Póróvep 6
6
Ekó ekuri
1Wǎn ejí, wo aa/ryí ocím a/fu, wo a-tû ng dyifwá ńdyí onet okíri? 2Ejá eyên ee/chi ba-kám ǒ? Ocím eyên mú a/ryí oo/chi ba-kám ǒ? 3Â nkyi éné, ǎ wǎn ejí, wo a/firi ké busa ḿbú onyinchéng ámu. Nké nyín něen bukwóp ḿbú a/chi a-cen ne a-fem ké nkyí, ca babap a-kâm ǎ, a-tîm ǎ arông o-zú ǒ abwô. 4*Dachi a-rê burê* a-kye byiko eyên nang dyijâng*. 5Fem ké kaǎtám wǎ kanurung ne wǎ enyam nyí edafem nryuu dyikán.
6Banet-adare bakwâa chwǒm kyi-kim ne dyikpen ńdyí ejujware nyi e-kyú u. 7Nyǐ e*fí ne onet-dyishí* nang otu* nang otu-dyishí* 8nké nyǐ nyi e-tî ng byiryíng ké nkéré mú burwom, e-kpá ng byiko ḿbyí kyifang. 9Onet-dyidare o-rí i ka-bwon nǎ ké karíng. Nkéré orá mú nyǐ o/chi o-bûu nensang. 10Nyǐ o-fu ng o/fu, me n-nya ng achi kpá. Mîng mě n-fút abwô n-jáng ké kaǎnyín-nkéré. 11Nké ké nkéré nyǐ o-kú o-rê ng, kyikpu kyi/chi kyi-kám ǎ wǎ onet-kajii mú o/níbî byěm-bunwa.
12Bambên atyém-banet ḿbé ba*da/byí chwǒm* mbe ba-yêe ng ba-sét ng byisédéng. 13Mbé mbe ba-cít ng dyichi dyibónge ba-tông ng barî ekap nyí bada ǒ enîm, 14kángkáng nkéré ba-nam m byibî-byěm ké byibî-atyém ebe, ba-cen n ne byiraa ké kángkáng byikit. 15Ké bubwô ḿbún, afaníkong a/chi a-róng kámbé nang ekpu baa*tî* ne mbé ba/chi ba-némê kyibî-onéme.
16-19Byěm mbyi káchâtkányi ḿbyí bii*nyîn Óburúkpâbí* ne byi-sa ng ǎ kafâ. Mbyi něen,
dyitûn ńdyí byiko etông
ne kabyíbabang-byisédéng
ne abwô nyí nyi a-ju ng banet ḿbé ba*da/chi chwǒm*
ne dyityém ńdyí ndyi dyi-nam m byibî-byěm echi
ne byiká ḿbyí mbyi byi-dûu ng byi-dim byibî echi
ne ntûesé mú mu o-sét ng byisédéng o-nye ng o-fâ
ne onet mú mu o-cen n ne byiraa ké burwám-bacín emen.
Ekó ekuri kyi-kim ne Kyinam
20Wǎn ejí, chi ńkyí ńchân mu o-sét ng ǒ. *Dachi a-ráp ńkyí ńnân o/tángê ǒ*. 21Tî byiraa ebe kángkáng nkéré ké dyityém eyên. 22Byěm ebe ḿbyí mbé mbe ba-tángê e ǒ byi/chi byi-sí ǒ ké bucen, byi-ku ǒ ne buchú, byi-kye ǒ bacê ne esû. 23Byiraa ebe mbyi kiinwángé ńkyí ragerage. Ńkyí mbé mbe ba-tángê e ǒ dyishí kyi-man n ǒ etángê eringe nyí adakyú dyikpen. 24Kyi-man n ǒ echi aa*kyú fáráng ne byibî-banyinyi* a-fem ké bunyîn-ejá nyí banyi-banet, nyí eda ǒ enîm a-chi kyibî. 25Bunong ebe bu*da ǒ enîm*. Achi ebe esii a*da ǒ enîm a-róng*. 26Onyinchéng o-man n ekó onyinyi-akpara ké kyirim-berêt, nké kyinam echi kyi-bên n ǎ kángkáng byěm ḿbyí mu ne mbyí.
27Wo a-man n eyip okwâ a-bât ké kakim aa*shí byídí eyên*? 28Wo a-man n ecen ké amánge-okwâ aa*shí ǒ byiká*? 29Kyi/bên to ńkyí adarí ne onyi-onet. Nang yeě nké mu o-rí i ne onyi-onet o/chi o-ri busông. [ 30Banet ba*fí ba-bîn n njii kajii mú o/jii byiryíng ké nkéré esong e-kú e-nwa ng ǎ*.] 31Nké â ba/kám ǎ, nyǐ o-ré ng dyifwá ńdyí dii*nwa eri*. O-kyâ kángkáng byěm ḿbyí mu ne mbyí. 32Nké onet mú mu o-chi i kyinam o*fí ne bubong*. Nyǐ mu o-bên n byiko emen. 33Ba/chi ba-fé ǎ éshwân ba-mín ǎ. Éshwân emen ee*man*. 34Otyép o-sa ng kafâ o-shwôm ké nkéré onyinchéng okíri o-kú o-kyú u ne onyi emen. Ewa nyí odafu nyǐ o-só ng e*fí ne bunyerenyere*. 35Nang a-ré ǎ a-kye nǎ oo*koo*. Eyáré nang e-kyú nǎ ee*chee dyityém emen*.
Currently Selected:
Póróvep 6: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
