Póróvep 25
25
Atím-Ekan Akíri nyí Otu Sólómon
1Nyín něen atím-ekan akíri nyí Otu Sólómon, nyí banet ḿbé kyibám-butu ńkyí otu mú Júda, mú odabángê Otu Hezekyâ ba/sáng.
2Be byimu byi-kyâ Osówo ofê ké byěm ḿbyí nyǐ o*fí o-chi i banet ba-nyît* nké byimu byi-kyâ batu ofê ké byěm ḿbyí mbé mbe ba-chi i banet ba-nyît.
3Wo aa*nyît ne banyá ńkyí otu mu o-kabe ng*. Okabe emen o/kódông o-shwôm bě. O/kódông wǎ bubóng, ne o/ríbî wǎ baya ḿbé baryên.
4Onet-mpwô o-chi i chwǒm ńkyí kyidanwa bunong ké syílyíba mú ba/fîm babat kángkáng. 5Fîm bambên atyém ké bushú ḿbú otu ne kakyúng-butu emen ka/chi ka-kyú ńké kanong echi.
6*Dachi a-kúng byiko eyên kyíbóng* ké nkéré aa/bwom ké bushú ḿbú otu* a-tông nang otông a/fu, wo amu kiǐtí-onet*. 7Kyi-nwa ng ńkyí bada ǒ esét ba/fu, wo akyú ké kyichí ńkyí kyi/nyâam, kyi-shwôm ńkyí bada ǒ esét ba/fu, wo adim a-kye onet okíri mú mu kiǐtí kyichí.
8*Dajang ekwáng ké esuk ece kyi-kim ne ńkyí wo aa/ri* ké nǎ, wo a/chi a-chi nǎ, â ntûesé okíri o/basét kâng o/fu, ńkyí wo a/sét kyi*fí ké kafâ*.
9Â wo ne orî-onet eyên ba*da/tyeem ejá ké chwǒm* tóbê n̂g kánkyí ben bayén báyen ne *dasét onet ńkyí ben ba/tóbê ké kadip*. 10Â kyi*fí éné* nang yeě o/chi o-nyît o/fu, wo a-sét ng bansêt, ne éshwân ee*man ǒ ké byiko ne banyá*.
11Kyiraa ńkyí ba/sét kanong nkyi wǎ chwǒm ńkyí ba/chi ké gûl ba-twôom ké syílyíba.
12Dyishí ńdyí onet mú oo/ri byěm odatángê onet mú mu o-ryuu ng o/fu, nyǐ ojwo kándyí, nkyi kanong kyi-shwôm ékpâl nyí ba/chi ké gûl nang byibwáng-gûl mú onong onong.
13Onet-kyitwóm mú badafé dyityém ne nyǐ o-chee ng dyityém ńdyí onet mú o/twóm ǎ, wǎ omu mú odakune ké nkéré-byiryíng efuu.
14Banet ḿbé mbe ba-ryí i ocím ké byěm ḿbyí mbé ba*fí ba-kyâ* mbe wǎ ófíbí ne afú ḿbyí byi*fí byi-cen n ne omu ena*.
15Ejá degere e-man n ekpógê onet-bakân, ne e-man n echi otu o-yángê dyityém.
16*Darû bakút-bukwan ba-shwôm ǒ*. Kakíri a-kû ng efám â ba/jê ba-shwôm. 17*Dakûdari orî-onet eyên onáng kángkáng nkéré*. Kakíri a-tyú u ǎ o-kpet kafâ esa ne wo.
18Kyisédéng a-bât orî-onet eyên kyi/bên wǎ kyikim-ochí ne wǎ kashwám ne wǎ dyíban ńdyí cáncán.
19Dyityém etî ké onet mú baa*fé dyityém ne nyǐ* nkyi wǎ enyam esâm ne kiǐzóngézóngé-busháng, ne wǎ kyiká ńkyí kii/byíryî.
20Onet mú mu o-kwán n ekwan o-sét onet mú dyityém dyi*fí dyi-nyîn n ǎ* mu wǎ onet mú mu o-pii ng byídí ké byiko ké dyicí-dyibyi, ne mu wǎ mu o-fâ bano ké kyinêm.
21Â esong nyi e-nwa ng onet-bushwôn eyên, kye ǎ byiryíng, â omu mu o-jê ng ǎ, kye ǎ omu o-jwáp. 22Wo a/chi a-chi ǎ éshwân e-sú ǎ ké byiko, ne Óburúkpâbí o/chi o-yárê ǒ.
23Eram e-cen n ne kafâ esa wǎ eringe nyí bufú budacen ne omu.
24Kyi-nwa ng ńkyí adakyú kyíjí kyi-shwôm ńkyí adakyú ne onyi mú odashwôn ashwôn.
25Bǎmpém ḿbé banong ejwo, ḿbé ba/fím ké kyikit ńkyí kyi/tíbî, mbe wǎ omu mú okun ejwáp ké nkéré omu o-kú o-jê ng ǒ ne omiríng oo/jwóm ǒ.
26Onet mú mu o-chi i kanong mú o/bírî o-kpet dyityém efé ne kyibî-onet mu wǎ kace ńké baa/bên kánké, ne wǎ dyijwáng ńdyí baa/fé bukye ké ndyí.
27Kii*nwa ńkyí adarû bakút-bukwan a-shwôm*. [Eringe ebónge to, kii*nwa* â amu a-jang ng eryuu a/fu, banet bakpee ǒ chwóó*.]
28Â aa*man ekám byiko eyên ké nkéré kafâ ka-kú ka-sang ǒ* ányi wo amu wǎ oshê mú o*fí to ne ekpe nyí ba/wâng kámú* ne o/firi mú badakye kámú bunwa.
Currently Selected:
Póróvep 25: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
