Póróvep 24
24
- 19 -
1Orêm o*da ǒ echi ne byibî-banet* ne *dakan a/fu, wo a-ryí i bucín ne mbé*. 2Atyém ebe a-cen n ne bunwa, ne byiraa ebe byiraa-afaníkong.
- 20 -
[ 3Ba-yip ng bubong ne byinyídíng ne ba-bi byise.] 4Byinyídíng nké mbyi byi-chi i banfût-kyise ba-sú ne biǐtí-byěm ne byěm ḿbyí byinong.
- 21 -
[ 5Kyi-nwa ng ńkyí adakyú ne bubong kyi-shwôm ńkyí adakyú ne busa.] Ké ntûntû, byinyídíng byi/shwôm busa. 6Ké nǎ, a-man a-kabe kanong kanong ne a-nwa byití, ne a-kpógê ng byití â amu a-koo ng bacê ḿbé banong.
- 22 -
7Enyam-onet ee*nyît kyikû-byiraa ḿbyí mbyi ne bubong*. Nyǐ o*fí ne chwǒm ńkyí odasét* ké nkéré ba-kú ba-tóbê ng biǐtí-byiraa*.
- 23 -
8Â wo amu a-nam m byibî echi kángkáng nkéré, wo a/chi a-koo dyizîn ńdyí nchi byiraa. 9Nang ebóng nké enyam-onet nyi e-kabe ng kyi-kyú u kyibî. Onet mú odatún banet fúú oo*nyîn banet*.
- 24 -
10Â a*fí ne busa ké nkéré byiraa bii/róng* ányi wo busa bu*fí ǒ ké ntûntû*.
- 25 -
11Nyángê banet ḿbé baa/kám kámbé ba-wâa eju dyikáá. 12A-man n eraa a/fu, kyi*da ǒ ekim* nké Osówo mu o-nyît ng okabe eyên. Nyǐ mu o-ri ng ǒ ne mu o-nyît ng. Nyǐ o/chi o-kye ǒ byěm eringe nyí amu a-chi i.
- 26 -
13Wǎn ejí, rû bakút-bukwan, ké nǎ, mbe kanong, ne eringe nyí mbe ba-nyîn n ké omiríng, 14nyît a/fu, bubong to mbu bu-kyâ kanong ké busun eyên. Já bubong ne a/chi a-já kanong ké nkéré mú mu o-bâ.
- 27 -
15*Dakyú wǎ mbên dyityém mú mu o-nam m byěm ejii ḿbyí onet mú mu o-chi i kanong* a-koo nang kyise emen*. 16Ké nǎ, nang onet mú mu o-chi i kanong o-róng kampén kampén o/chi o-bûu, nké kyibî-afaníkong kyi/chi kyi-ju bambên atyém.
- 28 -
17*Dajêe ké nkéré onet-bushwôn eyên oo/róng ké afaníkong*. *Dajêe ké nkéré o/kpán dyícíring*. 18Óburúkpâbí o/chi o-nyît â wo amu a-jêe ng, ne kii*ba/chi kyi-nyîn ǎ*. Ké bubwô ámbu, o/chi o-mîng kafâ esa ne nyǐ.
- 29 -
19*Dabángê byibî-banet byi-chi ǒ a-sa kafâ*. Orêm o*da ǒ echi ne mbé*. 20Ké nǎ, mbên dyityém o*fí ne okabe kyi-kim ne nkéré mú mu o-bâ*. O*fí ne chwǒm ńkyí odatî okabe ké nkyí*.
- 30 -
21Wǎn ejí, kye Óburúkpâbí ne otu ofê, ne *dachi a-né echi ńkyí mbé mbe ba-sét ng*. 22Ké nǎ, mbé ba/chi ba-twóm afaníkong abeabe. Yeě mu o-nyît ng dyizong-afaníkong ányi nyí mbé ba/chi ba-twóm.
Atím-Ekan Akíri
23Banet ḿbé mbe ne bubong ba/raa to byiraa ḿbyín ba/fu, kii*nwa ńkyí nkêt mpan odaryí acît*. 24Kángkáng banet ba/chi ba-kû ǎ eshú, ba-sa ng kafâ ne nyǐ, â nyǐ o/két mpan o-nwa onet mú o/chi kyibî. 25Nké bankêt mpan ḿbé mbe ba-kyâ banet ḿbé ba/chi kyibî busông kyi/chi kyi-nwa ne mbé, ne ba/chi ba-kyú ne dyizîn ńdyí dyinong.
26Onet mú mu o-faa ng onet ojá ké bukwóp ḿbú ntûntû, mu o-tông ng o/fu, nyǐ o-chi i ocín mú ntûntû.
27*Dabi kyibám a-nap kyise eyên* â a*da/ri ne a/fu, aa/kpang kyifát eyên ńkyí kyida ǒ ekye byiryíng*.
28*Dabwom ntûesé a-bât onet* â ochíchí-chwǒm mú o/chi o*fí ǒ mú adasét*. *Dalángê nang byěm a-bât ǎ*. 29*Daraa a/fu, me n/chi n-chi ǎ wǎ eringe nyí nyǐ o/chi mě*. Me n/chi n-só ǎ ewa ké ńkyí nyǐ oo/chi mě.
30Me n/cen n-shwôm ké byifát ḿbyí enyam-onet-dyidare, 31ne byi/mû bii/sú ne byiwong, ne biǐbyâa bii/kán ké mbyí. Ekpe nyí ba/bi ké aká ba-wâng kámbyí ee/myii kyísí. 32Me n/tún kánkyí n-ri n-kabe kyi-kim ne nkyí, ne kyi/tángê mě chwǒm kyi/fu, 33â kyi/nyîn ǒ, nya achi, a-rê burê. Fút abwô eyên a-jáng ké kaǎnyín-nkéré, 34nké ké nkéré a-kú a-rê ng, kyikpu kyi/chi kyi-kám ǒ wǎ mbam banet byěm o-koo.
Currently Selected:
Póróvep 24: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
