyí wo a/chi byi/chi byi-kye ǒ akpee,
ne kángkáng banet eyên ba/chi ba-kó ǒ asǎma.
11Mbé ba/chi ba-sét kyi-kim ne busan eyên ḿbú ragerage ḿbú butu eyên,
ne ba/chi ba-sét eringe nyí wo a/rêe,
12eringe nyí nang yeě o/chi o-nyît
kyi-kim ne biǐtí-byěm eyên ḿbyí amu a-chi i,
ne kyi-kim ne kiǐtí-busan ḿbú ragerage ḿbú butu eyên.
13Butu eyên mbu ne banyá,
ne wo amu Otu ne banyá.
Óburúkpâbí mu o-tî ng ocím emen mú nyǐ mu o-ryí i,
ne kángkáng byěm ḿbyí nyǐ mu o-chi i mbyi kanong.
14Nyǐ mu o-nyii ng banet ḿbé mbe ké afaníkong.
Nyǐ mu o-bêem m banet ḿbé baa/róng.
15Kángkáng byěm ḿbyí mbyi byi-kpen n
mbyi byi-tî ng achi ké wo,
ne wo amu a-kyâ kámbyí byiryíng
ké nkéré mbyí byi-kú byi-ryuu ng kámbyí.
16Wo amu a-kyâ byi-kwárê kámbyí
eringe mbyí kángkáng byidazût.
17Óburúkpâbí mu o-chi i kanong
ké kángkáng byěm ḿbyí nyǐ mu o-chi i.
Ne mu o-ri ng banet bafip ké kángkáng édúú emen.
18Nyǐ mu fáráng ne banet ḿbé mbe ba-kó ng ǎ ne dyityém ebe.
19Nyǐ mu o-kyâ banet ḿbé mbe ba-kyâ ǎ ofê byěm ḿbyí mbé mbe ba-ryuu ng.
Nyǐ mu o-jwo ng bukyû ebe,
ne mu o-nyii ng kámbé.
20Nyǐ mu o-ku ng nang yeě mú nyǐ mu o-jê ng ǎ.
Nké nyǐ o/chi o-ju bambên atyém.
21Me n/chi n-kye Óburúkpâbí akpee kángkáng nkéré.
Kyi/bát kángkáng byěm ḿbyí nyǐ o/chi byikpee dyizîn emen ńdyí dyinong ne banyá.
Currently Selected:
Sâm 145: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
