Sâm 106
106
Kanong ńké Óburúkpâbí mu o-tông ng Banet Emen
1Kpee n̂g Óburúkpâbí.
Kó n̂g Óburúkpâbí asǎma,
ké nǎ, nyǐ mu kanong.
Kyijé emen nkyi ne banyá.
2Yeě odaman esét kángkáng biǐtí-byěm ḿbyí nyǐ oo/chi.
Yeě oda ǎ eman ekye akpee a-kwárê.
3Bunyîn-dyityém mbu ne banet ḿbé mbe ba-chi i ńkyí nyǐ mu o-sét ng,
ḿbé mbe ba-chi i ńkyí nkyi kanong.
4Óburúkpâbí, *da mě eráp*
ké nkéré a-kú a-chwáp ng banet eyên*.
Cibi mě ne mbé
ké nkéré a-kú a-nyii ng kámbé.
5Mîng mě n-ri kanong ńké bwǎn eyên,
n-kyú ké bunyîn-dyityém ebe,
n-jêe to ké akpee nyí ebe.
6Be bii/chi byibî wǎ eringe nyí banchí eten ḿbé kpákpá ba/chi.
Be bii/bên atyém byi-chi byibî-byěm.
7Banchí eten ḿbé kpákpá,
ḿbé ba/mû ké Éjip,
ba*da/nyît kyikû ne dyishí-biǐtí-byěm ḿbyí Osówo o/chi*.
Mbé ba/ráp kyijé ńkyí nyǐ o/tông kámbé kampén chwóó,
ne mbé ba-bírî bunwa ne [nyǐ mú o/rêe o-shwôm,]
ké baya ḿbé badakó Rêt.
8Nké nyǐ o/nyii kámbé eringe nyí nyǐ o/mû o/ryí kámbé ocím,
eringe nyí odatông kiǐtí-busa emen.
9Nyǐ o/nyán baya ḿbé badakó Rêt, ba-núng.
Nyǐ o-sí banet emen ba-nyáng ké esí nyí yéyé.
10Nyǐ o/nyii kámbé ké abwô nyí banet-bushwôn ebe o-chi kámbé ba-fem.
11Nké banet-bushwôn ebe ba/jé ké baya kángkáng.
Onet nang obónge o*da/waa*.
12Ne banet emen kâng ba-bángê ké ocím emen mú o/ryí kámbé,
ne ba-kwán ekwan-akpee ba-kye ǎ.
13Nké ka*da/bwom ne mbé ba-ráp ńkyí nyǐ oo/chi*.
Mbé ba*da/bwom o-kye kámbé bacê*.
14Atyém ebe a/mû a-ryuu ng byěm a-shwôm ké kyikim-dyikán,
ne mbé ba/kan Osówo.
15Nyǐ kâng o/kye kámbé ńkyí mbé ba/bí ǎ,
nké o/twóm kámbé to kyibî-orwôm.
16Orêm o/mû o-chi i kámbé ne Músis ne Éron,
mú ḿgbán mú onong mú Óburúkpâbí,
ányi ké kyikim-dyikán.
17Ké bubwô ámbu, esí e/nere e-myii kyikû-banet ńkyí Datân,
e-myii kyikû-banet ńkyí Ábyíram.
18Okwâ o/mang banet ḿbé ba/mû ne mbé ké kyikû,
o-shí byibî-banet ámbyi kángkáng.
19Mbé ba/mee orím-bukye wǎ mpong ké kaku-Sána
ba-kye kámú ofê wǎ Osówo.
20Mbé ba/yángê busan ḿbú Osówo ḿbú ragerage
ba-koo ḿbú orím-bukye mú enyam nyí edaryí biǐbyâa.
21Mbé ba/ráp Osówo mú o/nyii kámbé ké biǐtí-byěm ḿbyí o/chi ké Éjip.
22Nyǐ o/chi biǐtí-akat ké Éjip ḿbyí bii*nwa eri*.
Nyǐ o/chi byěm ḿbyí onet odawaa ocím ké dyishí fúú,
ké baya ḿbé badakó Rêt.
23Ké nkéré Osówo o/fu, nyǐ o-ju ng banet emen,
Músis mú mu ḿgbán mú nyǐ o/cá,
o/bwom bushwôn ne Osówo,
o*da/bángê kafâ ńké ka/mû ka-sa ng Osówo ka-ju kámbé*.
24Mbé kâng ba/né esí ányi nyí bunyîn-dyityém,
ké nǎ, mbé ba*da/bángê ké ocím mú Osówo o/ryí*.
25Mbé ba/kyú ké bampyep ebe ḿbé badabi ké kyídí ba-rime ké kyitông,
ba-né ejwo Óburúkpâbí.
26Óburúkpâbí o-kuri kámbé ekó kanong kanong kâng o/fu,
nyǐ o/chi o-ju kámbé ké kyikim-dyikán ánkyi,
27o-chi bwǎn ebe ba-pwôo byiryibyiryi
ké eshê nyí banshâng bakye,
o-mîng kámbé ba-kpú ké eshê nyí e*fí nyí ebe*.
28Banet-Osówo ba-da-kyú kâng ké Pôo
ba-kpet Bâl ofê ekye,
ba-ryí byiryíng ḿbyí ba/chi kyifen ba-kye erím-bakye
nyí e*fí ne dyikpen*.
29Mbé ba/buu Óburúkpâbí kafâ ké édúú ebe,
ne kyibî-orwôm kyi-róng kámbé.
30Nké Fyinéhas o/bûu o-bwom o-kye banet ḿbé ba/chi kyibî busông,
ne kyibî-orwôm ánkyi kyi-man.
31Banet ba-zîim m ńkyín nyáá ké kanong emen
ne ba-zîim m kánkyí kángkáng nkéré mú mu o-bâ.
32Mbé ba/chi kyi-sa Óburúkpâbí ké kaace ńké Meryíba,
ne Músis o/róng ké afaníkong ké bubwô ebe.
33Mbé ba/chi kyi-sa ǎ kanong kanong,
kyi-chi ǎ o-raa ńkyí o*da/man ebwom o-kabe*.
34Mbé ba*da/ju banet ḿbé ba/bángê ké bakye esháng*
wǎ eringe nyí Óburúkpâbí o/kye kámbé busa o/fu, bachi*.
35Nké mbé ba/bé abé ne mbé,
ba-kúng édúú ebe nyí baa*nyît Osówo*.
36Banet-Osówo ba/kye erím-bakye ofê,
ne ofê ámu o/cen kámbé ne bukyû.
37Mbé ba/kúng bwǎn ebe ḿbé banyinchéng ne ḿbé banyinyi ba-chi byifen ba-kye erím-bakye nyí Kínan.
38Mbé ba/ju bwǎn ámbe ḿbé ba*da/chi chwǒm*
ne ké bubwô ámbu, baróng ebe ba/bên esí.
39Mbé baa/bên byiko ebe ké ńkyí ba/chi éné,
ne ba*da/fé dyityém ne Osówo*.
40Óburúkpâbí ka/bírî ǎ kâng ne banet emen.
Nyǐ oo/ciring bwǎn emen.
41Nyǐ o/mîng kámbé ba-firi ké abwô nyí banet ḿbé ba/bángê ké bakye esháng,
ne banet-bushwôn ebe ba-firi ne busa ne mbé.
42Banet-bushwôn ebe ba/cít kámbé,
ne ba/mû ba/firi ké busa ebe ké kángkáng byěm.
43Óburúkpâbí o/nyii banet emen kampén kampén,
nké mbé ba/bángê ké bunwa ebírî ne nyǐ,
ne ba-nung ké byibî.
44Nang ké nkyi éné, Óburúkpâbí o/ri kámbé bafip
ké nkéré ba/tii bukyû ba/fu, ori afaníkong ebe.
45Ké bubwô ebe, nyǐ o/zîim ocím emen mú o/ryí o-sem byiko emen,
ne ké bubwô-kiǐtí-kyijé emen nyǐ o/yángê dyityém.
46Nyǐ o/chi banet ḿbé mbe ba-cít ng banet emen byiko byi-kpú kámbé ne mbé.
47Ô Osówo Óburúkpâbí mú eten, nyii bě,
a-fîm bě ké eshê nyí byimu,
a-bwa ne be esim,
eringe nyí be byida ǒ ekó asǎma,
byi-kpee dyizîn eyên ńdyí dyinong.
48Kpee n̂g Osówo Óburúkpâbí mú Ézerel.
Kpee n̂g ǎ kántîk ne ne banyá.
Nang yeě oraa o/fu, kyi/bát kyikyú éné.
Kpee n̂g Óburúkpâbí.
Currently Selected:
Sâm 106: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
