Póróvep 7
7
1Wǎn ejí, kûzîim ńkyí mu n-sét ng ǒ. *Dachi a-ráp ńkyí mu n-sét ng ǒ n/fu, chi*. 2Chi ńkyí mu n-sét ng ǒ, ne wo a/chi a-kpen. Tî ńkyí mu n-tángê e ǒ wǎ eringe nyí amu a-tî ng achi eyên. 3Ńkyí mu n-tángê e ǒ kyikyú ǒ ké byiko kángkáng nkéré. Sáng kánkyí a-fé ké dyityém. 4Tún bubong wǎ wǎn-ńnân, a-tún byinyídíng wǎ ocín-dyityém eyên. 5Mbyí byi/chi byi-bám ǒ ké banyi-banet ne ké banyinyi ḿbé mbe ne bunyîn-ejá nyí edanîm onet o-róng.
Onyinyi mú mu o-chi i Byibî-Byěm
6Ńdyí mu n-tún n achi kyíjí nkéré obónge ké wíndu ejí, 7n/ri byisu-banyinchéng chwóó ḿbé ba*da/nyît ne chwǒm* nké n/ri enyam-onet ké burwám ebe. 8Nyǐ o/mû o-cen n ké kyiká-oshê o-câ fáráng ké bukô-kyikit kyibónge ńkyí onyinyi obónge o/mû o-kyú u. Nyǐ o/mû o-shwôm m fáráng ké kyise-onyinyi ámu 9ké dyikurúku, ńdyí kyifip kii/jîi. 10Mú onyinyi o-kâm ǎ. O/mû o/bwá byídí wǎ onyinyi-akpara, ne o/mû o-kabe ng ńkyí odachi. 11Nyǐ o/mû onyinyi mú oo*shî* o-cen n ké byiká-oshê éshwân ee*chi ǎ*. 12O-bwom m o-bám m ké bukô-kyikit, nkéré okíri ké byiká-oshê, nkéré okíri ké ntim-kasî. 13O-kpárê mú onyinchéng ámu abwô, o-fé ǎ ocím, o-tún ǎ achi ké bushú, o-raa o/fu, 14me n/chi kyifen kurún, n-tî enyam-kyifen ánkyi. 15Ké bubwô ámbu, m/byí mu n-kyé ng ǒ. M/mû n-ryuu ng n/fu, n-ri ng ǒ. Kántîk nn/ri ǒ. 16Nn/nap karíng ejí ne okpówo mú onong mú o/fím Éjip. 17Me mm/pwó kyinung-byěm ḿbyí badakó mîi ne álos ne sínamon ké nké. 18Bâ byi-dim byi-da-rí ne barî tete dyi-cé. Be byi-kyú u ké bunyîn-dyityém ké abwô nyí orî. 19Otyép ejí o*fí ké kyise*. Oo/dim bucen ḿbú tete. 20O/dim ne akpuga chwóó, ne oo*ba/chi o-fyi nang ké byipyán byifee*. 21Ké bunong emen ne ké bunyîn-ejá emen, o-nîm mú onyinchéng o-bángê ne nyǐ. 22Ké abe ányi, o-dim ne nyǐ ké kyikû wǎ mpong mú mu o-wâa ng ba-ju kámú, [wǎ enyam nyí ee/róng ké kaǎtám] 23ba-tím kányí dyibán ké dyityém ne wǎ kanurung ńké nke ka-wâa ng eróng ké kaǎtám. Nyǐ o*da/nyît o/fu, dyikpen emen dyi/firi ké bukwóp-bukyû*.
24Kántîk kâng, ǎ bwǎn ejí, jwo n̂g mě. Tî n̂g atông ba-jwo ńkyí mu n-sét ng. 25*Da n̂g ebángê dyityém enen dyi-firi ké dyizong-onyinyi ándyi*. *Da n̂g eyêe ne nyǐ ké kyikû*. 26Nyǐ nké oo/bên banyinchéng chwóó, ne oo/cen ne banet chwóó ḿbé baa*nwa epan* ne bukyû. 27Â a/ce ké kyise emen, wo a/firi ké kiǐfáng-oshê-bakúsí. Ányi nké adawá ekpú.
Currently Selected:
Póróvep 7: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
