Póróvep 26
26
1Ofê o*da/bát enyam-onet* wǎ eringe nyí abíp a*da/bát burwom* ne omu ena o*da/bát ké nkéré-byiryíng efuu*.
2Byishû bii*bán* â byi*da/tyeem ne wo*. Mbyí mbyi wǎ bunurung ḿbú mbu bu-byí i obyî óbyi, boo*tû*.
3Kyi/kwárê ńkyí badasît kabyî-orá kachí, ne ńkyí badafé kaanyam-atû kaǎkím-kaǎré ké ocím, ne ńkyí badamín enyam-onet.
4Â wo a/faa enyam-ḿbím, ányi wo amu enyam wǎ onet mú o/bí kámú.
5Faa enyam-ḿbím ne enyam-kyiraa, ne onet mú o/bí kámú o/chi o-nyît o/fu, nyǐ o*fí ne bubong wǎ eringe nyǐ mu o-kabe ng*.
6Kyi-nwa ng ńkyí onet mú mu o-twóm m enyam-onet kyitwóm odakét byiká emen. Dyizong-onet ámu mu o-kyé ng afaníkong.
7Enyam-onet o-man n etím dyitím-ekan kanong kanong wǎ eringe nkwa-onet odanyît eringe nyí odatî byiká emen.
8Onet mú mu o-kpee ng enyam-onet mu wǎ onet mú mu o-bwá ng buká ké katapôt.
9Dyitím-ekan ńdyí ndyi dyi-fím m ké ocím mú enyam-onet ndyi wǎ mbwôm bato mú mu o-kan n kyiwong efîm ké bubwô.
[ 10Nkoo banet ké bǎmkpóngé mú mu o-koo ng enyam-onet nang orá ké bǎmkpóngé mu o-némê e nang yeě mú mu ányi.]
11Enyam-onet mú mu o-chî ng enye enyam-chwǒm mu wǎ kabyî ńké nke ka-bwa ng esim ké éfâm nyí ka/fám.
12Onet mú o/róng enyam kanong kanong mu kanong o-shwôm onet mú mu o-kabe ng o/fu, nyǐ mu ne bubong, ofî bu*fí ǎ*.
13Ebóng ńkyí onet-dyidare mu o-waa ng ké kyise, kyíjí oo*byí*. Nyǐ mu o-shî ng ebóng chwǒm. Mu o-shî ng ekpang dí.
14Onet-dyidare mu o-bírî ng ké karíng emen. Nyǐ oo*tíbî o-shwôm karíng emen* wǎ dyifyi ńdyí ndyi dyi-náng ng ké bankâm emen.
15Banet bakíri mbe ba-dare ng dyidare ńdyí baa*man efé nang byiryíng ké ocím*.
16Onet-dyidare o-kabe ng o/fu, nyǐ mu ne bubong o-shwôm banet ashí bujam ḿbé badaman esét kanong kanong kyi-kim ne okabe mú ebe.
17Onet mú mu o-fâ abwô ké okân ké dyishí mú o*da ǎ ekim* mu wǎ onet mú o/kám kabyî ké atông.
18-19Onet mú mu o-nîm m orî-onet o-waa ányi o-fu, nyǐ o/mû mu o-chi i acáá mu wǎ onet-kyifún mú mu o-chi i acáá ne kyibî-kyiyám.
20Â ekwón e*fí* okwâ o-rîp ng. Ne â eram e*fí* ashwôn a-man n.
21Ecíbí e-chi i amánge-okwâ a-waa ne okwâ. Ekwón e-chi i okwâ o-chîmang, ne ncen ne byiraa o-chi i okân ké dyishí o-ca kashú.
22Byiraa-eram byi-nyîn n kanong kanong, ne mbyi byi-nung ng bě ké byiko ne kyijé.
[ 23Bunyîn-ejá] ḿbú mbu bu-rôo ng ńkyí wo amu a-kabe ng mbu wǎ [bukye] ḿbú badasabe ké katí-ecing.
24Nnîm banet o-rôo ng busa-dyityém emen ké bunyîn-ejá emen. 25Byiraa emen byi-man n enyîn ejwo, nké *dabángê ńkyí nyǐ mu o-sét ng* ké nǎ, dyityém emen dii/sú ne kafâ esa. 26O-man n ecít busa-dyityém emen, nké nang yeě o/chi o-ri byibî-byěm ḿbyí nyǐ mu o-chi i.
27Banet ḿbé mbe ba-kuu ng boǒtám ba-tî ba/fu, bukám barî-banet, mbu bu-kám m kámbé mbé bayén. Ne buká bu/chi bu-bwa esim bu-kám banet ḿbé ba/kpet ebírî kámbú.
28Nsêt kyisédéng o-sa ng kafâ ne banet ḿbé nyǐ mu o-sét ng byisédéng o-bât ng kámbé. Ne byiraa-kaǎnínǐm byi-cen n ne bukyû.
Currently Selected:
Póróvep 26: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
