Póróvep 4
4
Kanong ńké nke ké Bubong
1Bwǎn ejí, jwo n̂g ńkyí ńchân mu o-tángê e běn. Tî n̂g atông ba-jwo ǎ, ne ben ba/chi ba-já byinyídíng. 2Ńkyí me mu n-tángê e běn nkyi kanong. Ké bubwô ámbu, kû n̂g ezîim kánkyí kángkáng. 3Me m/mû wǎn-dyityém mú bonchí ne boné ejí. Ké nkéré m/mû wǎsíng kyísí, 4bonchí ejí o/mû mu o-tángê e mě byěm. Nyǐ o/mû o-sét ng mě o/fu, zîim ńkyí me mu n-sét ng ǒ. *Daráp kánkyí ne banyá*. Chi eringe nyí me mu n-sét ng ǒ ne wo a/chi a-kpen. 5Já bubong ne byinyídíng. *Daráp* a-né nang oné ńkyí me mu n-sét ng ǒ*. 6*Dachi a-né bubong* ne mbú bu/chi bu-ku ǒ. Bubong bujê ǒ, ne mbú bu/chi bu-bám ǒ. 7Bubong ejá nkyi kiǐtí-chwǒm ńkyí adachi. Nang ebóng chwǒm kyikíri ńkyí amu ne nkyí, já byinyídíng. 8Bubong bujê ǒ, ne mbú bu/chi bu-chi ǒ a-firi kiǐtí-onet. [Bukyú ǒ kiǐtí-chwǒm,] ne mbú bu/chi bu-bâ ǒ ne ofê. 9Mbú bu/chi bu-kyú ǒ wǎ etam-butu nyí enong.
10Wǎn ejí, tî atông a-jwo mě. Kúng ńkyí me mu n-sét ng ǒ wǎ kiǐtí-chwǒm, ne a/chi a-kpen a-tíbî. 11Me nn/tángê ǒ bubong ne bukwóp-dyikpen ekyú ḿbú bunong. 12Chwǒm kyi*fí ńkyí kyida ǒ eku* â amu a-cen n ne bubong* ne aa*kpán dyícíring* ké nkéré a-kú a-zóngê e ochéé*. 13Kángkáng nkéré, zîim ńkyí aa/kwâa. Byěm eyên ḿbyí amu a-kwâa ng nké mbyi dyikpen eyên. Tún kámbyí kanong. 14*Dace kyicê ńkyí byibî-banet mbe ba-câ*. *Dakúng kyiká-bucen ńkyí bambên atyém*. 15*Dachi a-chi kánkyí*. *Dabwom fáráng ne byibî*. Né byibî. Ca ké bukwóp ḿbú eyên. 16Bambên atyém baa*rê* â ba*da/chi ne kyibî-chwǒm*. Mbé ba-waa ng achi fúú tete ba-chi onet kyibî. 17Dyityém ebên ne anwa mbyi kámbé wǎ byiryíng ne bato.
18Kiǐfáng ńkyí banet ḿbé mbe ba-chi i kanong mbe ba-cen n nkyi wǎ óbyísû-dyicófóróng mú mu o-wángê e o-bâ tete dyicí dyi-wángê. 19Nké kiǐfáng ńkyí bambên atyém nkyi kyifip kyífip wǎ buchú. Mbé mbe ba-myii ng, nké baa*man eri chwǒm ńkyí mbé ba/kpán ké nkyí*.
20Wǎn ejí, tî atông a-jwo ńkyí me mu n-sét ng ǒ. Jwo byiraa ejí. 21*Dachi a-mîng kámbyí byi-fem ǒ ne banyá*. Kûzîim kámbyí a-tî kámbyí ké dyityém eyên. 22Mbyí byi-kyâ nang yeě mú mu o-nyît ng kámbyí dyikpen ńdyí dyinong. 23Bwom chee a-kabe. Okabe eyên nké mu wǎ dyijwáng ńdyí dyikpen eyên. 24*Dachi a-raa chwǒm nang kyibónge ńkyí kyi*fí ntûntû*. *Dakyú ne abwô ké byisédéng* ne ké byiraa ḿbyí byi*fí ké kafâ*. 25Achi eyên akûtún kashú káshu. *Dafé dyishí eyên éshwân*. 26Kabe kanong kanong kyi-kim ne ńkyí amu a-chi i, ne nang ebóng chwǒm ńkyí amu a-chi i kyi/chi kyi-kyú kanong. 27Mîng byibî, a-cen dángdáng a-ca kashú. *Dachi a-monge a-mîng ochíchí-bukwóp*.
Currently Selected:
Póróvep 4: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
