Póróvep 19
19
1Nkyi kanong ńkyí adakyú kyikpu a-sét ng ntûntû kyi-shwôm ńkyí adakyú enyam-onet nyí nyi e-sét ng kyisédéng.
2Dyityém efé ké byěm echi dii*chwáp* â bubong bu*fí*. Éwâ e-cen n ne afaníkong.
3Banet bakíri mbe ba-bên n byiko ebe ké enyam-byěm echi, ba-bwa ba-bîn Óburúkpâbí.
4Banet-esang ba-ryí i bacín chwóó ḿbé bafyîfî, nké banet-kyikpu baa*man etî nang boǒnyín ḿbé mbe ne mbé*.
5Ba-kyâ ǒ busông â amu a-sét ng byisédéng ké esuk. Bukwóp bu*fí ḿbú adafem*.
6Nang yeě o-kyé ng kanong ńké biǐtí-banet. Nang yeě mu o-fu ng nyǐ o-chi i ocín-onet mú mu o-kyâ banet eyáré.
7Nang bwǎn-bané-onet-kyikpu baa*kúng ǎ wǎ onet*. Éné nké nyǐ o*fí ne bacín*. [Nang o-nwa nǎ! oo*já bucín nang bubónge*.]
8Chwáp byiko eyên a-kwâa nang ebóng ńkyí adaman ekwâa. Kûzîim ńkyí amu a-kwâa ng ne kyi/chi kyi-nwa kyi-kye ǒ.
9Nang yeě nké mu o-sét ng byisédéng ké esuk oo*fem busông*. Nyǐ o/chi o-kpú.
10Kyi*da/kwárê ńkyí enyam-banet badakyú wǎ onet-esang* nang ńkyí básóng badakyú batu ḿbé biǐtí-banet*.
11Â wo amu ne bubong a-kám m kiikuku eyên, ne nkyi kiǐtí-akpee â a*da/kúng kyibî ńkyí onet o/chi ǒ wǎ chwǒm*.
12Kafâ esa ńké otu nke wǎ dyifêm ńdyí ekpang edafém, nké kanong emen nke wǎ kyibû ńkyí nkyi kyi-na ng ké biǐbyâa.
13Enyam-wǎn e-man n ecen bonchí ne afaníkong. Onyi mú mu o-shwôn n ashwôn mu wǎ omu mú mu o-róngê e dyibán dyibán.
14Onyinchéng o-man n eryí bukyû ké kyise ne akpuga nyí bonchí ne boné, nké Óburúkpâbí nké oda ǎ ekye onyi mú mu ne bubong.
15Â kyi/nyîn ǒ, dare dyidare, rê burê a-ca kashú, nké a/chi a-kyú esong.
16Tî Byije ḿbyí Osówo ne wo a/chi a-kpen kanong kanong. Â a/né kámbyí, wo a/chi a-kpú.
17Â a/kye banet-kyikpu chwǒm, nkyi éné wǎ a/pwoo Óburúkpâbí kánkyí, ne nyǐ o/chi o-só ǒ kánkyí.
18Tángê bwǎn eyên dyishí ké nkéré mbé ba/tôong bwǎsíng ḿbé badakwâa chwǒm. [Â a*da/chi éné* ányi amu a-chwáp ng kámbé ba-bên byiko ebe.]
19Â onet mu ne kiikuku chwóó, mîng ǎ. Nyǐ oyén nké o/chi o-ri. Â [a/chwáp ǎ kabónge o-fem ké afaníkong, a-man a-chîchi éné ké nnyinyěng.]
20Â amu a-jwo ng bacê ne amu a-bángê e chwǒm ekwâa, a/chi a-já bubong dyicí dyibónge.
21Banet ba-man n ekabe kángkáng azong-byěm, nké ńkyí Óburúkpâbí mu o-ryuu ng nké kyi/chi kyi-chi.
[ 22Nkyi chwǒm-éshwân ńkyí adashwam byěm.] Nkyi kanong ne banet-kyikpu kyi-shwôm bansêt byisédéng.
23Kye Óburúkpâbí ofê ne wo a/chi a-kpen kanong kanong, kyibî kii*ta ǒ*.
24Banet bakíri mbe ba-dare ng dyidare ńdyí nang byiryíng baa*man efé ké ocím*.
25Kye bantông byiko busông eringe nyí banet ḿbé baa*nyît chwǒm* badakwâa chwǒm. Â wo amu ne bubong a-kwâa ng chwǒm ké nkéré baa/tángê ǒ dyishí.
26Onet mú mu o-nwa ng ne bonchí o-ró ng boné mu ne éshwân ne ecábé.
27Wǎn ejí, ké nkéré aa/mîng byěm ekwâa, kaa*bwon to ne a-ráp ńkyí a/mû aa/nyît*.
28Ntûntû oo*chi* â ntûesé oo/tî okabe o/fu, nyǐ o-chi i kyi-sa onet*. Bambên atyém byěm-byibî echi byi-nyîn n kámbé.
29Ntông byiko-enyam-onet oo*fem ké byimirî*.
Currently Selected:
Póróvep 19: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
