Póróvep 5
5
Ekó ekuri kyi-kim ne Kyinam echi
1Wǎn ejí, fwôo atông a-jwo bubong ne byinyídíng ejí, 2eringe nyí wo a/chi a-nyît édúú nyí enong, ne ejá eyên e/chi e-tông e/fu, wo amu ne bubong. 3Byibî-ocím ḿbyí onyi-orî-onet byi-man n enyîn wǎ bakút-bukwan, ne ocím emen efé o-man n ekyú fwámfwám wǎ bakút, 4nké ké nkuli kyikû, nyǐ oo*mîng ǒ ne chwǒm* kyi-cibi ne buruu ne busông*. 5Nyǐ o-kúng ng ǒ a-jâ ké oshê-bakúsí. Kiǐfáng ńkyí nyǐ mu o-cen n kyi-chi i kiǐfáng-bukyû. [ 6Nyǐ o*fí o-cen n] ké kiǐfáng ńkyí dyikpen* nké mu o-yêe ng o-jâ kyicê kyikíri, ne o*fí o-nyît ng ńkyí nkyi kyi-chi i*.
7Kántîk, ǎ bwǎn ejí, jwo n̂g mě ne *da n̂g eráp ńkyí mu n-sét ng běn*. 8*Da n̂g ekim dyizong-onyinyi ámu*. *Da n̂g eking ba-fárâng ne dyifyi-kyise emen*. 9Â ben ba/chi éné, banet bakíri ba/chi ba-já ofê mú ben ba/mû ne mǔ, ne ba/chi ba-kpú ne bubwásíng ké abwô nyí banet ḿbé baa*ri banet bafip*. 10Bacinbánet ba/chi ba-yip esang enen kángkáng, ne ńkyí ben baa/chi bǎmkpóngé ne ba-já kyi/chi kyi-firi ńkyí onet okíri. 11Ben ba/chi ba-rí ké karíng-bukyû ba-kûbyé ké nkéré enyam-byiko ne busa enen byi-kú byi-man n byi-câ. 12Ne nang yeě o/chi o-raa o/fu, ebóng kyi/chi ńkyí n*da/kwâa chwǒm*. Ebóng ńkyí n*da/bángê ba-tángê mě dyishí*. 13Me n*da/jwo banet ḿbé mbe ba-tángê e mě*. Me n*da/tî atông n-jwo kámbé*. [ 14Kántîk, éshwân ee/wuri mě] ké ókâp-banet.
15Kye onyi eyên ofê kǎnchí, nyǐ nké nke ojê ǒ. 16Bwǎn ḿbé adafwon ne banyinyi bakíri baa*chwáp ǒ*. 17Bwǎn eyên nké badakán ba-chwáp ǒ, *chí bacinbánet*. 18Ké bubwô ámbu, wǎn-onyinyi mú a/bé, ojê ǒ, a-kyú ké bunyîn-dyityém ne nyǐ, 19mú mu o-nwa ng bunong wǎ etong. Bunong emen butî ǒ ké bunyîn-dyityém. Kyijé emen kyiwaa ǒ ké byiko. 20Wǎn ejí, ebóng ńkyí adatông onyinyi okíri kyijé eyên. Ebóng ńkyí adaryuu bunong ḿbú onyi-onet okíri. 21Óburúkpâbí mu o-ri ng kángkáng ḿbyí amu a-chi i. Nyǐ mu o-tún n ǒ achi nang nyá nké amu a-câ. 22Byibî ḿbyí mbên dyityém byi-chi i kaǎtám. Nyǐ oyén mu o-róng ng ké kaǎsém ńké byibî emen. 23Nyǐ mu o-kpú u, ké nǎ, nyǐ o*fí o-man n ekám byiko emen*. Enyam emen nyí mu o-róng ng e-chi i ba-fé ǎ ké dyikun.
Currently Selected:
Póróvep 5: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
