Sâm 107
107
Byikpee n̂g Kanong ńké Osówo
1Kó n̂g Óburúkpâbí asǎma,
ké nǎ, nyǐ mu kanong.
Kyijé ńkyí emen kyi-waa ng ne banyá.
2Ben kángkáng ḿbé nyǐ oo/nyii,
chi n̂g eraa ejá ńnyín ké akpee ba-kye Óburúkpâbí.
Nyǐ oo/nyii běn ké abwô nyí banet-bushwôn enen.
3Ne oo/fîm běn ké eshê nyí ba/mû bacinbánet
ké [bakô-ejíí bamúmú] o-bwa ne ben esim.
4Bakíri ba/yêe ké kyikim-dyikán ńkyí kyi*fí ne kiǐfáng*
ńkyí mbé badacen ba-jâ ké [oshê mú badakyú.]
5Esong e/nwa kámbé, omu o-jê kámbé,
ne mbé ba/zú dyityém kángkáng.
6Ne ké afaníkong ebe kâng,
mbé ba/kó Óburúkpâbí, ne nyǐ o/nyii kámbé.
7Nyǐ o/tông kámbé kiǐfáng ńkyí dángdáng
o-sí kámbé ba-ribi ké oshê mú mbé badakyú.
8Mbé ba-man ba-kó Óburúkpâbí asǎma
ké bubwô ḿbú kyijé emen ńkyí kii*man*
ne ké ḿbú biǐtí-byěm ḿbyí nyǐ oo/chi o-kye kámbé.
9Nyǐ mu o-kyâ omu o-kwárê banet ḿbé omu mu o-jê ng kámbé,
ne mu o-fâ banet ḿbé esong nyi e-nwa ng kámbé byěm ḿbyí byinong ké abwô.
10Banet bakíri ba/mû ba-kyú u ké kiǐtí-kyifip,
wǎ banet-bamgbokobá ḿbé ba/fé kámbé bamgbokobá,
11ké nǎ, mbé baa/bírî bunwa ne byije ḿbyí Osówo mú mu kyíbóng kyíbóng,
ne baa/né ńkyí nyǐ o/sét.
12Asa a/man kámbé ké bǎmkpóngé ḿbé ba/mû ba-sóng ng ba-shwôm.
Mbé ba/myii kyísí, onet mú odachwáp kámbé o*fí*.
13Mbé kâng ba-kó Óburúkpâbí ké bubwô ḿbú afaníkong ebe,
ne nyǐ o-nyii kámbé ké busông ebe.
14Nyǐ o/fîm kámbé ké kiǐtí-kyifip
o-két bamgbokobá ḿbé ba/mû ba/fé kámbé.
15Mbé ba-man ba-kó Óburúkpâbí asǎma
ké bubwô ḿbú kyijé emen ńkyí kii*man*
ne ké ḿbú biǐtí-byěm ḿbyí nyǐ o/chi o-kye kámbé.
16Ké nǎ, nyǐ mu o-sé ng afyi nyí ba/chi ké kiǐré,
o-bún n biǐré ḿbyí ba/mû ba/ku.
17Bakíri ba/mû wǎ enyam-banet,
ne mbé ba/mû ba-ri ng busông ké bubwô-byibî ebe
ne ké ḿbú byibî-atyém ebe.
18Mbé baa*ryuu eryí byiryíng nang byirá*.
Mbé ba/mû ba/firi fáráng ne bukyû.
19Mbé kâng ba-kó Óburúkpâbí ké bubwô ḿbú afaníkong ebe,
ne nyǐ o-nyii kámbé ké busông ebe.
20Nyǐ o/chi kámbé ba-nyange ké ejá emen,
ne o/nyii kámbé ké dyikun enung.
21Mbé ba-man ba-kó Óburúkpâbí asǎma
ké bubwô ḿbú kyijé emen ńkyí kii*man*
ne ké ḿbú biǐtí-byěm ḿbyí nyǐ oo/chi o-kye kámbé.
22Mbé ba-man ba-kó ǎ asǎma ké byifen echi ba-kye ǎ,
ne ba-man ba-sét ǎ ké ekwan nyí bunyîn-dyityém
kángkáng byěm ḿbyí nyǐ oo/chi.
23Bakíri ba/cen ké bǎnsukyíkang ké baya ḿbé baryên
ba-já ńkyí kyidachwáp dyikpen ebe.
24Mbé ba/ri ńkyí Óburúkpâbí odaman echi,
ne biǐtí-byěm to ḿbyí o/chi ké baya.
25Nyǐ o/kye busa ne bufú ḿbú buryên bu-kpet etugi,
bu-buu bunâng-baya.
26Bunâng-baya bu/yip bǎnsukyíkang bu-twóp kyíbóng
bu-shû ne mbé kyísí.
Asa a/man kámbé ké nkéré ba/firi ké dyizong-afaníkong ányi.
27Mbé ba/kpán ba-cíng wǎ bambwôm bato.
Kángkáng bubwô-bǎmkpóngé ebe
wǎ banfung kace bu*da/chîbyí chwǒm*.
28Mbé kâng ba-kó Óburúkpâbí ké bubwô ḿbú afaníkong ebe,
ne nyǐ o-nyii kámbé ké busông ebe.
29Nyǐ o/chi kyibî-bufú kyi-mîng etugi,
ne baya ba-mîng enáng.
30Baya ḿbé ba/mîng enáng ba/chi kámbé ba-firi ké bunyîn-dyityém.
Ne o-yip kámbé o-ribi ne mbé ké dyiga
ńdyí mbé mbe ba-ryuu ng.
31Mbé ba-man ba-kó Óburúkpâbí asǎma
ké bubwô ḿbú kyijé emen ńkyí kii*man*
ne ké ḿbú biǐtí-byěm ḿbyí nyǐ oo/chi o-kye kámbé.
32Mbé ba-man ba-sét wááng ké burwám-banet kyi-kim ne eringe nyǐ o/rêe o-shwôm,
ba-kpee ǎ ké ncibi mú banet-ashí.
33Óburúkpâbí o/chi buce bu-núng debédebé,
ne o/chi buce ḿbú mbu bu-byí i ké bǎmbwó bu-mîng esen.
34Nyǐ o/chi esí nyí enong e-firi bano báno
ké bubwô ḿbú byibî ḿbyí banet ḿbé ba/mû ba-kyú u ányi.
35Nyǐ o/yángê byikim-dyikán byi-firi biǐdé-omu,
o-yángê biǐyíyé-esí byi-firi ne buce ḿbú budasen.
36Nyǐ o/mîng banet-esong ba-kyú ké esí ányi,
ne mbé ba/bi oshê mú mbé badakyú.
37Mbé ba/kpang byifát ba-kwón byíkwôn,
ne mbé ba/fuu byíkwôn chwóó.
38Nyǐ o/jware banet emen ne mbé ba/já bwǎn chwóó.
Nyǐ o*da/bángê byitú ebe byi-bwa ocím ké esim*.
39Ké nkéré banet ba/kpógê banet-Osówo ne edángé ké ecábé ne busông,
40nyǐ o/kúng banet ḿbé mbe ba-cít ng kámbé wǎ *chí banet*
ne o-chi kámbé ba-kûzóp ké kyikim-dyikán ńkyí kiǐfáng kyi*fí*.
41Nké nyǐ o/nyii banet-kyikpu ké bafip ebe,
o-chi byikû-banet ebe byi-jê wǎ abóng-enyam.
42Banet ḿbé mbe ba-chi i kanong kyi/nyîn kámbé
ké nkéré mbé ba/ri ńkyín.
Nké banet ḿbé mbe ba-chi i byibî-byěm ba*da/man echîfaa ojá*.
43Kyi/bát banet ḿbé mbe ne bubong bakabe kyi-kim ne byěm ḿbyín.
Kyi/bát banyît kyijé ńkyí Óburúkpâbí ńkyí kii*man*.
Currently Selected:
Sâm 107: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
