Póróvep 29
29
1Osówo o/chi o-shiryi ǒ aa*bûu to* â wo amu a-rêe ng dyityém a-câ kashú aa*jwo bacê*.
2Tông mě onet-dyishí mú mu o-chi i kanong ne me n/chi n-tông ǒ banet ḿbé mbe ké bunyîn-dyityém. Tông mě mbên dyityém-onet-dyishí ne me n/chi n-tông ǒ banet ḿbé ba*fí ké bunyîn-dyityém*.
3Bonchí eyên o-tông ng byiko kyi-kim ne wo â bubong mbu bu-nyîn n ǒ. Nkyi chwǒm-enyam eróng ńkyí adabên akpuga ké banyinyi-akpara.
4Oshê o-kyú u shwanshwan ké nkéré otu oo/bwom o/fu, nyǐ oo*ryí acît* nké nyǐ o-bên n oshê emen â o/bwom ké ngu eryí.
5Â amu a-kpee ng bacín eyên, ányi wo amu a-kuu ng kaǎtám a-tî [byiko eyên.]
6Byibî-banet mbe ba-róng ng ké kaǎtám ńké byibî ebe, nké banet ḿbé mbe ba-chi i kanong ba-câ kashú mbe ké bunyîn-dyityém.
7Onet mú mu o-chi i kanong o-nyît ng ńkyí kyi/já onet-kyikpu, nké bambên atyém baa*nyît azong-byěm ányi*.
8Banet ḿbé baa*kúng barî-banet wǎ chwǒm* mbe ba-fâ oshê ké afaníkong. Banet ḿbé mbe ne bubong mbe ba-tî ng byěm chee.
9Â onet mú mu ne bubong mu o-kán n ké dyishí ne enyam-onet, enyam-onet ányi o-jwó ng ǎ éjwô e-câ kashú.
10Banju banet ba-sa ng kafâ ne nang yeě mú odasét ntûntû, nké banet ḿbé mbe ba-chi i kanong ba/chi [ba-ku] dyikpen ńdyí dyizong-onet ámu mú odasét ntûntû.
11Enyam-banet e-tông ng kafâ esa ebe wááng, nké banet ḿbé mbe ne bubong ba-kám m busa-dyityém ebe degere.
12Â onet-dyishí mu o-jwo ng byiraa ḿbyí byi*fí ké kafâ* kángkáng banet-bǎmkpóngé emen ba-firi ng bansêt byisédéng.
13Onet-kyikpu ne onet mú mu o-cít ng ǎ mbe eringe ebónge. Óburúkpâbí nké o/kye kámbé achi ashí amúmú.
14Otu o-kyú u otu ka-rí kanong kanong â nyǐ mu o-pan n banet-kyikpu mpan mú acît eryí a*fí*.
15Byimirî ne dyishí etángê byi-chwáp ng bwǎsíng. Â wǎn mu o-chi i eringe kyi/nyîn ǎ, o-chi i boné emen o-firi ne éshwân kyi-kim ne nyǐ.
16Ké nkéré busa-oshê bu/firi ké abwô nyí byibî-banet, byibî byi-bwât ng byi-jê, nké banet ḿbé mbe ba-chi i kanong ba-man ba-ri ba/fu, azong-banet ámbe baa/róng.
17Tángê wǎn eyên dyishí ne wo a/chi a-kûtông byiko kyi-kim ne nyǐ kángkáng nkéré. Nyǐ oo*chi chwǒm ńkyí kyi/chi kyi-fé ǒ éshwân*.
18Oshê mú Osówo o*fí o-tông ng kámú bukwóp* mu oshê mú byěm bii*ce kanong*. Bunyîn-dyityém mbu ne onet mú mu o-tî ng byije ḿbyí Osówo.
19Wo aa*man etángê ḿgbán eyên dyishí ké kyiraa eraa nkyí nkyi ne nyǐ* ké nǎ, nyǐ o-man n ejwo kánkyí, nké oo*fé kánkyí ké dyityém*.
20Enyam-onet mu kanong o-shwôm onet mú o*fí o-kabe ng ne o-raa*.
21Dyicí dyibónge, ḿgbán eyên [o/chi o-koo byěm eyên kángkáng ḿbyí amu ne mbyí,] â wo amu a-kyâ ǎ nang ebóng chwǒm ńkyí nyǐ mu o-ryuu ng kyi-fím ké nkéré nyǐ o/mû kaǎwásíng.
22Banet ḿbé kadasa kámbé babap ba-cen n ne ashwôn ne afaníkong chwóó.
23Byiko etông byi-bwa ng ne wo kyísí, nké ba-kyâ ǒ ofê â amu degere.
24Ncen ne onet-kajii nké mu kyibî-onet-bushwôn mú onet-kajii ámu. Ba/chi ba-kye ǎ busông ké esuk â nyǐ o/sét ntûntû, ne Osówo o/chi o-shú ǎ kyibî-kyishû â nyǐ o*da/sét ntûntû*.
25Achi nyí banet eshî a-cen n ne bukyû, nké â a/tî dyityém eyên ké Óburúkpâbí, chwǒm kii*ta ǒ*.
26Nang yeě mu o-ryuu ng kanong echi ńké onet-dyishí, nké Óburúkpâbí kǎnchí nké odakét mpan mú ntûntû.
27Banet ḿbé mbe ba-chi i kanong ba-sa ng bambên atyém kafâ. Bambên atyém ba-sa ng banet ḿbé mbe ba-chi i kanong kafâ.
Currently Selected:
Póróvep 29: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
