Sâm 119
119
Byije ḿbyí Óburúkpâbí
1Bunyîn-dyityém mbu ne banet ḿbé akpen ebe a*fí ne kyibî*
ḿbé mbe ba-kyú u akpen wǎ eringe nyí byije ḿbyí Óburúkpâbí byi/sét.
2Bunyîn-dyityém mbu ne banet ḿbé mbe ba-chi i ńkyí nyǐ mu o-sét ng,
ḿbé mbe ba-chi i ne atyém ebe kángkáng ńkyí nyǐ o/fu, bachi.
3Banet ámbe baa*chi kyibî-chwǒm*.
Mbé mbe ba-cen n ké akwóp nyí Óburúkpâbí.
4Óburúkpâbí, wo aa/kye bě byije eyên ne a/sét bě a/fu,
be byifé dyityém ké mbyí byi-chi eringe nyí byi/sét.
5Me n/kabe n/fu, n-fâ dyityém n-tî byiraa eyên
ḿbyí amu a-sét ng.
6Baa*ba/chi ba-fé mě éshwân*
â me n/tî atông ké kángkáng byije eyên*.
7Wǎ eringe nyí mu n-kwâa ng bampan ḿbé amu a-két ng kerededet,
me n-kyâ ǒ akpee ne dyityém ńdyí kpárám.
8Me n-tî ng byije eyên.
*Da mě emîng*.
Byije ḿbyí Óburúkpâbí etî
9Kyisu-onyinchéng kyi-cen n nǎ ne o-tî dyikpen emen kpárám.
O-man n etî kándyí â mu o-chi i ńkyí byije eyên byi/sét.
10Me mu n-kan n n/fu, n-fâ ǒ ne dyityém ejí kángkáng.
*Da mě emîng n-né echi ńkyí byije eyên byi/sét*.
11Me mu n-tî ng byije eyên ké dyityém ejí
eringe nyí me nn*chi kyibî ké bushú eyên*.
12Ô Óburúkpâbí, me mu m-kpee ng ǒ.
Tángê mě akwóp eyên.
13Me mu n-sét ng banet kángkáng byije ḿbyí wo aa/kye.
14Nkyi kyi-nyîn n mě ńkyí ndachi ńkyí byije eyên byi/sét
kyi-shwôm ńkyí ndajá esang chwóó.
15Me mu n-kwâa ng byiraa eyên ḿbyí amu a-sét ng.
Me mu m-kpúrî ng byěm eyên ḿbyí amu a-tángê e.
16Me mu n-já ng bunyîn-dyityém ké byije eyên.
Me mm*ba/chi n-ráp byije eyên*.
Bunyîn-Dyityém ké Byije ḿbyí Óburúkpâbí
17Nwa dyityém ne me mú ḿgbán eyên
eringe nyí me ndakpen n-chi ḿbyí amu a-tángê e.
18Bâa achi ejí eringe nyí me ndari biǐtí-ntûntû mú mu ké byije eyên.
19Me mu nyín ké ejíí ké kaǎnyín-nkéré.
*Da mě erôo byije eyên*.
20Dyityém ejí dyi-kú dyi-sung ng ké káryúryú.
Me mu n-ryuu ng n/fu, nnyît byije eyên kángkáng nkéré.
21Wo amu a-raa ng ne bantông byiko,
a-shú u to banet ḿbé ba*fí ba-chi i ńkyí byije eyên byi/sét*.
22Nyii mě ké ecábé ne edángé ebe nyí mbe ba-kyâ mě,
ké nǎ, me nn/tî byije eyên.
23Batu mbe ba-cibi ng ba-nam m mě,
nké me n-kwâa ng byěm eyên ḿbyí amu a-tángê e.
24Byiraa eyên ḿbyí amu a-sét ng mbyi byi-kyâ mě bunyîn-dyityém.
Mbyí nké mbyi mě wǎ banet-bacê ejí.
Dyityém etî ké Byije-Óburúkpâbí etî
25Me mm/myii ké édúkǎndú ké baa/kpógê mě.
Chi mě m-bûu wǎ eringe nyí wo a/ryí ocím.
26Me n/sét ǒ kángkáng byěm ḿbyí me nn/chi,
ne wo a/faa mě ojá.
Tángê mě akwóp eyên.
27Chwáp mě eringe nyí me ndanyît kyikû-byije eyên,
ne me n/chi n-kûkabe kyi-kim ne biǐtí-byěm eyên
[ḿbyí amu a-tángê e.]
28Bafip baa/shwôm mě busa.
Chi mě n-shwane wǎ eringe nyí wo a/ryí ocím.
29*Da mě emîng n-fín bukwóp eyên*.
Tángê mě byije eyên ké kanong eyên.
30Me mm/bángê n/fu, n-kû ng echi ńkyí a/sét.
Me nn/tî atông ké byije eyên.
31Óburúkpâbí, me nn/koo byiraa eyên.
*Da mě emîng ba-fé mě éshwân*.
32Me n/chi n-chi babap ńkyí byije eyên byi/sét,
ké nǎ, wo a/chi a-chî mě ekye bubong chwóó.
Nshwam-Kyikû-Byěm enyît
33Óburúkpâbí, tángê mě kyikû ńkyí byije eyên
ne me n/chi n-chi eringe nyí byi/sét kángkáng nkéré.
34Sét mě wááng eringe nyí byije eyên mbyi,
ne me n/chi n-chi eringe nyí byi/sét.
Me n/chi n-tî kámbyí ne dyityém ejí kángkáng.
35Tông mě bukwóp ḿbú ndatî byije eyên,
ké nǎ, ké mbyí nké mu n-ri ng bunyîn-dyityém.
36Kye mě dyityém ńdyí ndatî byije eyên, *chí ńdyí ndajá esang*.
37*Da mě emîng n-tî dyityém ké chwǒm ńkyí kyi*fí ké chwǒm*.
[Nwa dyityém ne me eringe nyí wo aa/ryí ocím.]
38Tî ocím eyên mú a/ryí ne me, me mú ḿgbán eyên,
ocím eyên mú a/ryí banet ḿbé mbe ba-chi i ńkyí a/sét.
39Chi mě n-fem ké ecábé nyí mu n-shî ng.
Mpan ekét eyên mu kiǐtí kanong kanong.
40Me mu n-ryuu ng n/fu, n-chi i eringe nyí byije eyên byi/sét.
Kye mě dyikpen ńdyí dyifyîfî,
ké nǎ, wo amu a-chi i kanong.
Dyityém etî ké Byije ḿbyí Óburúkpâbí
41Óburúkpâbí, tông mě eringe kyijé eyên kyi/jê ne me,
a-nyii mě eringe nyí a/ryí ocím.
42Ne me kâng n/chi m-man n efaa banet ḿbé mbe ba-kyâ mě edángé ojá,
ké nǎ, me mu n-tî ng dyityém ké ejá eyên.
43Chwáp mě n-sét ntûntû kángkáng nkéré,
ké nǎ, dyityém ejí ndyi ké byije eyên.
44Me kángkáng nkéré n/chi n-chi eringe nyí byije eyên byi/sét ne banyá ne banyá.
45Me n/chi n-kyú ké byiko ejí,
ké nǎ, me mu n-kan n echi eringe byěm ḿbyí amu a-tángê e.
46Me n/chi n-sét batu byije eyên
ne éshwân ee*ba/chi e-chi mě*.
47Me mu n-ri ng bunyîn-dyityém ké byije eyên etî,
ké nǎ, mbyí mbyi byi-jê ng mě.
48Me mu n-fâ byije eyên,
ne mbyí mbyi byi-jê ng mě.
Me n/chi n-kabe kyi-kim ne byěm ḿbyí amu a-sét ng.
Obánge ké Byije ḿbyí Óburúkpâbí
49Zîim ocím eyên mú a/ryí ne me mú ḿgbán eyên.
Oo/kye mě okabe etî.
50Nang ké busông ejí, me m/mû ké bunyîn-dyityém,
ké nǎ, ocím eyên eryí o/kye mě dyikpen.
51Bantông byiko mbe ba-cábê ng mě kángkáng nkéré,
nké me n*da/mîng ne byije eyên*.
52Ô Óburúkpâbí, me mu n-zîim m bampan eyên ekét ḿbé aje nyí a/shwôm ké esim,
ne mbé mbe ba-fâ mě dyityém.
53Kafâ ka-sa ng mě ké nkéré ndari bambên atyém ba-bên n byije eyên.
54Ké dyikpen ejí, me mu n-kwán n ekwan kyi-kim ne byije eyên.
55Óburúkpâbí, me mu n-zîim m ǒ ne buchú,
ne mu n-kabe ng kyi-kim ne byije eyên.
56Me mu n-ri ng bunyîn-dyityém ejí ké byije eyên etî.
Ofê ekye ké Byije ḿbyí Óburúkpâbí
57Ô Óburúkpâbí, wo amu kángkáng ńkyí [mu n-ryuu ng.]
Me n/ryí ocím n/fu, n-tî ng byije eyên.
58Me mu m-bí ng ǒ ne dyityém ejí kángkáng n/fu,
ri mě bafip wǎ eringe nyí wo aa/ryí ocím.
59Me nn/kabe kyi-kim ne édúú ejí,
ne mu n-ryí i ocím n/fu,
n-chi i eringe nyí amu a-sét ng.
60Me mm*bên nkéré ké byije eyên etî*.
61Bambên atyém baa/kuu kaǎtám ba-tî mě,
nké me n*fí n-ráp ng byije eyên*.
62Me mu n-jwóbê ng ké kyirê-buchú n-kye ǒ akpee
ké bubwô ḿbú bampan ḿbé amu a-két ng kerededet.
63Me n-chi i ocín mú kángkáng banet ḿbé mbe ǒ bǎmgbán,
ne ḿbé mbe ba-tî ng byije eyên.
64Óburúkpâbí, ejíí ee/sú ne kyijé eyên ńkyí kii*man*.
Tángê mě byije eyên.
Byije ḿbyí Óburúkpâbí mbyi Kiǐtí
65Óburúkpâbí, wo aa/tî ocím eyên mú a/ryí,
ne wo a/nwa dyityém ne me mú ḿgbán eyên.
66Kye mě bubong ne byinyídíng,
ké nǎ, me [mu n-tî ng dyityém ké] byije eyên.
67Me m/mû n-fwam m eróng,
ne wo a-kû mě ekye busông,
nké kántîk me mu n-chi i eringe nyí wo amu a-sét ng.
68Wo a/nwa ne a/cángê dyityém kanong kanong.
Tángê mě byije eyên.
69Bantông byiko baa/sét byisédéng byi-kim ne me,
nké me mu n-chi i ńkyí wo amu a-sét ng ne dyityém ejí kángkáng.
70Banet ḿbén ba*fí ne dyishí*
nké me mu n-ri ng bunyîn-dyityém ké byije eyên.
71Busông ejí bu/mû kanong ne me,
ké nǎ, bu/chi mě n-kwâa byije eyên.
72Byije ḿbyí wo a/kye mbyi mě kiǐtí
byi-shwôm kángkáng akpuga nyí nyi ké ejíí.
Ntûntû mú Byije ḿbyí Óburúkpâbí
73Wo a/mee mě [a-tî mě kanong.]
Kye mě bubong eringe nyí ndakwâa byije eyên.
74Banet ḿbé mbe ba-kyâ ǒ ofê ba/chi ba-kyú ké bunyîn-dyityém ké nkéré baa/ri mě,
ké nǎ, me mu n-tî ng dyityém ké ocím eyên mú a/ryí.
75Óburúkpâbí, me mu n-nyît ng n/fu,
amu a-két ng bampan kanong,
ne wo a/kye mě busông,
ké nǎ, wo a-tî ng ocím eyên mú a/ryí.
76Mîng kyijé eyên ńkyí kii*man* kyi-fé mě dyityém
wǎ eringe nyí a/ryí mě ocím,
me mú ḿgbán eyên.
77Ri mě bafip ne me n/chi m-kpen,
ké nǎ, bunyîn-dyityém ejí mbu ké byije eyên.
78Kyi/bát éshwân ewuri bantông byiko ké ńkyí mbe ba-bât ng mě dyikáá.
Wǎ ké byiko ejí,
me n/chi n-kûkabe kyi-kim ne ḿbyí amu a-sét ng.
79Kyi/bát banet ḿbé mbe ba-kyâ ǒ ofê
ne kángkáng ḿbé mbe ba-nyît ng byije eyên babâ ba-kâm mě.
80Kyi/bát ntî byije eyên kerededet
eringe nyí éshwân ee*wuri mě*.
Nshwam-Onyii
81Óburúkpâbí, me nn/kyee ké obâm mú mu m-bám m n/fu, nyii mě.
Me mu n-tî ng dyityém ejí ké byiraa eyên.
82Achi ejí aa/kyee etún ké ńkyí wo a/ryí ocím.
Me mu m-bí ng n/fu, wo a-chwáp ng mě nkéré orá.
83Me n/firi wǎ biǐfâa-byiféng-bato ḿbyí baa/twóp,
nang ké nkyi éné,
me n*da/ráp ne byije eyên*.
84Me n-chîbám ka-bwon nǎ.
Nkéré orá mú wo a/chi a-pan banet ḿbé mbe ba-kyâ mě busông mpan.
85Bantông byiko-banet ḿbé ba*fí ba-tî ng byije eyên* baa/sím abíng nyí bada mě ekám.
86Kángkáng byije eyên mbyi ntûntû.
Banet mbe ba-kyâ mě busông ké byisédéng, chwáp mě.
87Kyi/waa kaǎnyín ba-ju mě,
nké me n*da/né ne byije eyên*.
88Ké bubwô-kyijé eyên ńkyí kii*man* [nwa dyityém ne me]
eringe nyí ndatî byije eyên.
Dyityém efé ké Byije ḿbyí Óburúkpâbí
89Ô Óburúkpâbí, ejá eyên e-waa ng kyíbóng ne banyá.
90Wo a-tî ng ocím eyên mú a/ryí kángkáng nkéré.
Wo aa/tî esí ké kyikit ńkyí nyi,
ne nyǐ e-waa ányi.
91Kángkáng byěm ḿbyí a/chi byi/waa tete kurún
ké bubwô-busa eyên ḿbú a/kye,
ké nǎ, mbyí kángkáng byi-chi i bǎmgbán eyên.
92Â byije eyên byi/mû byi*fí chwǒm ńkyí bunyîn-dyityém ejí mbu bu-fím m*
něen m/mû mm/kpú ké busông ejí.
93Me nn*ráp byije eyên ne banyá*
ké nǎ, ké mbyí, wo aa/tî mě okpó.
94Me n/já ǒ wo. Nyii mě.
Me nn/kan byije eyên etî.
95Bambên atyém mbe ba-bám m ba/fu, mbé ba-ju ng mě,
nké me mu n-kabe ng kyi-kim ne byije eyên.
96Me nn/kwâa n-nyît n/fu,
kángkáng byěm [mbyi ne bunyerenyere,
nké byije eyên mbyi kerededet.]
Kyijé etông ké Byije-Óburúkpâbí
97Byije eyên byi-jê ng mě kanong kanong.
Me mu n-kabe ng kyi-kim ne mbyí dyicí dyimúmú.
98Byije eyên mbyi mě ké dyityém kángkáng nkéré,
ne mbyi byi-chi i mě n-já bubong n-shwôm banet-bushwôn ejí.
99Me mu ne bubong ḿbú ndajwo n-shwôm bantánge ejí,
ké nǎ, me mu n-kabe ng kyi-kim ne byiraa ḿbyí amu a-sét ng mě.
100Me mu ne bubong n-shwôm bakínkán,
ké nǎ, me mu n-chi i wǎ eringe byije eyên byi/sét.
101Me mm/mîng kángkáng byibî-édúú,
ké nǎ, me mu n-ryuu ng n/fu, n-chi i eringe a/sét.
102Me n*da/né echi ńkyí wo a/sét*
ké nǎ, wo oyén nké amu ntánge ejí.
103Byěm ḿbyí amu a-sét ng mě mbyi byi-nyîn n byi-shwôm bakút-bukwan.
104Me mu n-já ng bubong ké bubwô-byije eyên.
Ké bubwô ámbu, kángkáng byibî-édúú byi-sa ng mě kafâ.
Kiinwángé ńkyí nkyi kyi-fím m ké Byije ḿbyí Óburúkpâbí
105Ejá eyên nyi mě wǎ kiinwángé-otyuryíkáng ńkyí kyida mě etông kiǐfáng.
106Me n/chi n-tî ocím ejí mú n/ryí ntûntû n/fu,
n-chi i eringe byiraa eyên ḿbyí ntûntû byi/sét.
107Afaníkong ejí aa*nwa eri* ǎ Óburúkpâbí.
Tî mě okpó wǎ eringe a/ryí ocím.
108Ô Óburúkpâbí, koo banshwam-asǎma ekó ejí,
a-tángê mě byije eyên.
[ 109Me kángkáng nkéré mm/kpá byiko ḿbyí nang bukyû ekpú.
Me] n*da/ráp ne byije eyên*.
110Byibî-banet byi/kuu kaǎtám byi-tî mě,
nké me n*da/né ne echi ńkyí byije eyên byi/sét*.
111Byije eyên nké mbyi mě byěm ejí ḿbyí ne banyá.
Mbyí nké mbyi byi-kyâ dyityém ejí bunyîn-dyityém.
112Me mm/bángê n/fu, n-chi i eringe byije eyên byi/sét tete dyicí ndakpú.
Bushî bu*fí ké Byije ḿbyí Óburúkpâbí*
113Banet ḿbé mbe ne atyém afee kyi-kim ne wo baa*nyîn mě*
nké byije eyên mbyi byi-jê ng mě.
114Wo nké amu a-ku ng mě ne amu kyikit-dyirem ejí.
Me mu n-tî ng achi ejí ké ocím eyên mú a/ryí.
115Dim m̂ mě ké bushú, ben banet ḿbé bamu ba-chi i byibî.
Me n-tî ng byije ḿbyí Osówo ejí.
116Kye mě busa eringe nyí wo a/ryí ocím,
ne me n/chi m-kpen.
*Damîng achi etî ejí a-waa mě kyísí dyikáá*.
117Níbî mě eringe n/chi n-fem,
ne me n/chi n-tî dyityém ké byije eyên kángkáng nkéré.
118Wo amu a-né ng nang yeě mú o*fí o-tî ng byije eyên*.
Byibî-ekabe ebe byi-waa ng kyísí dyikáá.
[ 119Wo amu a-kúng ng bambên atyém wǎ] biǐbyém ḿbyí badapwó,
ne ké bubwô ámbu, byěm eyên ḿbyí amu a-sét ng
mbyi byi-jê ng mě.
120Ké bubwô eyên, me mu n-shî ng.
Bushî boo/sú mě ké byiko
ké bubwô-bampan ḿbé amu a-két ng.
Byije etî ḿbyí Óburúkpâbí
121Me nn/chi ńkyí nkyi ochíchí ne ńkyí nkyi kanong.
*Da mě emîng ké abwô nyí banet-bushwôn ejí*.
122Ryí ocím a/fu, wo a-chwáp ng ḿgbán eyên.
*Damîng bantông byiko ba-cít mě*.
123Achi ejí aa/kyee ebám ochwâp eyên mú wo a/ryí ocím.
124Tî mě eringe nyí kyijé eyên ńkyí kii*man*
a-tángê mě byije eyên.
125Me n-chi i ḿgbán eyên.
Kye mě bubong eringe nyí ndanyît byěm eyên
ḿbyí amu a-tángê e.
126Óburúkpâbí, nkéré oo/fyi mú adachi chwǒm,
ké nǎ, banet ba*fí ba-tî ng byije eyên*.
127Byije eyên mbyi byi-jê ng mě byi-shwôm gûl nang o-nwa nǎ.
128Ké bubwô ámbu, me mu n-chi i [kángkáng byěm ḿbyí amu a-sét ng.]
Kángkáng akwóp nyí aa*nwa* a-sa ng mě kafâ.
Okabe mú Byije-Óburúkpâbí etî
129Byěm eyên ḿbyí amu a-tángê e bii*nwa eri*.
Me mu n-chi i eringe byi/sét ne dyityém ejí kángkáng.
130Kyikû-byěm ḿbyí amu a-tángê e mbyi byi-tông ng kiinwángé,
ne mbyi byi-kyâ banet ḿbé baa*nyît chwǒm* bubong.
131Me mu n-shû ng kiǐnjáng ocím fúú,
ké nǎ, me mu n-ryuu ng byije eyên.
132Bírî a-kâm mě a-ri mě bafip
wǎ eringe nyí amu a-ri ng banet ḿbé wo amu a-jê ng kámbé.
133*Dabángê byibî byi-koo mě busa*.
*Da mě emîng n-róng* wǎ eringe nyí a/ryí ocím*.
134Nyii mě ké abwô nyí banet ḿbé mbe ba-cít ng mě,
eringe nyí me n/chi m-man echi ńkyí byije eyên byi/sét.
135Tông mě bushú eyên, a-jware mě,
a-tángê mě to byije eyên.
136Batíí mbe ba-byí i mě ba-pwó ng kyísí wǎ kace,
ké nǎ, banet ba*fí ba-chi i ńkyí byije eyên byi/sét*.
Byije-Óburúkpâbí bii*ryí Acît*
137Óburúkpâbí, wo amu a-chi i kanong.
Byije eyên bii*ryí acît*.
138Byije eyên ḿbyí a/kye byi/tyeem, ne mbyi kanong.
139Dyityém ejí ndyi dyi-mang ng mě wǎ okwâ,
ké nǎ, banet-bushwôn ejí mbe ba-kúng ng byije eyên fúú.
140Ocím eyên mú a/ryí, nang ké mu ké kafâ ntûntû,
o-jê ng mě kanong kanong.
141Me n*fí kiǐtí-onet*
ne baa*kúng mě wǎ chwǒm*
nké me n*fí n-né ng byěm ḿbyí amu a-tángê e mě*.
142Kanong eyên ńké amu a-chi i ka/chi ka-waa ne banyá,
ne byije eyên kángkáng nkéré mbyi ntûntû.
143Afaníkong ne káryúryú bii/sú mě ké byiko,
nké byije eyên mbyi byi-kyâ mě bunyîn-dyityém.
144Byiraa eyên ḿbyí amu a-sét ng mě mbyi ntûntû kángkáng nkéré.
Kye mě bubong ḿbú ndajwo,
ne me n/chi m-kpen.
Nshwam-Onyii
145Me mu n-kó ng ǒ ne dyityém ejí kángkáng.
Óburúkpâbí, faa mě ojá,
ne me n/chi n-tî byije eyên.
146Me mu n-kó ng ǒ.
Nyii mě, ne me n/chi n-tî byije eyên.
147Me mu n-jwóbê ng ne dyicí dyi-kûwángê,
n-kó ǒ n/fu, chwáp mě.
Me mu n-tî ng achi ejí ké ocím eyên mú a/ryí.
148Buchú bumúmú me mu sáre achi fúú,
n-kabe ng kyi-kim ne byiraa eyên ḿbyí amu a-sét ng.
149Ô Óburúkpâbí, ké bubwô ḿbú kyijé eyên ńkyí kii*man* jwo mě.
Byiko byikpú ǒ a-tî dyikpen ejí kanong.
150Bambên atyém ḿbé mbe ba-kyâ mě busông mbe ba-fárâng ng mě ba-bâ,
ḿbé mbe banet ḿbé ba*fí ba-tî ng byije eyên*.
151Nké wo, ǎ Óburúkpâbí, amu mě fáráng,
ne byije eyên kángkáng mbyi ntûntû.
152Me n/kwâa ké aje nyí a/shwôm ké esim kyi-kim ne byiraa eyên ḿbyí amu a-sét ng.
Wo a/chi kámbyí byi-waa ne banyá.
Arông etîm nyí Ochwâp
153Ri busông ejí a-nyii mě,
ké nǎ, me n*da/ráp byije eyên*.
154Bwom mě ké esim, a-chi mě n-fem.
Nyii mě eringe nyí a/ryí ocím.
155Bambên atyém baa*já onyii*
ké nǎ, mbé ba*fí ba-tî ng byije eyên*.
156Nké bafip ḿbé amu a-ri ng banet,
ǎ Óburúkpâbí, ba/rêe ba-shwôm.
Ri mě bafip a-nyii mě.
157Me mu ne banet-bushwôn chwóó
ne banet ḿbé mbe ba-cít ng mě,
nké me n*fí m-mîng ng byije eyên etî*.
158Nkéré m/bírî achi n-ri bannîm banet,
kyi*da mě enyîn* ké nǎ,
mbé ba*fí ba-tî ng byije eyên*.
159Óburúkpâbí, ri eringe byiraa eyên ḿbyí amu a-sét ng mbyi byi-nyîn n mě.
Kyijé eyên kii*yángê ne banyá*.
Ké bubwô ámbu, nyii mě.
160Dyishí-byije eyên ndyi [ntûntû],
ne kángkáng bampan ḿbé amu a-két ng ba-bwom m ké ntûntû ne banyá.
Byije-Óburúkpâbí efé
161Banet-busa mbe ba-nwa ng ne me dyikáá,
nké me mu n-fâ byije eyên.
162Me mu ké bunyîn-dyityém kanong kanong
ké bubwô-ecím eyên nyí a/ryí.
Me mu ké bunyîn-dyityém
wǎ onet mú o/koo byěm ké byití.
163Kángkáng byisédéng byi-sa ng mě kafâ
ne nn*ryuu kámbyí*
nké byije eyên mbyi byi-jê ng mě.
164Kángkáng dyicí, me mu n-kó ng ǒ asǎma kampén bujam
ké bampan ḿbé amu a-két ng kerededet.
165Banet ḿbé byije eyên mbyi byi-jê ng kámbé ba*fí ne chwǒm ńkyí badashî*
ne chwǒm kyi*fí ńkyí kyidachi kámbé ba-róng*.
166Óburúkpâbí, me mu m-bám m ǒ n/fu, nyii mě,
ne me n-chi i ńkyí wo a/kye busa.
167Me mu n-chi i byěm ḿbyí wo amu a-tángê e.
Mbyí mbyi byi-jê ng mě ne dyityém ejí kángkáng.
168Me mu n-tî ng byije eyên
ne byiraa eyên ḿbyí amu a-sét ng.
Wo amu a-ri ng kángkáng byěm ḿbyí mu n-chi i.
Nshwam-Ochwâp
169Óburúkpâbí, mîng bukyû ejí ḿbú mu n-tii ng
n-kó ng ǒ n/fu, chwáp mě, bu-kâm ǒ.
Kye mě bubong eringe nyí wo a/ryí ocím.
170Fwôo atông a-jwo nshwam ejí,
a-nyii mě eringe nyí a/ryí ocím.
171Me n/chi m-kpee ǒ kángkáng nkéré,
ké nǎ, wo amu a-tángê e mě byije eyên.
172Me n/chi n-kwán ekwan-akpee kyi-kim ne byije eyên,
ké nǎ, byije eyên bii*ryí acît*.
173Kpá byiko kángkáng nkéré ḿbyí ada mě echwáp,
ké nǎ, me mu n-chi i ńkyí byije eyên byi/sét.
174Ô Óburúkpâbí, me mu n-ryuu ng ochwâp eyên.
Me mu n-já ng bunyîn-dyityém ké byije eyên.
175Kye mě dyikpen eringe nyí nda ǒ ekpee.
Kyi/bát byiraa eyên ḿbyí amu a-sét ng byichwáp mě.
176Me mu n-yêe ng wǎ etám-ebû nyí ee/tánê.
Ké bubwô ámbu, bâ a-kyé mě me mú ḿgbán eyên,
ké nǎ, me n*da/ráp byije eyên*.
Currently Selected:
Sâm 119: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
