Póróvep 18
18
1Banet ḿbé byiko ebe nké nke byidanyîn kámbé baa*tyeem ne banet bakíri*. Mbé baa*bángê ne ńkyí nang yeě mu o-nyît ng o/fu, nkyi ntûntû*.
2Enyam-onet ee*kérê* nang mu o-nyît ng chwǒm, nang o*fí o-nyît ng*. Ńkyí nyǐ mu o-ryuu ng kyi*da/shwôm otông o/fu, nyǐ mu o-nyît ng*.
3Byibî ne éshwân byi-cen n burwám. Â ofê o/man, éshwân e-ribi.
4Byiraa ḿbyí mbyi byi-fím m ké ocím mú onet mbyi wǎ baya ḿbé ba/ríbî. Bubong mbu wǎ kace ńké nke ka-sen n.
5Kii*nwa ńkyí adabwom ne onet mú o/chi kyibî* a-két mpan o-bên onet mú o*da/chi chwǒm*.
6Ké nkéré enyam-onet ee/kpet okân ké dyishí, ányi o-kú o-kyé ng byimirî.
7Enyam-onet nyi e-bên n byiko emen ké nkéré o-kú o-raa ng kyiraa. Byiraa emen byi-kám m ǎ nyǐ oyén wǎ kaǎtám.
8Byiraa eram byi-nyîn n wǎ byiryíng, ne byi-nyîn n bě eryí.
9Onet-dyidare o/bên wǎ onet mú mu o-bên n byěm.
10Óburúkpâbí mu wǎ kiǐnyáám-kyise ńkyí shwanshwan, ńkyí banet ḿbé mbe ba-chi i kanong badanung ba-fem.
11Banet-esang mbe ba-kabe ng ba/fu, esang ebe e-ku ng kámbé wǎ ekpe nyí nyi shwanshwan ne e/nyâam nyí ba/bi ba-wâng oshê.
12Onet o*fí mú bada ǎ ekye ofê* â onet ámu o*da/shû byiko emen kyísí*. Banet ḿbé mbe ba-tông ng byiko mbe ké bukwóp-bukyû.
13Fwôo atông a-jwo ne a-kûfaa. Â a*da/chi éné* ányi wo amu a-róng ng enyam ne amu a-kyâ banet ecábé.
14Dyityém eyên etî ké dyikpen dyi-man n ǒ echi a-nyange ké orwôm. Nké â a/ju kándyí, nkuli kyikû-okabe eyên oo/man.
15Banet ḿbé mbe ne bubong mbe ba-ryuu ng byěm ekwâa ne baa/kpá byiko ḿbyí badakwâa nang nkéré orá.
16Eyáré nyí onet odakye e-kyâ ǎ mpât mú odabwom ké bushú-kiǐtí-onet.
17Kyi-chi i wǎ onet mú o/bwóp kashú o-pan mpan ké esuk o/sét ntûntû tete onet mú nyǐ o/kó ǎ mpan o-kpet ǎ bǎmbím ebí.
18Â bakân-banet bafee mbe ba-shwam m kyiraa ké esuk, dyímám etwóp nké dyidaman kyiraa ebe.
[ 19Chwáp wǎn-boné eyên ne nyǐ o/chi o-ku ǒ ké afaníkong wǎ ekpe nyí shwanshwan nyí ba/bi ba-wâng oshê.] Nké â amu a-shwôn n ne nyǐ, nyǐ o/chi o-cít afyi-kyise emen o-mîng ǒ kyíjí.
20A-man a-tû nang ebóng ńkyí kyi/byí ké kángkáng byiraa eyên ḿbyí amu a-raa ng.
21Nang ebóng ńkyí amu a-raa ng kyi-man n echwáp dyikpen ne kyi-man n ebên dyikpen to. Ké bubwô ámbu, a-man a-koo nang ebóng ńkyí kyi/byí ké byiraa eyên.
22Nang yeě nké o/ri onyi, o/ri chwǒm ńkyí kyinong. Kyi-tông ng kyi/fu, Óburúkpâbí mu kanong ne nyǐ.
23Ké nkéré onet-kyikpu o-kú o-raa ng, o-tîm m arông degere. Onet-esang o-kúng ng banet wǎ enyam ké nkéré o-kú o-raa ng.
[ 24Bacín mbe kô] ḿbé badalángê ba/fu, mbé ba-chi i bacín, nké bacín mbe kô to ḿbé mbe ba-tî ng dyityém ne onet ba-shwôm bwǎn-bané.
Currently Selected:
Póróvep 18: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
