Póróvep 9
9
Bubong ne Enyam eróng
1Bubong boo/bi kyise emen, bu-fé byikwap káchâtkányi ḿbyí kyise ánkyi. 2Boo/ju kyitú emen bu-kó dyijî, bu-chwáp bato ḿbé badabwóm, bu-tî ókpákpúrúk. 3Boo/twóm bǎmgbán emen ḿbé bwǎn-banyinyi bu/fu, babwom ké kyikit ńkyí kyi/nyâam kyi-shwôm ké oshê ba-kó ba/fu, 4bâ n̂g ké kafâ, ǎ banet ḿbé ba*fí ba-nyît ng chwǒm*. Ne mbu bu-sét ng enyam-onet bu/fu, 5bâ a-ba-ryí byiryíng ejí a-jwáp bato ḿbé badabwóm. 6Mîng ecen ne banet ḿbé ba*fí ba-nyît ng chwǒm* ne a-kpen. Cen ké bukwóp ḿbú byinyídíng.
7Â wo amu a-bîn n ntông byiko-onet, nyǐ o/chi o-shú ǒ. Â wo amu a-bîn n kyibî-onet, nyǐ o/chi o-mín ǒ. 8*Dachi a-bîn ntông byiko*. Kyi/chi kyi-sa ǎ ne wo. Nké â amu a-bîn n onet mú mu ne bubong, nyǐ o-kyâ ǒ ofê. 9Nang ebóng chwǒm ńkyí amu a-sét ng onet-bubong, kyi-chi i bubong emen bu-jê ojěng. Nang ebóng chwǒm ńkyí amu a-sét ng onet mú mu o-chi i kanong, kyi-sû ng byinyídíng emen.
10Â wo a/fu, a-já ng bubong, a-bwóp ng kpáá kashú a-chi ńkyí Óburúkpâbí mu o-sét ng. Â amu a-nyît ng ǎ nyǐ mú o/nwa o-shwôm, ányi wo amu ne byinyídíng. 11Bubong bu-sû ng dyikpen eyên aje. 12Wo nké adaryí mpún â amu ne bubong, nké â a/né kámbú, wo nké adari busông.
[ 13Enyam eróng nyi wǎ onyinyi mú o*fí ne éshwân* mú odaraa kyiraa kyíraa, chwǒm oo*nyît*.] 14Nyǐ mu o-kyú u ké ocím-dyifyi-kyise emen, o-kyú u ké kyichí ké kyikit ńkyí kyi/nyâam kyi-shwôm ké oshê, 15o-kó ng banet ḿbé mbe ba-shwôm m, ba-cen n kiǐfáng ńkyí ebe o/fu, 16bâ n̂g ké kafâ-kyise, ǎ banet ḿbé baa*nyît chwǒm* o-sét ng enyam-onet o/fu, 17omu ne byiryíng ḿbyí ba/jii ojǐng byi-nyîn n byi-shwôm. 18Banet ḿbé mbe ba-róng ng ké abwô emen ba*fí ba-nyît ng ba/fu, banet ḿbé mbe ba-câ ké kyise emen mbe ba-kpú u*. Ba*fí ba-nyît ng ba/fu, banet ḿbé baa/nung ké kyise ánkyi mbe kántîk ké oshê-bakúsí*.
Currently Selected:
Póróvep 9: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
