Sâm 144
144
Otu o/kó Osówo Asǎma ké Byití ḿbyí o/kpógê
1Kye n̂g Óburúkpâbí mú mu Onet-Obâm ejí akpee.
Nyǐ mu o-tángê e mě byití enwa.
2Nyǐ mu Onet-Obâm ejí
ne onet mú mu o-ku ng mě.
O-chi i Kyikit-Dyirem ejí ne Onet-Onyii ejí,
mú me mu n-tî ng dyityém n/fu,
chwǒm kii*ta mě*.
Nyǐ mu o-kpógê ng eshê o-fé ké bubwô ejí.
3Óburúkpâbí, onet o/byí ebóng mú wo amu a-tún n ǎ.
Onet mú o*da/byí chwǒm*
nké wo mu a-tî ng ǎ achi ké byiko*?
4Nyǐ mu wǎ kaǎnyín-bufú.
Ací emen nyi wǎ kiǐríribí
ńkyí nkyi kyi-ríbî ng.
5Ô Óburúkpâbí, ját bubóng a-shû kyísí.
Ta eku, ne nyǐ e/chi e-byí arúkwâ.
6Chi kasabang ka-kédê,
a-chi banet-bushwôn eyên ba-firi byiryibyiryi.
Ché abán eyên a-chi kámbé ba-zóngê ochéé.
7Fím kyíbóng a-shû kyísí.
Tut mě a-fîm ké kiǐríbíríbí-baya, a-nyii mě.
Nyii mě ké abwô nyí bacinbánet
8ḿbé baa*sét ntûntû ne banyá*
ne mbe ba-sét ng byisédéng nang ba/sem ǒ.
9Ô Osówo, me n/chi n-kwán okwan mú ofyîfî n-kye ǒ.
Me n/chi n-kim dyícîng n-kwán ǒ ekwan.
10Wo amu a-chi i batu ba-kpógê,
ne a-nyii ng Otu Dívit mú ḿgbán eyên.
11Nyii mě ké abwô nyí bambên atyém-banet-bushwôn ejí.
Nyii mě ké abwô nyí bacinbánet
ḿbé baa*sét ntûntû ne banyá*
ne ba-sét ng byisédéng nang ba/sem ǒ.
12Kyi/bát bwǎn eten ḿbé banyinchéng ké bubwásíng ebe bakyú wǎ byichí
ḿbyí mbyi byi-kán n shwaneshwane.
Kyi/bát bwǎn eten ḿbé banyinyi bakyú wǎ biǐtí-byikwap
ḿbyí byidanap bakô-kyibám-butu.
13Kyi/bát bankám-byiryíng eten basú ne kángkáng azong-byiryíng.
Kyi/bát ebû nyí ké esí eten efwon égot-bwǎn.
14Kyi/bát bampong eten bafwon chwóó,
baa*su* ba-tánê nang otáne*.
Kyi/bát ekyû etii nyí bafip e*dachi ké byiká-oshê eten*.
15Bunyîn-dyityém mbu ne banet ḿbé ba/já byěm ḿbyín.
Bunyîn-dyityém mbu ne banet ḿbé Osówo ebe ányi Óburúkpâbí.
Currently Selected:
Sâm 144: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
