Sâm 118
118
Nshwam-Asǎma ekó ké Okpóge
1Kó n̂g Óburúkpâbí asǎma,
ké nǎ, nyǐ o/nwa,
ne kyijé emen kyi-waa ng ne banyá.
2Kyi/bát banet ḿbé Ézerel baraa ba/fu,
kyijé emen kyi-waa ng ne banyá.
3Kyi/bát banchi kyifen ḿbé Osówo baraa ba/fu,
kyijé emen kyi-waa ng ne banyá.
4Kyi/bát kángkáng banet ḿbé mbe ba-kyâ ǎ ofê baraa ba/fu,
kyijé emen kyi-waa ng ne banyá.
5Me n/kó Óburúkpâbí ké busông ejí.
Nyǐ o/faa mě ojá,
ne o/chi mě n-fem.
6Óburúkpâbí mu ne me.
Me mm*ba/chi n-shî*.
Ebóng ńkyí onet oda mě eman echi.
7Óburúkpâbí nké mu o-chwáp ng mě,
ne me m-man n-ri n/fu,
mm/kpógê banet-bushwôn ejí.
8Nkyi kanong ńkyí adafé dyityém ne Óburúkpâbí
kyi-shwôm ńkyí adajêem esim ne onet.
9Nkyi kanong ńkyí adafé dyityém ké Óburúkpâbí
kyi-shwôm ńkyí adajêem esim ne banet-ashí.
10Banet-bushwôn ejí chwóó ba/mû ba/wâng mě,
nké me m/man ne mbé ké busa ḿbú Óburúkpâbí.
11Mbé ba/mû ba/wâng mě ké byicê byimúmú,
nké me m/man ne mbé ké busa ḿbú Óburúkpâbí.
12Mbé ba/fyí mě ké byiko wǎ bakwan,
nké mbé ba/shí ochéé óchee wǎ aro nyí okwâ odashí.
Me m/man ne mbé ké busa ḿbú Óburúkpâbí.
13Banet-bushwôn ejí ba/rim bunwa ne me kanong kanong,
ne ba/mû ba-kú ba-kpógê ng mě,
nké Óburúkpâbí o/chwáp mě.
14Óburúkpâbí o/chi mě n-shwane,
n-firi ne busa.
Nyǐ o/nyii mě.
15Fwôo n̂g atông ba-jwo eringe nyí banet-Osówo
ḿbé mbe ké bampyep-byití ebe mbe ba-jêe ng ne ejá kyíbóng kyíbóng
ké okpóge mú mbé ba/kpógê, ba/fu,
kiǐtí-busa ńkyí Óburúkpâbí kii/chi kánkyí.
16Kiǐtí-busa emen ké byití kii/chi bě byi-kpógê.
17Me mm*ba/chi m-kpú*.
Me n/chi m-bwa m-kpen,
n-sét ńkyí Óburúkpâbí oo/chi.
18Nyǐ oo/kye mě busông kanong kanong,
nké nyǐ o*da mě emîng m-kpú*.
19Bâa n̂g mě afyi nyí kiǐtí-kyise-kyifen-Osówo echi
eringe nyí me n/chi n-nung n-kó Óburúkpâbí asǎma.
20Nyín dyifyi ńdyí Óburúkpâbí.
Banet ḿbé mbe ba-chi i kanong nké badaman enung ké kafâ.
21Óburúkpâbí, me n-kyâ ǒ akpee,
ké nǎ, wo a/jwo mě,
ne ké bubwô ḿbú wo a/chi mě m-kpógê.
22Ochíchí-buká ḿbú bambi byise ba/né ba/fu,
bu*da/byí chwǒm*
mbú nké boo/bírî bu/firi ḿbú bu/rêe bu-shwôm aká nyí áku kángkáng.
23Óburúkpâbí nké o/chi ńkyín.
Kyi/kaa banet byiko kanong kanong.
24Nyín dyicí ńdyí Óburúkpâbí o/kpógê.
Bâ n̂g byi-jêe byi-kyú ké bunyîn-dyityém.
25Óburúkpâbí, nyángê bě.
Ô Óburúkpâbí, chi bě byi-kyú kanong.
26Kyi/bát Osówo ojware onet mú mu o-bâ
ké dyizîn ńdyí Óburúkpâbí.
Be byi/jware běn nkéré mú ba-kú ba-nung ng
ké kafâ-kiǐtí-kyise-kyifen-Osówo echi.
27Óburúkpâbí o-chi i Osówo.
Nyǐ mu kanong ne be.
Kám m̂ biǐfúfú ké abwô ba-kpet ǎ ofê ekye,
ba-cen ba-wáp kyikit ńkyí badachi kyifen-Osówo.
28Wo nké amu Osówo ejí,
me mu n-kó ng ǒ asǎma.
Me n/chi n-sét kyi-kim ne eringe nyí a/rêe a-shwôm.
29Kó n̂g Óburúkpâbí asǎma,
ké nǎ, nyǐ o/nwa,
ne kyijé emen kyi-waa ng ne banyá.
Currently Selected:
Sâm 118: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
