Póróvep 8
8
Akpee nyí a/já Bubong
1Fwôo n̂g atông ba-jwo. Bubong mbu bu-kó ng. Bubong mbu bu-ryuu ng bu/fu, bajwo kámbú.
2Mbú mbu bu-bwom m kyíbóng-eku ne ké ndûm ne ké akam-akwóp.
3Mbú mbu bu-kó ng ké dyishí-bukwóp ne ké bakô-ecím-afyi-oshê bu/fu,
4me mu n-kó ng nang yeě mú mu ké ejíí m-bí ng běn ben banet ḿbé ké ejíí n/fu,
5ben ba*da/kán ne*? Kwâa n̂g eringe nyí badakán. Ben bamu enyam? Kwâa n̂g eringe badakyú ne bubong.
6Jwo n̂g biǐtí-byiraa ejí. Kángkáng ḿbyí mu n-sét ng běn mbyi ntûntû.
7Ńkyí mu n-sét ng nkyi ntûntû. Me byisédéng bii*nyîn mě*.
8Kángkáng ḿbyí mu n-sét ng mbyi ntûntû. Kyi*fí* ńkyí kyi*fí ké kafâ* nang álángé a*fí*.
9Onet mú mu ne byinyídíng nkyi ǎ wááng. Onet mú oo/jwo byiraa kanong kanong nkyi ǎ to gbúúl.
10Koo ńkyí mu n-sét ng ǒ. *Dakoo akpuga*. Koo byinyídíng, a-né akpuga nang a/nwa nǎ.
11Me bubong. Me mu n-nwa ng n-shwôm byibwáng. Chwǒm ńkyí amu a-ryuu ng kyi*fí ńkyí adakan ne me*.
12Me bubong, ne mu ne dyishí. Me mu ne byinyídíng ne okabe mú onong.
13Byibî byi/ciring mě, ké nǎ, mu n-fâ Óburúkpâbí. Byiko etông ne akpee ekyé ne byibî-édúú ne byisédéng byi-sa ng mě kafâ.
14Me n-kabe ng ńkyí ndachi ne n-chi kánkyí. Me mu ne byinyídíng ne busa.
15Me mu n-chwáp ng batu ba-tún oshê, ba-chi byije ḿbyí byinong.
16Otu-dyishí ne onet-dyishí nang orá ké ejíí mu o-kúng ng ochwâp ejí o-níbî oshê.
17Banet ḿbé me mu n-jê ng kámbé, ba-jê ng mě. Nang yeě nké mu o-kyé ng mě, o-ri ng mě.
18Me mu ne esang chwóó ne ofê ne kanong ḿbyí ndakye.
19Ńkyí adakoo ne me kyi/nwa kyi-shwôm nang ebóng gûl. Kyi/nwa kyi-shwôm syílyíba nang orá.
20Me mu n-cen n ké bukwóp ḿbú kanong echi. Me mu n-cen n ké kiǐfáng ńkyí kii*ryí acît*
21n-kyâ banet ḿbé me mu n-jê ng kámbé esang, n-fâ byěm ḿbyí byinong ké byise ebe pwat.
22Me nké Óburúkpâbí o/bwóp kashú o-chi ké kángkáng byěm. Me mu mbwôp kashú-bǎmkpóngé emen ké aje nyí a/shwôm ké esim.
23Me ba/chi mě ké kiimkpet kyikû, ké mbwôp kashú ne ejíí e-kpet.
24Ba/fwon mě ne ba-kûchi baya ḿbé baryên ké nkéré mú buce bu/mû bu*fí ne omu*.
25Ba/fwon mě ba-sí eku. Ba/fwon mě ne ba-kûtî ecím-eku ké byikit ḿbyí nyǐ nyi,
26ne Osówo o-kûchi ejíí ne byifát ḿbyí mbyi ké nyǐ, nang ne o-kûchi mbwôp kashú-dyikwâ-ecing.
27Me m/mû ányi ké nkéré o/chi bubóng ne ké nkéré o/paam kámbú o-cít baya ḿbé baryên
28ne ké nkéré o/fé ófíbí ké bubóng ne ké nkéré o/chi bambwo ba-kpet ebyí omu o-kûsú baya ḿbé baryên
29ne ké nkéré o/kye busa o/fu, baya ḿbé baryên ba*dasú ba-shwôm eringe nyí nyǐ o/sét*. Me m/mû ányi ké nkéré o/kpet byikû ḿbyí ejíí.
30Me m/mû n/fárâng ǎ wǎ [mbi byise.] Me m/mû ǎ chwǒm-bunyîn-dyityém kángkáng dyicí. Me m/mû ké bunyîn-dyityém ké bushú emen kángkáng nkéré,
31n-jêe ng kyi-kim ne ejíí, kyi-nyîn n mě ne banet-ejíí.
32Kántîk, ǎ bwǎn ejí, fwôo n̂g atông ba-jwo mě. Chi n̂g eringe nyí mu n-sét ng, ne ben ba/chi ba-kyú ké bunyîn-dyityém.
33Tî n̂g atông ké ńkyí ba/tángê běn. Kyú n̂g ne bubong. *Da n̂g ené kámbú*.
34Onet mú mu o-jwo ng mě, mú mu o-kyú u ké ocím-dyifyi ejí kángkáng dyicí o-bám m mě, o/chi o-kyú ké bunyîn-dyityém.
35Onet mú mu o-kyé ng o-ri mě, mu o-kyé ng dyikpen, ne o-nyîn n Óburúkpâbí dyityém.
36Onet mú o*fí o-kyé ng o-ri mě* mu o-bên n byiko emen. Onet mú me mu n-sa ng ǎ kafâ, bukyû mbu bu-nyîn n ǎ.
Currently Selected:
Póróvep 8: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
